Muestra lingua: ALBERT COHEN, MI PADRE por Edmond Cohen

Keridos amigos, vos do el teksto de la proksima emisyon del programa. 

El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin. 

Saludos a todos 

Edmond Cohen – Paris, Fransya 

UN 

ALBERT COHEN, MI PADRE

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves 17 de marso, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière.

La semana pasada vos avli de los djudyos de Rhodes, i despues mi amigo Eddy Levy me telefoneo para demandarme de rekodrar la memorya de un poeta nasido en Rhodes en 1922, amigo suyo ke bivyo en Ayfton ande fue torturado por la polisya edjipsyana, i ke se muryo en Roma en 1981, a la edad de 59 anyos. Este ombre se yamava Boaz Bobo Alhadeff.

Tambyen Eddy Levy me demando de akodrarvos el livro eskrito en 1992 por Esther Fintz-Menasce : Gli Ebrei a Rodi, en ingles The Jews of Rhodes. I para los ke entyenden el franses, vos akonsejo de ir a meldar su artikolo intitulado Le martyre des Juifs de Rhodes en la revista Los Muestros, n° 45 de desyembre 2001, ke toparash en bushkando kon Google sovre internet Los Muestros, n° 45.

Aprovecho tambyen  esta okazyon para akodrarvos un filmo ke me olvidi de nombrar la semana pasada : es un filmo de 1995 echo por Diane Perelsztejn, intitulazdo Rhodes Nostalgie. Es en franses, ama muncha djente en el filmo konta sus rekodros en muestra lingua.

Esto dicho, pensi para oy, en primero, de avlarvos de Albert Cohen el eskrivano, djudyo sefaradi ke fue, asigun mi, uno de los mas grandes eskrivanos de lingua franseza, vente vezes mas grande ke este negrinyado de antisemit ke fue Louis-Ferdinand Celine, ke agora esta onrado komo grande i ke no valiya mismo el kurshum para fuzilyarlo, la sola koza ke meresiya.

A la rovez, Albert Cohen, el, meresiya el Nobel de literatura, i no se deke no le dyeron, ama es siguro ke este ombre kedara en las memoryas muncho mas tyempo ke tantos premyos Nobel oy kompletamente olvidados.

Ama me di kuenta ke nunka yo aviya echo una emisyon sovre un otro Albert Cohen, mi padre de bendicha memorya. Ya aviya avlado de el en un atelye de Vidas Largas, a la demanda de muestro Prezidente de onor Jacques Aelion, ke esta en estos tyempos en el oshpital i a kyen dezeamos todos ke se sane pronto i ke tenga una salud de fyerro. Fue, por esta okazyon, la primera vez ke tomi la palavra en muestra lingua, i komo la djente se intereso , kontinui. Ama no avli de mi padre aki a la radyo, i antes de avlarvos del eskrivano – sera para una otra emisyon – troki de idea i eskoji de avlarvos en primero de un otro Albert Cohen, mi padre.

Kuando Jacques Aelion me tuvo demandado de avlar de mi padre aze de esto mas de sej anyos, pishin respondi si; kyen es el ijo ke no va kerer avlar en onor de su padre?

Ama despues, la primera koza ke me vino al tino es: si me meto a avlar de una persona ke dinguno aki konosyo, kien se va interesar, mizmo si lo ago kurto, a su vida enteramente konsagrada a su lavoro de ombre de ley?

Ya se ke Marcel Pagnol supo interesar la djente avlando de su papa, y Albert Cohen (no mi padre, el escrivano!) de su mama, ke dingunos konosiyan; ama Pagnol y Cohen eran eskrivanos! y ke eskrivanos! Yo, povereto de mi, la sola koza ke tengo enriva de estos, es ke yo avlo en djudeo-espanyol… y esto Pagnol no saviya azer! En kuanto al escrivano Albert Cohen,  ya avlava la lingua de los djudios de su isla, Corfu, ama kon kyen avlava?  solo kon su gato! y no era muestro djudezmo, era una lingua kaji italiana ke avlavan solos los djudios de Corfu… Zavalis… les manka un profesor Vidal Sephiha para akodrarse de esta lingua ke se va pedrer , si no sta ya pedrida. 

Dunke, kerej o no kerej, vos vo avlar de mi padre, ama en muestra lingua, la ke el chupo kon la leche de su mama, kuando nasyo en Estanbol en1897, kere dizir tres anyos antes del siglo pasado, del tyempo de los sultanos, del tiempo del sultan Abdul Hamid, ke yamavan todos el sultan korolado, ya endevinaj deke, vos akodrando que lo korolado es la kolor de la sangre.

La madre de mi padre, mi vava Sultana Hayon, morava en una kaza en Halidjioglu (una male de Estanbol); era  ija de un ish bitiridji.  Kualo es un ish bitiridji?  En franses, se dize agent d’affaires, o conseil juridique. La mala djente, en Turkia, en vez de dizir ich bitiridji, se burlava unas vezes i dizia ish batiridji, el ke aze batirear los etchos! no se si mi bispapu, este ish bitiridji, era batiridji, ama lo ke se es ke era un ombre ke paresiya muy savyo porke teniya una larga barva blanka i ke kaminava la tripa delantre komo un senator; una sola maka teniya, es ke no saviya meldar! kijo dizir meldar el turko. Y me parese ke deviya ser muy yutch de azer el ish bitiridji en Turkiya sin saver meldar en Turko! Mi bispapu se pasava la mano sovre la barva komo un gran savyo delantre de los mushteris ke le amostravan sus papeles y les diziya: dechadme estos papeles, ya vo pensar a lo ke se puede azer; y despues amostrava los papeles a sus ijos, los ermanos de mi vava, ke eyos saviyan meldar lo turko, y ansina pudo lavorar y mantener una kaza y una famiya de syete kriaturas.

Si vos avli de mi vava antes de mi papu, ay una razon: es ke mi vava, Sultana, kuando se kazo con mi papu, Nisim Cohen, dunke el padre de mi padre, se kedo kon su marido un anyo en la kaza de su padre, lo ke se yamava meza franka, un modo de dota: el yerno rizin kazado morava y komiya kon su mujer el primer anyo del kazamyento en la kaza de su suegro.  Esto izo mi papu, ke ganava difisilmente su vida kon el komersyo de diamantes.

Kijo dizir que mi vava se topo prenyada en la kaza de su padre y ke mi padre nasio en este anyo de meza franka en la kaza de mi bispapu, ish bitiridji.  Y kuando estava dainda prenyada, mi vava s’esperto una noche oyendo gritos terrivles en la kaye: eran los turkos ke aziyan el pogrom de todos los vizinos ermenis , degoyados  delantre de mi vava muerta de sar.. Esta matansina de miles de ermenis en Estambol en agosto 1896 esta agora byen olvidada…salvo de los ermenis. No ay de konfundir esta matansina kon el jenosido de 1915, 19 anyos mas despues, ke el no va aharvar a miles de ermenis, ama a syenes de miles.

Mi padre tuvo despues dos ermanos, uno Victor ke se kazo,  (nasiendo no se yamava Victor, no se komo se yamava; le trokaron su nombre los hahamim en Haim – dunke Viktor – kuando bebiko fue hazino. Ya savesh ke era un uzo ande mozotros de trokar el nombre de alguno muy hazino, de una parte para trokar su mazal, syendo ke kada nombre yeva un syerto mazal, i de otra parte para enganyar al angel de la muerte ; de toda manera, esto kamino, i mi tiyo se sovresalyo); su otro ermano, Leon,  se kedo bekyar su vida entera, morando kon mi padre i lavorando kon el; syendo sinko anyos mas mansevo ke mi padre, yene se muryo quinze anyos antes de el.

Empeso mi padre sus estudyos en la eskola de la Alliance Israélite Universelle, ande se ambezo a avlar en franses, alman, lashon; y despues se fue al liseo turko de Kabatash, ande era el solo djudyo de todo el liseo. Los djudyos proves, la grande mayoriya,  no se ivan al liseo, y los djudios rikos, unos kuantos,  se ivan en las eskolas privadas y karas; mi padre era una eksepsyon. . . Aya en este liseo se ambezo el turko (ke a esta epoka s’eskriviya kon letras arabas), el bulgar, el persan y el arabo.

Kuando eskapo el liseo, empeso mi padre los estudyos de derecho a Stambol, el hukuk komo se dizia, kuando vino la grande guerra; mi padre tuvo el mazal de empesar el askerlik kuando la guerra s’estava eskapando, y no sufrio muncho, ama tengo papeles ande se ve vestido de asker turko.

Al kavo de sus estudyos turkos, vino mi padre en Fransya para estudyar en la Faculté de Droit de Paris, y salio doktor en derecho franses en1921, kon una teza muy kuryoza, ke dainda no entyendo. Su teza era de derecho komparado. El ke konosiya muy byen el derecho turko, deke no lavoro sovre una komapazon entre derecho franses i derecho turko. ? No se. Entre tantas linguas ke se aviya ambezado, no aviya el ingles ; i por tanto izo su teza sovre los lon kontratos por korespondansya en los derechos fransezes, ingles i amerikano. Para preparar esta teza tuvo ke meldar munchos livros en ingles de derecho ingles o amerikano. Komo izo ? No se…Ama lo ke se es ke no solo su lavoro fue achetado, ama indimas obtuvo un premyo!.

 Uvyera kerido tambien ser profesor, y se ambezo para esto, ama no syendo franses no pudo presentarse al konkurso de la agregasyon como lo izieron sus amigos; uno de estos, ke fue profesor, lo ayudo komo djudyo muntchos anyos despues, del tiempo de la segunda guerra.

Una vez obtenido el diplomo de doktor de derecho franses, mi padre torno en Turkiya, y se izo avocato en Estambol; entro como kolavorador en el ofisyo de un avokato selanikli ke se yamava Naar. Era un ombre moderno, i una vez ke mi padre estava kombidado a komer a su kaza, vido biftek asado kon la sangre…era la primera vez ke mi padre veia esto en kaza djudiya…

Munchos anyos despues, puede ser sinkuenta anos despues, resivi yo en mi ofisyo al padre Aelion de muestro aktual presidente de onor, i me disho: yo konosi a vuestro padre del tyempo ke lavorava en Estambol en el ofisyo del avokato Naar!

Me toma mareo de pensar ke mi padre empeso su vida kon la luz de la kandela; despues vido apareser la luz por el gaz, i mas despues la luz por elektrisita; i el sinema… Se akodrava mi padre de la primera vez que se fue al sinema en Estambol; para ver kualo?  Nunka se olvido:
-une plantation de cocotiers a Singapour (una plantasyon de arvoles en Singapur)
-un mariage (una boda) a Payacombo, île de Sumatra…

Las primeras arabas kon motor; los primeros avyones; la radio i despues la televizyon ets ets Kuando mi padre se muryo a la fin de 1990, ya teniya fax y ordinador; las solas kozas ke no konosyo son internet y los telefonos de aldikera!

Mi padre no se kedo muncho tyempo en Estambol; aviya aboltado en 1921, i un anyo despues, en 1922, se espanto muncho de Mustafa Kemal, ke era nasionalisto i ke no se amostro muy karinyozo kon los gregos kuando konkisto Izmir. Toda mi famiya, kijo dizir mi padre kon sus dos ermanos i padre i madre, vinyeron en Fransya komo immigrantes  «Israélites du Levant».

Es mi padre ke bushko lavoro para mantener a toda esta famiya; topo lavoro komo empiegado en una sosyeta , y en 1926 se atrivyo a meterse a su kuento komo conseil juridique…ish bitiridji. Avokato no era mas posivle, syendo ke no era franses.

Unos kuantos anyos despues, en 1933, mi padre ya teniya 36 anyos, s’espozo kon una djudiya de Bulgariya, y le dyo, komo es la tradisyon, un aniyo kon ermozo brilyante; akodradvos ke su padre, mi papu, lavorava en los diamantes…

Ama su korason no era kemado para esta manseva, i troko la idea. Kurto lo azeremos, rumpio mi padre kon la Bulgara; no fue kolay; el padre de esta Bulgara lo keriya matar kon kuchiyo, i no era shaka; mi padre fue ovligado de irse eskonder en un otel unos kuantos diyas asta ke se arrepoze la koza!

Sovre esto, mi padre teniya un primo ermano ke aviya kazado una lehlia de Stambol, i ke vino el tambien en Fransya kon su mujer. Esta mujer lehliya teniya una chika ermana de vente anos, morenika kon ojos mavis, ke aviya vinido en Fransya para estar kon eyos, ama ke no teniya papeles para kedarse; se fue a tomar consultasyon kon mi padre…ke vyendola no topo otra koza de dizirle ke la unika solusyon para kedarse en Fransya era de kazarse kon un Franses, o sino un Franses, un djudyo kon buenos papeles…

Y ansina es ke se kazo en 1935 kon mi madre ke teniya 18 anyos de menos ke el; ama esta vez le dyeron el aniyo solo el diya de la boda; kuanto a la Bulgara, se guadro su aniyo…

Yo nasi en 1936, i tres anyos despues, komo ya lo savesh,  fue la gerra. No vos kontaré estos tyempos terrivles, porke si empeso, en dos oras dainda estaremos aki; i de toda manera esto ya lo konti en otras emisyones. Solo vos diré ke grasyas a su kapatchedad y grasyas a tantos fransezes ke meresen el titulo de djustos, la kurtareimos todos. Mi papu se muryo durante la gerra, ama de hazinura, lo ke salvyo a su mujer y a uno de sus ijos, el ermano bekyar de mi padre,  porke pudyeron fuyirse kuando la polisiya vino para aferrarlos. Son tiempos ke nunka los ke los konosyeron podran olvidarse. Yo era tchiko, ama me akodro.

Despues de la guerra, mi padre tuvo el mazal de topar el apartamento ke era a la vez su morada i su ofisyo, ke los almanes no tuvyeron tyempo de tomar; ya aviya el mur de los almanes sovre la puerta, ke se kedo munchos anyos despues de la gerra, komo un rekodro. La vida empeso de muevo, mi padre obtuvo la nasyonalidad franseza en 1947, ama el tyempo ya aviya pasado, era demaziya tadre para empesar una agregasyon para ser profesor. Yene tuvo una konsolasyon : en los anyos 1958, el kapo de la Faculté de derecho de Paris le demando ofisyalmente, en su kualita de grande espesyalisto del derecho de los establesimyentos komersyales, de dar kursos en un Instituto de  la Faculté de Droit. Kreo ke nada le dyo tanto plazer de verse dar kursos de derecho komo un profesor en esta misma faculté de derecho ande aviya vinido komo estudyante.

Poko tyempo despues, en 1962 son los notaryos ke lo kombidaron en Strasbourg para partisipar a sus lavoros sovre el establesimyento komersyal.

A parte de estos onores, mi padre kontinuo de bivir de su lavoro asta su muerte en1990, a la edad de 93 anyos. Lavoro asta el ultimo dia de su vida. Se keriya retirar al kavo del anyo 1990, porke se topava muy kansado. Muryo antes, el 27 de desyembre. Toda su vida eskrivyo livros, artikolos de revistas de derecho, i su nombre se fue afuera de Fransya. Topi un livro eskrito en Uruguay ande un profesor avlava de los eskritos de mi padre kada dos pajinas.

Ke dizirvos demas sovre un ombre ke no konositesh…

Era un ombre modesto, ke se interesava solo en dos kozas : su lavoro, i su famiya. Para su ijo o para sus inyetos, deshava su lavoro para okuparse de muestros estudyos i ayudarmos. Ama este ombre ke metiya el lavoro i los estudyos arriva de todo era tambyen muy shakadji, kapache de reir a taraka. Saviya avlar kon kriaturas, ke todas eran boladas para el. Saviya interesarlos i ambezarles syempre kozas muevas prezentadas komo ekstraordinaryas.

Fue su vida entera sekretaryo jeneral de la Cultuelle, la asosyasyon ke se okupava de los kales de Saint-Lazare i de la Roquette. No vos dire ke era un ombre tan sufu. Se iva al kal solo tres vezes al anyo, por rochechana,  por kipur, y por el meldado de su padre. Ama puedo dizir ke fue un buen djudyo, un buen padre, un buen ombre. Ke ‘ste en Gan Eden. Amen.

Asta el djueves ke vyene, si kyere el Dyo!