eSefarad Noticias del Mundo Sefaradi
«Entelijente i korajoza»
Avía un peshkador prove ke morava al lado de un lago i tinía una barkita. Kada día iva a peshkar i traía a kaza unos kuantos pishkados, ke eran la kumida de la famiya.
Un día él se fue al merkado a merkar zerzavat.
La mujer kijo repozar un poko de las lavores de kaza, tomó un livro, fue se asentó en la barka i empesó a meldar.
Ensupitó vino un pulís, la vido ayá, se le aserkó i le disho: «Tú estás peshkando akí ke es defendido! Vas a pagar una fuerte djezá!»
«No!» le disho la mujer, «Yo no estó peshkando, estó meldando…».
«
No me la kontes» le disho el pulís «Tú estás peshkando!»
Le disho la mujer: «Ansina?! I tú me tomates por la fuersa!»
«Yo?!’ le disho el pulís, maraviyado i espantado, «No es verdá!»
«Sí, es verdá!» disho eya.
«Addió, ke estás diziendo? Yo ni me sonyí!» le disho el pulís.
«I yo ni me sonyí de peshkar. No estás viendo ke estó meldando?» le disho la mujer.
Kurto lo aremos… El pulís se fue kon sus mokos enkolgando.
Kontado por MATILDA KOEN-SARANO – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
