eSefarad Noticias del Mundo Sefaradi
La noche del Séder i el gameo
Avía un kuple rizín kazado. Eya era de kaza alta i savía meldar el ebreo. El era amares i no savía.
Vino la primera noche del Séder i el marido no supo meldar la Agadá, i pasaron una nochada muy negra.
A la sigunda noche (komo ay al estranjero), le disho la mujer al marido, antes ke se fuera al kal: «Esta noche trae a un estranjero ke no save ande azer el Séder. El ke melde la Agadá en tu lugar.»
Ansí izo el marido. Vido uno ke no tinía ande ir i se lo yevó a su kaza komo musafir.
Kuando vinieron a kaza, le disho: «Behávod!», para ke empese a meldar la Agadá.
«No, behávod al patrón de kaza!» le disho el musafir.
De un behávod al otro, ya se entendió ke ni el musafir no savía meldar la Agadá.
En akel punto, la mujer ke ya se inyervó bastante, disho: «Ya digo yo la Agadá!’, empesó i disho: «En kualo es demudada la noche la esta mas ke todas las noches? Ke todas las noches tiníamos un gameo, esta noche tenemos dos! Agora ya podemos empesar a komer.»
Kontado por MATILDA KOEN-SARANO – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
