eSefarad Noticias del Mundo Sefaradi
El shabat i las estreyas
Un buen djidió salió a kaminar shabat a la tadre.
En kaminando vido en basho en medio la kaleja un dukado de oro reluziente.
El djidió se abokó para arrekojerlo, ma ensupitó se akodró ke era shabat.
Disho: «No, agora no! Vo asperar ke salgan las tres estreyas i lo vo tomar.»
I para ke no lo tome algún otro, le metió el pie enriva i empesó a asperar ke salgan las tres estreyas.
Ensupitó pasó por ay uno ke estava korriendo i, sin ver, le dio una buena pizada al pie al ombre ke lo tinía sovre el dukado.
Disho el ombre: «O, agora ya vidi las estreyas i ya puedo tomar el dukado!»
Kontado por MATILDA KOEN-SARANO – 2012
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
