eSefarad Noticias del Mundo Sefaradi
Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.
Marlène Samoun
Kantadora
(Aljería – París)
(Israel)
Marlène Samoun nasió aTlemcen en Aljería i bive en París. Estudió kanto en el Konservatorio Rachmaninov. Kon una maraviyoza kapachitá de emprovizasión eya mos envita a un kamino muzikal atraverso las linguas, los paízes i los tiempos. Marlène Samoun fue solista en ansambles de jazz, en un koro tzigano klásiko i un grupo de gospel. Enturada de muzisianos de todos los orizontes, eya torna a las melodías del pasado de temas eternos, a los kantes sefaradís i yidish, sakros i profanos, revizados al ritmo de la modernitá, a los gospels i spirituals tradisionales amerikanos, a las orasiones en ebreo i en árabo, kon una enterpretasión keynte i yena de vida.
De Kórdova a Estambol, de Tetuán a Salonik i al profondo Sud de los Estados Unidos, en kada lugar ande las personas sonyan, sufren, aman, se exilian i lavoran, se kompozan melodías de alegría i de tristeza, ke dan un momento de felisidad.
Dos albomes, «Noches noches» i «Sur la route» (Sovre el kamino) fueron dedikados a las múzikas djudías litúrjikas i profanas provenientes de la Espanya medieval, del Magreb, de la Evropa Oriental i de los Balkanes.
Marlène Samoun aparese regolarmente en konsertos, en Fransia komo al estranjero, kon sus muzisianos: Olivier Hutman al piano, Emek Evel al kontrabaso, Pascal Storch a la gitarra, Rachid Brahim-Djelloul al violino i Alain Douïeb a las perkusiones.El ansamble konstitúe un verdadero ogar de kreasión kolektiva, ande kada uno dona su propia sensibilitá.
Kuando Marlène kanta la múzika djudeo-espanyola bive.
Eya dize: «El Mediteráneo es mi tierra, De las muntanyas de la Galilea a la okra de la Provans, De los versantes del Atlas al sielo de la Andaluzía, De los balkones de Tanjer a las kalejas de Salonik»
