Las Notas de Matilda – Kantadores de la tradisión djudeo-espanyola: Ensemble Accentus

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

  
Ensemble Accentus
(Vienna, Austria, 1988)

El Ensemble Accentus fue fondado en Vienna en 1988. El grupo enkluye en todo 13 miembros, ke aparesen en diferentes kombinasiones, sigún la partikolar kompozisión ke van a tanyer, i ay i artistas uéspedes, ke demandan de asistir a siertas performansias, ke responden a sus abilitás spesiales. Los varios miembros del Ensemble Accentus son spesialmente abiles en los elementos de improvizasión en la performansia práktika de la múzika antika de Espanya kon su fertil meskla de kulturas, una fuente de ancha inspirasión a la múzika de la Renesans. Este grupo internasional ke renova la múzika antika, es spesializado en la múzika de las romansas sefaradías, ke pasó por tradisión oral, komo de múzika sakra i de múzika de korte del prinsipio del siglo XVI (Juan del Encina, Juan de Anchieta, Antonio de Cabesón, ets.) i el komplekso de múzika polifónika, ke apartiene a la parte posterior del mizmo periodo . El grupo aparesió en festivales de múzika antika atraverso toda la Evropa, en la emportante Semana de Música Antigua en Siviglia, en el Barcelona Concerts d`Estiu a Montserrat i en festivales semejantes en Londra i atraverso la Almania i la Austria, komo en Polonia i en Israel.

El direktor del Ensemble Accentus es Thomas Wimmer, ke nasió en Waidhofen en Austria, studió viola de gamba i mandolina en Vienna, spesializándose en spesiales instrumentos antikos a kuedra. El es el fondador del Ensemble Accentus, spesializado en múzika espanyola antika, i aparesió en munchos konsertos kon ensembles komo Unicorn, Oni Wytars, Lad i Clementic Consort. Su eksperiensia en konsertos le valió performansias en Evropa i Nord Amérika, komo programas de radio i aparisiones en televisión. El mizmo tanye el violino en su CD, entitolado «Sephardic Romances – Tradisional Jewish Music from Spain». La kantadora ke aparese en este CD es la mezzo-soprano Carmen Cano, i los otros muzisianos son superlativos.