Las konsejas de Rivka: EL TAPETIKO BOLANDO

Por Rivka Abiry

Kada mes Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene akostumbrados.

EL TAPETIKO BOLANDO

Un dia, avriendo el periodiko, enkontri un avizo sovre una Konferensia de la Asosiasion de Veteranos del Komando del Golfo Persiano, anunsiando su proksima reunion en Yerushalayim. Durante anyos supe de la egzistensia del Komando del Golfo Persiano de la II Guerra Mondial, de la organizasion de sus veteranes, despues de la gerra, i savia ke su 60. Konferensia Nasional se selebro en Danville, Pennsylvania, el 18 de Julio, 2007.

Ke paso? I deke agora kestionar, la demanda i el entereso sovre esta Asosiasion?

Yo vos vo kontar esta istoria porke kreo ke muy pokas personas saven, o se akodran, de lo ke se paso en Iran durante los anyos 1941-1946, i la II Gerra Mondial.

En 1941 kuando mi famiya tuvo de salir de Bulgaria, arivimos a Tehran donde tuvimos de ampesar una mueva vida, una egzistensia en un pais adjaib, i sin kerer estar involvados kon las aktividades de la gerra ayi durante los anyos 1941-1946, en esta parte del mundo – el Golfo Persiano.

«Desde 1942, Iran fue el lugar espektakular de unas de las importante aktividadas de gerra ke fue yamada Operasion “Lend Lease”, la ayuda a los sovietikos. El Komando del Golfo Persiano era aktivo i programado de mantener una ayuda, en transporto de materiales de la Amerika, a traves de Iran en benefisio de sus aliados sovietikos. Estos abastasientos yevados a traves de Iran fueron muy importantes. Las primeras trupas kon vapores Amerikanos yegaron a Khorramshar en Desembre de 1942 i rapidamente tomaron el kontrol del treno Trans-Iraní. Los nombraron el P G C (Persian Gulf Command.)
Su insignia fue komo se ve ariva, un eskudo de kolor vedre bivo, adornado kon un sable kolorado, una estreya blanka de siete puntas, las kolores de los musulmanes.

10,000 soldados amerikanos en 1941-1942 metieron pie en Iran. Entre los soldados avia i soldados djudios ke tenian sus rabino. Los amerikanos ayegaron kon vapores de la libertad de los Estados Unidos, a traves del Kapo de la Buena Esperansa i mas tadre a traves el Kanal de Suez. Todo lo ke trusheron fue desembarkado en el porte de Khoramshar. Desde ayi los kamiones i el treno “Trans-Irani” viyajavan derecho al norte, pasavan mas de 1000 kilometros a traverso las montanyas, el dezierto i las sivdades del Iran fina ke alkansavan a la frontiera Rusa en Kazan. Los kamiones fueron enkargados kon komanya Amerikana, kon munisiones, armadas, partes de aviones “Studebaker”, i de mesmo kuero por los botes de los soldados Rusos i una grande partida de ropa para oydurear los uniformas de los soldados sovietes. Ansi Iran de echo se konvertio i parvinio a devenir una ayuda enorma a los sovietes kon la operasion yamada “Lend Lease” ke finalmente aseguro la viktoria de la II Gerra Mundial de los Amerikanos i los Inglezes…

Los Amerikanos fraguaron el kampo Amirabad en uno de los foburgos de Teheran. Ayi avia magazenes, ofisinas, ambares, ospitales i sentros rekreativos. Yo empesi a lavorar ayi komo daktilografa en una de las ofisinas, i estuve konsiderada por los Amerikanos komo un «indijeno- natal» (una inhabitante del pais). Termini mi lavoro en 1946. Kon mi konoser buena la lingua ingleza i la stenografia ke me ambezi, adelanti en mi lavoro ma verso la fin fue sorprendida ke un dia me yamaron de atestar i afirmar komo “orijinaria “ unos de los importantes dokumentos, kuando los Amerikanos devian entregar el kampo al Govierno del Iran i kuando los dos partidos, los Amerikanos de una parte i los del Iran, en el vero momento metieron sus firma sovre los papeles de la likidasion del kampo. Algo mas, vide ansi bilyetes de dolares de altas denominasiones, ke non egzisten mas, todos estampados en vedre, ke pasaron de las manos de los reprezentantes del Governo de Iran a los Amerikanos. Estos dolares, de altas denominasiones fueron utilizados en estos tiempos por estas transaksiones finansieras grandes. Despues el kampo paso de las manos de la Armada Amerikana al Governo del Iran, ke lo merko.

Durante mi empiego en Amirabad, tenia poko kontakto kon los soldados Amerikanos del servisio “Lend Lease” dado ke los «indijenos” fueron transportados kon otobuses desde el sentro de Teheran al kampo i atras a Teheran. Los otobuses mos asperavan en la manyana, estasionados en el sentro de la sivdad, serka de la Embasada Rusa. El dia en ke la famoza Konferensia de Teheran entre Churchill, Roosevelt i Stalin en 1943 tuvo lugar, el transporto de los otobuses fue suspendido. Ma de otra parte mosotros los eskapados djudios de la Evropa, ke biviamos en Teheran, fuimos enkorajados de kombidar los soldados djudios Amerikanos en muestras kazas para selebrar muestras fiestas endjuntos. Uvo unos 300 soldados djudios en Teheran. De mesmo tuvimos la permision de ir a ver de vez en kuando en el “Sentro de Sinema” un filmo. El Intendante Jeneral del Komando del Golfo Persiano fue situado en el kampo Amirabad en chikas barakas de tuvlas, kada una i una mas o menos de serka 10 kamaretas,

Siendo ke yo era muy timida, rekuerdo solo unos pokos de mis kontaktos kon el personel de los Amerikanos. Me rekuerdo del korporal de un otro departamento, ke azia el mesmo lavoro komo lo miyo i ke su ofisio estava al lado de mi kamareta. Era djudio i de vez en kuando me ayudava. Unos kuantos dias antes de su partensia a kaza, me arogo de irme kon el a merkar un tapetiko persiano para su espoza. Komo se save, las dadas son tomadas. Ansi unos kuantos dias antes de su retorno a los Estados Unidos, en uno de los dias kuando el estuvo libero, djuntos kon mi ermano desidimos de irmos a la Avenida de Ferdowsi, ande avia un grande magazen, komo un bazar, renomado por sus famozos tapetes persianos.

Era un lugar enorme, un bazar entapetado, kon un monton de grandes tapetes, uno amontado ensima del otro, sovre las tavladas, algunos enserrados en rulos aresentados de pie serka de los pilares de las salas i algunos otros, kelimes enkolgados desde de las grandas moviles. Tapetes persianos chikos, teshidos a mano i sus tipos se yaman sigun de los kazales ande se azen, komo Shiraz, Hamadan, o tapetes de tipos grandes muy finamente echos, se yaman sigun las sivdades komo Isphahan, Qum i Tabriz.

Kuando entrimos en el magazen, estávamos shashkin i asombrados de ver tantos tapetes otentikos, teshido a mano, en kolorado briyante, en blu o penbe, teshidos djuntos i entresados en una komplikada fechura de formasiones misteriozas. Tambien mos eksplikaron ke tapetes teshidos a mano pueden ser diferentes desde 16 a 550 anyudos por sentimetro kuadrado. La ovra de atar los anyudos no es solo una ovra muy desbolvida pero aumenta el presio del tapet sigun la densidad de los anyudos. En el magazen vimos tambien tapetes de seda enkolgados a la pared komo tapiseria, en lugar de ser utilizados komo revestimiento de las lachas.

Leo Sommer, ke era el nombre del soldado amerikano, merko a su satisfaksion un tapetiko. Para rengrasiarme, me prezento su “Diksionario de Winston” ke konservi i kulaneyo asta oy. Despues de su partida, eskuchi una vez de su espoza, dandome su agradesimiento i su adreso en New Jersey i despues de munchos anyos, resivi rensenyamientos de algunos ombres del servisio amerikano ke lavoraron kon mi en la baraka i ansi supe de la formasion de la Organizasion de los Veteranos del «Komando del Golfo Pérsiano” en la II Gerra Mondial.

El momento ke meldi el aviso en el periodiko sovre la reunion en Yerushalayim de los Veteranos, telefoni a la Sra. Attias, la organizadora de la Konvension. Avli lo ke prime i ke no prime, arogandola ke me embiye un kombite de partisipar a la reunion de los veteranos djudios ke eya organizo a kavzo del 60. aniversario del Estado de Israel.

No konti kuantos vinieron, ma me parese ke avia djentes ayedadas, kon sus famiyas i kreaturas, a lo menos 25-30 personas. Del grupo de los 300 soldados Amerikanos ke fueron embiyados de Amerika durante la gerra, solo unos pokos de eyos vinieron de Teheran a Israel, ma la reunion fue muy agradavle. Madame Attias ke tiene una ermoza kaza en Katamon, en Yerushalayim, kon un grande jardin, me aresivio kon brasos aviertos i mos konto de su tio ke era soldado amerikano en Teheran durante la II Gerra Mondial, i ke el se murio antes dos anyos.

Eya mos konto ke avia vijitado su tio munchas vezes en Amerika i ke el tuvo muncho suvenires de la gerra. Despues de su muerte, eya los arekojo, los tomo kon si a Israel, kon el fin de donarlos a un muzeo.

Despues me yevo a la otra kamareta para amostrarme el arekojo de su tio. Supito kualo atiro mi atension: Un tapet persiano. Me akodri del tapet ke merkimos por el soldado Amerikano en el bazaar de Teheran. Estuve sorprendida i empesi a riirme. Ansi Mme Attias me disho ke este es un tapet ke su tio merko en Teheran. El nombre de su tio era Leo Sommer. Sovre el tapet akolgadas munchas fotos, ande lo rekonosi, kartas i una medalya.

Solo un chiko tapetiko persiano ke me dio buelta munchos anyos atrás, ke avrio una pajina de mi vida. Inkreyívle, fantastiko. Ni en mi suenyo puedia imajinarme ke una koza semejante puedia akonteser. No pude detenerme de kontarle a Mme Attias del Leo Sommer, el soldado de boy chiko i un poko godriko, ke yo enkontri antes kaji 60 anyos en Teheran.

Algunas vezes los rekuerdos de una persona se enserran anyos i anyos en su meyo, para de un punto al otro desbrolyarse, i koryendo salir en medio. Siertamente esto me dio a akodrar las palavras de Ali Baba kuando yegó a la meara sekreta i disho «iftah ya simsin» – «Open sesame» o finalmente era el tapet bolando de «1001 Noche” ???

Rivka ABIRY / Haifa
Puvlikado en El AMANESER