eSefarad Noticias del Mundo Sefaradi
Por Rivka Abiry
El büfetiko
Oy se topa en munchas kazas modernas un lugariko para los empajos, ke sea en kamaretas chikas o grandes. Komo bivi en la mizma kaza mas de sinkuenta anyos, ya vos puedesh imajinar ke kon el tyempo en esta kameratika se metyeron todas las kozas empleyadas, uzadas, ke no pueden empleyarsen mas. Ama kualo se topa!!!!. Kon el tyempo no avia mas lugar para todos los empajos ke empesavan a tashtear fina ke apenas se puedia avrir la puerta. De otra parte es difísil separarse de eyos o echarlos. I no syempre se topa el tyempo apropriado.
Un dia vino la buena ora, porke los vizinos se desidaron a boyadear la kaza. Aferri dos mansevos del vizindado in en tres oras, enfrente de mi kaza, se formo una montanya de kozas viejas. Avia siyas, una meza, una radio antika, unos kuadros, kon i sin pinturas, un kanape, karosas de bebes, kutis yenos o vazios, validjas ke viajaron fina la China, livros, sestos, un bufetiko de la Bulgaria i mil i unas otras kozas viejas.
De mi ventana los pude ver i esperava ke la araba vedre del balukchi vinyera para
tomarlos. Unos kuantos dias los vide ayi, ma duspues pedri ilaka, fina ke un dia esta montanya desparesyo.
Entremyentes resivi una letra de un avokato de la Bulgaria. La letra me estava anunsyando ke kuando vendyo la kaza de mi tio, topo una letra para mi. Por medyo del Konsolato de Israel en Sofia, topo mi adreso.
La letra ke teniya una eskritura titireando dizia:
“ Kerida Rebeka,
Espero ke vaz a resivir esta letra. En mi vida amava las mujeres, bever, fumar, djugar kartas i viajar. Alkansi una vejes buena, i no me puedo keshar.
Tuve una mujer henosa i buena, ke me akompaniyo mas de sinkuenta anyos i me dyo una vida buena, kon muncha alegria. El solo regreto ke tengo es ke no tuve kreaturas. Tu eras mi sovrina preferida…
Kuando oyi ke te ivas a ir a la Medina, te rogi de tomar de mi kaza la mobilya ke te plaziya i me alegri ke eskojites el büfetiko chiko, ke ize yo mizmokon mis manos. Kuando los Bulgaros en el Sigunda Gerra Mundiala mos embiiaron a los kazales, yo meti en el dip de este büfe un sigundo kat i entre los dos kates eskondi 20 dukados de oro. Esto siguro ke los topates i ke tomates buen provecho de eyos. Esta es la erensya ke apronti para ti.
Ke me estes sana i saludoza. No me yores, solo akodrate de mi”.
Sinyado: Tu Tiyo Nissim.
Büfetiko, büfetiko, de kualo esta avlando el tio Nissim? Se le fuyo el meoyo?????…. Kualo esta afitando????.
Komo un relampago en un syelo klaro, entendi ke el estava avlando del büfe ke una semana antes aviya echado al esyerko. Me se tomo el meoyo…..Keshke ke no lo echara…. Ke enklavatina. ….Kualo ke aga agora? La araba del balukchi ya se lo yevo. Ya me arepinti del dia ke pensi a espajar la kamaretika chika .
Tuve el mazal de akodrarme de los dos mansevikos ke me ayudaron. Los bushki i les demandi si savian ken aviya tomado las kozas viejas. Me konsolaron en kontandome ke vieron komo uno de los imigrantes rusos, ke bive en la kaye muestra, tomo el büfetiko en su kaza.
Bueno, bueno, me alegri. Me hui ande Gregori, el ruso, i demandi ande estava el büfe. Me konto ke avia eskasura de paras para merkar “Vodka” i ke lo vendyo al
eskidji ke dolasheya en esta mahale.
Otro pipino|!!!!!!. Gregori konosia al eskidji, i me asiguro ke esto no era un problema. Me mando a kaza kon la promesa ke lo iva bushkar. Paso un dia, pasaron dos, paso una semana. Me se fue la gana de komer, las noches tuve koshmares, i me ize sert kon mi famiya. Teniya un bulto en el korasón… Kuando me disho de bushkar el büfe en los magazenes de los mobilyadjis en la kaye “Irak”, tomi un taksi.
Ay kuatro magazenes ayi. Bushki, bushki… En en tresero lo topi. Me se avrieron los ojos. Enturado de un divan grande, una meza i una soba, el poveretiko, mi büfetiko, entero enpolvado, estava yorando i demandandome de salvarlo. Pishin pagi los 100 shekel i kuando abolti a kaza kon grande adjele, arranki el sigundo kat, i ke maraviya!!! …..Topi los dukados.
Oy este dolapiko presyozo, ke entremyentes estuvo ande un dogramadji, se izo
“benadam”. Le metyo pachas muevas, boya mueva, i laka, i lo izo parlak. Agora se topa en la entrada de mi kaza, i los amigos miyos se selan kuando lo ven.
En ganeden ke este mi tiyo!!!
Publikado en «El Amaneser» No.47
