eSefarad Noticias del Mundo Sefaradi
El León estava mirando a tres toros echar los bofes en el kampo. Él avía mirado de atakarlos munchas vezes, ama por modo de ke se arrekojían en endjuntos, se podían protejar de él.
El León tenía poka esperansa de komerselos i entendía ke kon sus kuernos i unyas le podían azer muncho danyo. Ama él no podía deshar de mirarlos en el kampo porke sus ganas de un buen pranso lo interesava tanto, anke entendía ke avía poka posibildad de obtenerlo.
Un día, los Toros se metieron en pleto, i kuando se aserkó el León ambierto a verlos komo era su uzo, los vido muy leshos kada uno de los otros, todos en diferentes partes del kampo.
Ya era una okazión muy kolay para el León atakarlos uno por uno, ke lo azía kon muncho plazer i muy satisfecho por, por fin, pransearse.
Unidos somos más fuertes.
Roz de St. Louis, Michael de NY i Aaron de DC
Fuente: Ladinokomunita
