LA SAVOR DE PENSAR A LO KE BIVI… por Sal Amira: SELESTIYAL PASADO

Anyo 1943

Oy en diya mi nono en la sivda se yama ARABACI YAKO EFENDI. Tiyene una araba/chariot ko doz ermozos i saludozoz kavayos. Se topa ande ez el kamyonero de loz merkantez dela sivdad.

Loz amigoz de mi papu se burlan amigavlamente dizyendole : ANDE SE TYENE VISTO UN LEVI ARABACI KON KAVAYOZ !

La verda ke nunka me olvidare estaz rizas de miz anti pasados ensenyando/mostrando la blankor de estos maraviyozos diyentes ke tyenen debasho de sus mustachos a la turka.

El tiyo de mi padre NISIM AMIRA el syego, el moledor de kave/kafe de la sivda moliya kave a todoz kon una makina moderna manual…regalada por muestra komunidad. Manteniya a su mujer i doz ijaz komo un rey…..YO ESTO ENAMORADO DE SU IJA LA CHIKA FLOREZIKA ahhhhh.

Tambien el tiyo NISIM aze el hazan de muestra keila.

Una de laz kayez ke eskapan enpesando de mi kaza en su koshe/eskina ez el banyo Turko. Loz viyernez dospues de yevar laz komidaz a loz viyejos vo al orno de mi padre i de ayi moz vamoz enjuntoz al hamam/banyo turko para limpiyarmoz i tomar Shaba. Asta la edad de 6 anyoz me iva al banyo kon mi madre ama dospues de esta edad no me desharon entrar kon laz mujerez.

Kuando iva kon mi madre al hamam viya munchaz kozas maraviyozas, komo kuando trayiyan a la novya para prepararla para su boda.

TAMBIYEN SE AZIYA SEMEJANTE AKTO AL NOVYO <<<AMA SE TRAYE VINO I RAKI.

El banyo tyene un kurtijo grande kon una meza larrrrga. Siyaz para loz ayedadoz. Se sirve borekas, bulemas, kezoz maraviyozos echo de los artizanes Sefaradim de loz kazalez serka de la sivda….Dulses a laz mil maraviyaz Siiiiiiii !

La famiya del novyo i la novya preparan todo i el apetito es enorme en este sentimyento

Sal Amira
CANAKKALELI, EN MIAMI USA.

Remgrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.

Fuente: Publicado en Sefaradimuestro – https://groups.yahoo.com/neo/groups/Sefaradimuestro