eSefarad Noticias del Mundo Sefaradi
SALAMONIKO AMIRA EN AGUSTOS/15/1945… EN CANAKKALE.
Oy de muy temprano del diya mi ermaniko i yo le estamos ayudando al tiyo NISIM el syego, para aboltar la palanka de la makina de moler
kave.
Tambiyen esto viyendo ke estan estalando una makina de moler kave de ELEKTRIK kon un motor bastante grande kon un kushak/belt de piyel para darle vuelta la makina.
La ideya es, mos konto el tiyo Nisim, ke van a moler kave i van empaketarlo el molido i venderlo al publiko .
La ideya de moler el kave i venderlo al merkado fue una ideya del tiyo Nisim i fue el primero de originar esta ideya. Ahhhhhhh ke orguyozo
so de mi jente ke saven salir kon estas ideyas orijinal .
El establesimiyento del tiyo NESIM esta en frente del porto prinsipal de la sivda. Estamos vyendo el vapor merkante trampa ke se estava aserkando al liman /port. Pishin a korer kon el permiso del onkli, i ver ke lo van atar a su puesto. Ke maraviya azer esta aktivida de todos ke
estavan lavorando en este projekto.
En supito oyimos la boz de mi papu YAKO LEVI salyendo del barko.
– SALAMOOON
– YAKOOOO.
Kon ke alegria saltimos kon muestros brasos al ayre. Mersi senyor del mundo…
Si es mi papu gritando, kon sus mustachos tan grandes ke se pueden enkolgar en el un peyne grande de alimpyar piyojos de los kaveyos.
Papu kayo a sus dizes/rodiyaz, j kon munchaentileza mos abraso kon sus ojos yenoz de lagrimaz…>>> EL SENTIMIYENTO KE TENGO AGORA EN MI SER VA KEDAR EN MI ISPIRITO TODA MI EGSISTENSYA….
Papu yego kon una sola torba/bag. Se nota ke no se iva kedar muncho tyenpo. Mos ekspliko ke manyana por la manyana, mozotros los tres,
saliyamos kon runbo a Estanbol kon el mizmo vapor ke el vino.
Papu, antes de todo fue a vijitar al tiyo NESIM i su famiya, mujer i dos ijas ke ayudan en la molidera. De la ijika grande ke tyene mi edad
ya vos digo ke esto enamorado komo un bulbul/pasaro de kante.
En la avenida de los judyos/yahudi sokagi todos los merchantes salyeron gritando .
– YAKOOOO YAKOOO.
Komo ver a un rey… siii el tambiyen era el parnas de muestra selestiyal keila.
Dospues entendi ke el borekchi Eliyezer Sarfati fue de puerte en puerte para avizar a los merchantes ke mi papu vino i estava pasando por la JUDERIYA.
En kamino vimos al onkli Somoel agora vendyendo dondurma/yelado/icecream kon su vagoniko kon ruedas de bisikleta ke mi papu ke esta en AMERIKA se las teniya mandado.
Eyos diskutyeron ke manyana saliyamos los tres kon rumbo a ESTANBOL…
Sal Amira
CHANAKKALELI, EN MIAMI USA.
Rengrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.
Fuente: Publicado en Sefaradimuestro – https://groups.yahoo.com/neo/groups/Sefaradimuestro
