eSefarad Noticias del Mundo Sefaradi
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, kada mes va a partajar kon todos mozotros sovre variados temas desde su punto de vista djudio i sefaradí.
Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita
«Turkia» – nuevo livro (en ebreo)
El Instituto Yad Ben Zvi en Yerushalayim ya avia publikado diez volumes grandes en una seria de livros sovre «las komunidades judias en el oriente». Todos akeos volumes se dedikaron a komunidades de judios en paizes arabos komo Irak, Ejipto, Maroko, etc. Esta vez, el onzen livro, mos da una panorama ancha de los prosesos istorikos, sosiales i kulturales de los judios en Turkia en los siglos 19 i 20.
Mas ke todas otras komunidades judias en el oriente, la juderia de Turkia era grande, pluralista i eksuberante. Asta la primera gerra mundial, las komunidades judias en el pais eran el sentro de la juderia otomana. Ma kon la fondasion de la Republika enkavesada por Ataturk, empesaron a notarsen muchos sinyos del trokamiento en el rejimiento de la vida: Las eskolas de la «Alliance» trusheron aires muevos de edukasion evropea, i eventualmente, el movimiento del Sionizmo kavzo un kambio enorme en la atitud de la djoventud verso las kostumbres sefaradies i afilu sovre la tradision judia en jeneral. De aki endelantre empesaron a menguarsen las komunidades judias de Turkia por kavza de una imigrasion masiva de los djovenes, a la direksion de las Americas, Fransia, i Erets Yisrael.
En uno de sus artikolos en el livro, eskrive el Dr. Yaron Ben Nae sovre el atadijo a Erets Yisrael ke egzistiya entre los judios de Turkia.
El apunta ke desde el siglo 16 asta el anyo de 1917, la Tierra Santa fue una parte del imperio otomano. Despues, durante los 30 proksimos anyos, domino el Mandato Britanico, i desde 1948 egziste un Estado independiente yamado «Israel».
Mientras ke en el siglo 19 el atadijo de los judyos de Turkia fue ekspresado en forma de kontribusiones en favor de la populasion prove del paiz, o tambien pelegrinaje i kontaktos a baza de relijion, todo esto se troko enduna kon la fondasion del Estado de Israel, i milarias de imigrantes de Turkia desidieron a vinir i instalarsen el el muevo Estado.
Es kuriozo, ke durante muchas jenerasiones, los judyos de Turkia eran los lideres de los sefaradim ke bivian en Erets Yisrael, i tambien se kontavan komo una parte muy importante en la populasion lokala en jeneral; la lengua Judeo-espanyola se empleava i se avlava en la vida kotidiana en kaza i en publiko.
Ma, malorozamente, los judyos sefaradim en Erets Yisrael perdieron la egmonia desde el tiempo del Mandato i al pareser se esvachearon de tener una reprezentasion remarkavle en la vida politika del pais.
Naturalmente ke en este espasio vaziyo entraron dirijentes i ombres publikos, judios venidos de Rusia, Polonia, etc.
En el livro, editado por Yaron Ben Nae, ay artikolos interesantes
sovre todos los aspektos de la vida judia en Turkia: la muzika i los kantes, la kuzina sefaradi, el idioma tradisional, los donmes, el umor tipiko, las konsejas, i ayinda mas i mas temas.
La intension del editor es de kontinuar i publikar un otro livro en la seria ke sera dedikado a las komunidades judias en Gresia, i espesialmente sovre la komunidad de Salonik, «Sivdad Madre de Yisrael».
En mi opinion, estas ovras son muy importantes no solamente por meldar pasadias de estoria, aun ke importante en si mismo.
Los artikolos en el livro mos amostran el grandor de la erensia kulturala de los sefaradim, i indirektamente mos dan mas animo i konfiansa en muestra erensia. Malgrado la influensa del krizol kultural en Israel (i talvez en otros paizes tambien) ke a vezes funksiona kon agresividad, kale ke konoseremos i rekonoseremos todos mozotros el trezoro kultural sefaradi, el kual ay ke pasarlo a las jenerasiones futuras.
Por terminar, me atrevo a dezir ke la situasion politika aktual entre el governo de Israel i el governo turko, no tiene de azermos olvidar o niegar el fato ke durante sienes de anyos bivieron muestros antepasados kon trankilidad relativa, protejados basho las alas de los sultanes del Imperio Otomano.
Ayinda tendremos la esperansa ke el sol briyara aun ke agora el sielo parese nuvlado.
Yehuda Hatsvi
Erets Yisrael
