Kuento MIS KUKLAS de Myriam Eli – Uno de los ganadores del KONKURSO DE KOMPOZISION 2025

Los revolusionarios tomaron poder del governo dospues de la gerra i todo troko. Ya no avia libertades. El governo tomo todos los negosios, las eskolas, las paras de todos i muncho mas, i avia poka komida. Tres anyos mas tadre, mis paryentes desidaron a partir. Uno de mis avuelos ya morava en El Norte (ansi le dizian a los Estados Unidos de Amerika). Resivimos los permisos un anyo dospues de demandarlos. Yo era una ninya chikitika, i mi ermaniko Rafi era dos anyos mas grande. Kuando supimos ke solamente mos permitian yevarmos un vistidiko i un djugetiko, mos izimos muy tristes.

Yo tenia mas o manko sesh kuklas, i tenia ke eskojer una. A todas las keria bien. Mi favorita era una en forma de bebe de goma, ama le mankava un brasiko. Yo no me akodro nunka ke eya tuvo dos brasos. Yo la keria muncho bien. No tenia ropa, no tenia kaveyos i ya estava viejika. Era godrika i por esto, yo la yamava “la godri”. Ama tenia otras mas muevas i lindas. El payiz avia importado kozas de la China, i mi padre me regalo una ermoza kukla kineza kon el kostyum tipiko de la China i kon sesh trensas. Era la mas ermoza de todas. Tenia una de puerpo de bebe ama vistida de novia kon el fostan blanko i el velo. Tenia otra chikitika chikitika, tambien vistida de blanko.

Esta era blonda i linda. Las meti a todas sovre el divan para eskojer i empesi a yorar porke tenia ke deshar atras a kuaji todas. No savia kuala eskojer.

Mi ermano estava espantado porke no podia yevar todos sus soldadikos: los de Robin Hood, los guardias britanikos kon los chapeos altos, i otros, kon los kualos djugavamos endjuntos siempre. No djugavamos a la gerra. Djugavamos a la vida, komo merkando komida, vijitando a los vizinos. Entonses metio a sus soldadikos favoritos en una bolsika plastika i la ato, a ver si podia pasarlos a todos komo un solo djugete.

El dia antes de partir estavamos en la kaza de mis avuelos endjuntos kon los tios i primos para despartirmos sin saver si ivamos a vermos de muevo algun dia.  Yo avia eskojido la novia i la chikitika blonda, ama no savia por kuala desidarme.  Yo tenia una chanta chikita de paja i mi primo, Djulio, sinko anyos mas grande ke yo, me disho, “No te merekiyes!”  A la chikitika le duvlo las pachas para arriva i la metio aldyentro de mi chanta.  Kavia perfektamente i me disho ke ansi no la van a ver.  Mizmo si sintia miedo, desidi de yevarmela ansina i tambien la novia, las dos.

Ansina, komo si izieramos kontrabanda de djugetes, mi ermano i yo kitimos a muestros djugetikos del payiz i partimos para El Norte.  Mi padre savia ke yo me eskarinyava de la kukla kineza, i pishin, para mi aniversario, me merko dos kuklikas kinezas, una mujer i un ombre, vistidos en sus kostyumes kinezos i kon trensas.

Kuando mi ermano se engrandesio i se fue de la kaza a bivir solo i lavorar leshos, ya no tenia sus soldadikos.  Ama topo unos mizmos en un magazen en Nu York. Estava tresalido de alegria, i los merko.

Agora munchas dekadas dospues, yo ya no tengo las kuklas ke trushe de mi payiz.  Ainda tengo la chanta. Esta viejika ama la kero muncho bien. Tambien ainda tengo los kinezos ke mi padre me merko dospues de partir.  Estan viejikos i kijiera restorarlos.  Tuve munchas kuklas de kaveyos roshos porke mi padre tenia kaveyos de esta kolor, ama ya no las tengo. Mis paryentes i mi ermano, i mizmo mi marido, kontinuaron a regalarme kuklas.  Por esto, agora tengo otras kuklas.  Entre estas estan el Pierrot de Paris, la eskimal de Montreal, i otras komo animalikos inchidos de “peluche”, los lonsikos, el flamingo. Las miro todos los dias i me siento kontente porke todas se sonrien i me akodran de mi ermoza famiya.

Autor
Myriam Eli
USA