En vista de Rachel: Una retorno de buena voluntad: Vijita del Granrabino Moshe Amar en Espanya

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

Una retorno de buena voluntad: Vijita del Granrabino Moshe Amar en Espanya

En los primeros dias del mez pasado (junio, 2011) el Gran Rabino Sefaradi de Israel, Shelomo Moshe Amar, izo una vijita ofisial a Espanya, ande fue resivido kon onores en varias sivdades.  En Granada, estuvo en el palasio de Alhambra,  ande 519 anyos atras fue  sinyado el Edikto de Ekspulsion, ke trusho fin a la vida djudia del pais.

Granada, sivdad de orijin de mi famiya, dainda se topa vaziya de djudios.  Para el Granrabino, las otoridades kerian azerle un pranso de medyo dia,  ma si komo no ay fasilidad de preparar komida kasher, izieron un simple piknik en la ermoza guerta del Alhambra, kon poko mas de humus, biskochos enpaketados.  

Topi muy enteresante lo ke disho el haham Amar por esta modesta komida:
“Pasharos no komen kasher. Si un lugar no tiene djudios, no puedes esperar ke tenga los medios menesterozos para satisfazer los uzos de komer de djudios.”

Yo kreygo ke estos biervos  reflekta el komportamiento tipiko Sefaradi –  de akseptar la situasion aktual kon grasia i respekto.   I ansi fue su komportamiento en el resto de su vijita tambien.  Alugar de kesharse de lo pasado, el avlo por lo ke ay de bueno oy, I por el avenir, i ke su vijita reprezenta una rekonsilasion kompleta entre los judios i Espanya.  Por el Edikto de Ekspulsion, el disho ke no demandamos su anulamiento porke no tiene dinguna aplikabilidad oy, i ke  “devemos lavorar para al avenir, i no mirar a lo pasado.”  Disho ke Espanya puede ser oy una “almenara” de refujio para judios de la Amerika Latina ke se topan en estrechura.

En estando en el Ayuntamiento (la Munisipalidad) de Granada, asentados en un salon dekorado kon pinturas relijiozas sovre la vida de Jezukristo, el Granrabino Amar  le disho al Alcalde (mayor) José Torre Hurtado : “Vemos agora ke esta sivdad es yena de luz de saviduria, libertad, i esplendor, ” i adjusto: “Yo konsidero esta vijita muy espesial, porke despues de tantos siglos, estamos borrando la eskuridad ke kuvria muestras relasiones.”

En Espanya oy, un pais de 47 miliones de personas, biven solo unos 40.000 judios – una chika porsion de los 200.000 (o mas) ke avia antes de 1492.  Algunas enkuestas amostran ke 46% de la povlasion espanyola tiene “sentimientos negativos” kontra judios.  La vijita del Granrabino Amar fue aranjada por Casa Sefarad-Israel, una adjensia del governo espanyol para estableser buenas relasiones kon los djudios del pais i del mundo, i tambien kon Israel.   Asegun sus statistikas, las opiniones kontra judios de los espanyoles ya kayeron a 34,6%.  Esto dainda es muncho, ma no ay duda ke tiene ke ver kon la mankura de konosimiento de judios I judaismo, i kon opiniones politikas tambien. 

En los ultimos anyos vemos una pujita grande en Espanya de aktividades para dar a konoser la estoria I kultura djudia, I para fomentar amistad entre los puevlos de diversas relijiones ke oy demuevo koegzisten en Espanya.   En Mayo, en la isla de Majorca, por la primera vez se izo una komemorasion, organizado del governo,  para los djudios (o Chuetas akuzados de “judaizar”) ke fueron kemados en Palma en 1691.  “Fue muestro mas grande pekado” disho Francesc Antich, prezidente rejional de las Islas Balearikas, por las 37 personas matadas, 3 de eyas kemadas bivas.  En la seremonia estava prezente el Rabino Joseph Wallis de Israel, desendiente de Rafael Valls , uno de los kemados. Ma el Sr. Altich no demando pardon por el “pekado grande” de 1691, ni era menester.  El akto de komemorasion era en si un akto de rekonsiliasion. Los pekados del pasado no apartienen a la jenerasion de oy.

Ansi ke tambien el Granrabino Amar no akuzo a dingunos por el pekado grande de 1492.  Komo un halis Sefaradi, miro a topar lo bueno, I dar fuersa a los pasos para estableser buenas relasiones entre paizes, i entre personas. 

Mientres ke el Granrabino estava adientro del Ayuntamiento en Granada, afuera avia una demonstrasion grande, kon bandieras ke kondanavan la korupsion politika I el otoritarismo en el governo. No tenia nada ke ver kon djudios.   Ma el bienestar del puevlo espanyol sera siguramente esensial para eliminar el prejudisio entre puevlos, i estableser paz en el pais.

Rachel Amado Bortnick