eSefarad Noticias del Mundo Sefaradi
Ver todos los artículos de esta sección >>
Estamos en el 84en aniversaryo de los eskuros dias (16-17 Julio 1942) del «Rafle du Vél’ d’Hiv” en Paris, kuando la polisia arekojo i enserro a 13,152 djudios (entre eyos 4,115 kriaturas, i 5,802 mujeres) en el Vélodrome d’Hiver (o Vél’ d’Hiv) un stadyum serrado kon tavan de vidro. Lo mas de estos djudios eran suditanos de paizes ekstranjeros, o sin nasionalita (entre eyos sefaradim venidos de paizes del eks-imperio otomano) ke se avian establesido en Fransia kon la esperansa de topar repozo i salvasion!.
Despues de pasar 5 dias en Vél’ d’Hiv, kon kalorina de murir, kaji sin kumida o agua, o menesteres ijienikos, empesaron las transportasiones a kampos de transito komo Drancy, i de aya al kampo de la muerte de Auschwitz, de ande solo muy pokos salieron bivos. Ya savesh la estorya.
La famiya de mi esfuegra (suegra), Cecile Berline, dbm, avia venido a Paris en 1914 de Zaparojie, Rusia (agora Unkrania). Cecile tenia 9 anyos, su ermanika 5, i otro ermaniko nasyo en Paris. La Rusia no era bueno para djudios, estava en alboroto revolusionaryo, i Simon Berline (el padre de Cecile) tenia esperansa de tener una karyera de aktor de teatro en Paris. Ma poko después ke yegaron a Paris, empeso la Primera Gerra Mondial.
En kurto, sus vida en Paris fue una de provedad, i despues de eskapar la eskola primaria, Cecile empeso a lavorar en un studio fotografiko, i se izo una manseva halis Parisiana. Siendo ke ya tenia una buena kariera, desido a vinir a l’Amerika, ande el tio (ermano de su mama) ke tenia en Chicago. El plano era ke despues de topar lavoro i ganar paras, iva embiyar bilyeto para ke el resto de la famiya vinyeran a l’Amerika también.
Cecile no solo ke topo lavoro, ma también en kurto tiempo konosyo a Joseph Bortnick, nasido en Rusia, i se kazo. Paras no era problem, ma entre mientres en Paris, Rissa, la ermanika de Cecile, se avia echo balerina profesionala, i estava ganando bueno, i el ermaniko estava en eskola, ets. estuvieron atrazando la data de salir de ayi. A su ermaniko Victor lo tomaron a l’armada franseza kuando empeso la Sigunda Gerra. Letras fueron i vinyeron, asta ke se kortaron en djulio de 1942. Sin alargar muncho esta estorya muy trajka, vos dire ke mi esfuegra nunka mas vido a su padre, madre, o ermana.
Despues ke se eskapo la gerra, le vino un telegrafo de Paris. Era de Victor, en kurto diziendo : “ya torni a kaza, ma no se ande estan mama, papa, et Rissa.”
Victor fue prizonyero de gerra de los almanes, i sovrebivio porke no supieron ke era djudio.
Solo despues de anyos de korespondensia kon la Kruz Kolorada i diversas embasadas, ets. mi esfuegro topo ke Rissa i su madre (Louba) fueron deportadas en Septembre 1942, i matadas imediatamente en arivando a Auschwitz. Simon Berline se suisido antes ke lo aferraran.
Vos meto aki la foto de la pintura ke izo mi marido (Bernard Bortnick) en memoria de su tiya Rissa Berline, ke nunka konosyo. El imajen de Rissa es basada en una fotografía suya. I las rayas de treno i la data no es menester de eksplikar.
Dishimos NUNKA MAS, i demuevo después del 7Okt. 2023, i kontinuamos a bivir i rogar kon esperansa…
Rachel Amado Bortnick
Dallas, TX
Fuente: Ladinokomunita
