En vista de Rachel: Una ojada al anyo 2012 en LK, i esperansas para 2013

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

Ver todos los artículos de esta sección >>

Una ojada al anyo 2012 en LK, i esperansas para 2013

Viendo ke se uza azer un bilancho del anyo ke paso (komo Edmond tambien lo aze kada anyo, i izo tambien por sus emisiones de 2012) i yo desidi de akodrarmos de siertos evenimientos emportantes en Ladinokomunita. Aki lo ke me vino al tino, ma si vos akodrash de alguna koza ke no noti yo, vos rogo de embiyarmos a dezir.

1. En primero los tristes
Kreygo ke devemos akodrarmos de las volorozas i valutozas personas de muestra komunidad sefaradi mundial ke mos desharon la buena vida en 2012. Ke esten en ganeden i ke sus memorias sean para muestras bendisiones. Kada uno de eyos era un trezoro de lasaviduria, vida i lengua sefaradi, i nunka se puede remplasar. Aki estan los ke notimos en LK en 2012:

• Rebecca Camhi Fromer (1 enero, en Berkeley, California) nasida en Los Angeles, de padres de Salonik i Monastir. Eskrivana i poeta, amiga mia i de otros en LK.
• Rosina Karako Smeraldi (21 marso, en Florida) Nasida en Bulgaria, kresida en Estambol; muestra kerida moderadora de Ladinokomunita, ke por mas de dies anyos animava muestras korespondensias. (Komo ke mos viene a mankar, kada dia!!!)
• Ezra Venturero (12 Avril, en Estambol.) Ezra era el prezidente de la komunidad de Bursa, i mos avia aresivido i giyado al grupo de LK en 2008 kon gran amjenerosidad i jenerozidad.
• Sarah Golub Konfino (en Paris, 28 Junio) nasida en Cornabat, Bulgaria. Era la muy amada sekretaria de la Asosiasion Vidas Largas en Paris. –
• Henry Levy (7 julio, en Connecticut) nasido en Salonik, sovrebiviente de los kampos Nazistas.
• (19 Sept. en Estambol) la madre de muestro moderador Moshe Gormez
• Yosef Malki (2 Augusto, en Israel), nasido en Milas, Turkia, tio de muestra amiga Medi Malki.
• Daisy Alalouf Newell (3 Okt. en Florida) La kerida amiga de todos en LK, nasida en New York en 1920 de padres de Salonik.

Mas por dingunos no!
2. De lo muncho i lo bueno

– En 2012 se adjuntaron 162 muevos miembros a Lk, i en este momento estamos en 1415 miembros. Entre eyos esta el mas djoven miembro, Robert Rogers-Fett, de la edad de 12 anyos, ke se inskrivio en presipio de novembre. El va azer su deskorso de bar mizva sovre ladino, i me eskrivio a mi en inglez, i me demando kestiones, todas muy buenas, sovre muestra lingua, su emportansia, i la emprtansia de mantenerla. Siguro ke le respndi kon plazer, i agora – aun un poko tadre, le digo un grande BIENVENIDO a muestra komunidad virtuala.

– Kontinuimos kon muestros mesajes en LK a anchear muestra konosensia de biervos i dichas en muestra lingua, muestra istoria, muestra relijion, i mas.

– El viaje anual de LK fue a Bulgaria i Grecha, ande komo siempre, sefaradim de diversas partes del mundo tuvieron la oportunidad de konosersen personalmente de parte a parte.

– Ladinokomunita fue un instrumento de inspirasion i apoyo para djovenes de la universidad de California en Los Angeles (UCLA) para formar UCLadino, el grupo de estudiantes avansados ke se enteresan en la lingua i kultura djudia espanyola. UCLadino tuvo su primer kolokio akademiko (i tambien avierto a la komunidad) en Marso de 2012, ande Alicia Siso Raz i yo (RAchel) dimos konferensias, Alicia sovre Haketia.

– Ladinokomunita kumplio sus 13 anyos de aktividad; muestras ermanas publikasiones: Aki Yerushalayim, la primera revista de su jenero enteramente en djudyo espanyol, kumplio sus 33 anyos de publikasion; El Amaneser, el mensual editado de muestras amgias Karen Gerson i Guler Orgun, kumplio (en marso) su 7 anyos; el boletin elektroniko eSefarad (editado de muestros amigos Liliana i Marcelo Benveniste)kumplio 4 anyos de maraviozos anunsos i artikolos diarios sovre el mundo sefaradi; i Diyalog, la revista dijital de los Judios Turkanos de Izmir, kon artikolos en turko i ladino de Izmirlis, inyetos de Izmirlis, i otros sefaradim del mundo entero, kumplio tambien 4 anyos de publikasion. A todos, vidas MUY largas ke tengan!
3. Planos para 2013

– El viaje anual de LK sera a Portugal en Mayo, si kere el Dio. (El enteresado ke eskriva a Rita <cesanatevah@hotmail.com>.)

– UCLadino va tener su segundo kolokio en 5 i 6 de Marso. Ver detalyos en: https://sites.google.com/site/ucladino/

4. Esperansas para 2013

– Ke los ke estan desrepozados van a topar refua shelema presto. Haim Vitali Sadacca, muestro kerido poeta, ke ya esta indo para mijor, i Robert Cohen (ke eskrive kon el nombre Cobert Rohen). Mos vienen muncho a mankar en estos dias, ma vamos asperarlos aki para kuando van a retornar a eskrivirmos. (I si ay alguno mas ke esta pasando oras fuertes i no savemos, rogamos refua por eyos tambien.)

– Ke todos los miembros de LK i sus famiyas esten sanos i rezyos, tengan alegrias, i bivan en kontentes, kon paz para todos.

– Ke LK kontinue kresyendo i enfuertesiendo el konosimiento de la lingua i todos los otros aspektos del sefaradismo.

Rachel Amado-Bortnick
Dallas – Texas
Fondadora de Ladinokomunita