eSefarad Noticias del Mundo Sefaradi
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.
Ver todos los artículos de esta sección >>
Testigo de 1391: La Letra de Hasday Kreskas
Los akontasimientos en la istoria umana los podemos meldar en livros I artikolos de investigadores, ma mos esmoven muncho mas, kreygo yo, kuando son kontados de parte de los ke los vieron i los bivieron, sea de boka, o sea en eskritos komo memorias, diarios, letras, ets.
Un testigo de los masakros de 1391 en Espanya fue el rabino Hasday Kreskas (Hasdai ben Yehuda Crescas) ke bivia en Barcelona. Kreskas eskrivio ovras sovre ley, talmud i filosofia, entre los kualos el mas grande es Or Adonay (Luz del Dio). Tambien, en una letra ke adreso a la komunidad de Avignon, Fransia, el deskrivio los masakros de djudios de 1391 en Barcelona, en “el amargo i espantozo dia de Tammuz,” de una manera emosionante. Esta letra se konose por ser inkluida en el livro Shevet Yehuda de Salamon ibn Verga, ke el mizmo vido las persekusiones i masakros en Lisbon en 1506, I en el livro konta de las persekusiones de djudios asta su dia. Es de notar ke la primera edision de Shevet Yehuda fue imprimida en Edirne (Adrianople), Turkia.
Aki vos do algunas partes de la letra de Hasday Kreskas, en mi traduksion adaptada del inglez ke topi en dos manaderos: el livro de Yosef Baer de la istoria de djudios en la Espanya Kristiana[i] i un artikolo viejo del Jerusalem Post ke tenia guadrado.[ii]
“Al sigiente Shabat, el Senyor (el Dio) vertio su ira komo fuego I desakro la komunidad de Barcelona. El numero de muertos yego a 250.
El resto se fuyeron al forte (kastilyo fortifikado) ande toparon refujio mientres ke los enemigos sakearon las kazas djudias i metieron fuegos. Las multitudes despues atakaron los djudios en el forte kon arkos i katapultas i los aharvaron i los mataron aya en la torre.
Munchos murieron komo martiros, entre eyos mi ijo aregalado ke era rezin kazado… Munchos se suisidaron, algunos en saltando del forte abasho. Antes de yegar a la tierra, sus puerpos eran totalmente despedasados. Algunos fuyeron Ifueron matados en la kaye.
I todos los otros trokaron sus relijion. Muy pokos se salvaron en fuyendosen a kazas de nobles; una kriatura los podia kontar. I por muestros munchos pekados oy no se topa en Barcelona ni una persona konosida komo djudio.”
Despues de la destruksion de la komunidad de Barcelona i de tantas otras sivdades espanyolas, Kreskas dediko vida a la rekonstruksion de la komunidad djudia. La ovra mas konosida ke eskrivio en esta epoka, es un “tratado” ke ekspoza I refute las doktrinas kristianas prinsipales. Eskrito en Katalan en 1398, el orijinal no egziste, ma egziste una traduksion al ebreo de Yosef ibn Shem-Tov (murio en 1480) kon el titolo Bi?ul I?ere ha-Notsrim (Refutasion de los Prinsipios Fundamentales de los Kristianos.) En este, es klaro ke el buto del livro es konvenser a los djudios de no akseptar el kristianismo, I de konvenser a los konversos de retornar al djudaismo.
Asta su muerte en 1410 o 1411, Crescas fue el giya spiritual de los djudios de Espanya.
Rachel Amado-Bortnick
Dallas – Texas
Ladinokomunita
Hmmm no quiero ser negativo. Pero el que escribio esto sabe español?. Bueno solo queria llamar eso a la attencion…. B’H
Moshe, esto está escrito en ladino. Que le resulte extraño es porque aunque con base castellano es otra lengua, la lengua de los sefaradíes. Al parecer usted no conoce la lengua y por eso le llama la atención.
Saludos cordiales
Liliana
eSefarad
Grasias, Liliana, por responderle a Moshe Ramos. Su komento, ke mostra ke dainda oy egzisten personas ke no konosen la egzistensia de la lengua sefaradi.
Rachel