En vista de Rachel: “Sephardic Jews in America: a Diasporic History” – livro ke mos avre los ojos a la istoria de los Sefaradim en los Estados Unidos

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.  
 
 

“Sephardic Jews in America: a Diasporic History”: livro ke mos avre los ojos a la istoria de los Sefaradim en los Estados Unidos 

Ke izieron los sefaradim ke se fueron a la Amerika del Imperio Otomano en el prensipio del siglo XX?  Komo fueron resividos por los Judios ke ya estavan aki? Komo se adaptaron a la vida I la lengua mueva?

Antes de avlar del livro “Sephardic Jews in America: a Diasporic History”, ande esta la repuesta detalyada, devo aklarar -espesialmente para muestros lektores de la Amerika latina-  ke “la Amerika” en este artikolo i en el livro sinyifika los Estados Unidos de la Amerika – U.S.A., i no el kontinento amerikano. 

Son pokos los livros dedikados enteramente a la istoria de los imigrantes sefaradis en la Amerika.  Los primeros, uno del rabino Marc D. Angel (“La Amerika,” publikado en 1982) i otro de Joseph M. Papo  – d.b.m. (“Sephardim in Twentieth Century America,” publikado en 1987) ya no estan mas en impresion.  I de todo modo,  estos tienen un diferente “focus” uno del otro, i del mas muevo livro, ke es “Sephardic Jews in America: a Diasporic History” de Aviva Ben Ur (profesora en la Universidad de Massachussetts en Amherst), publikado en  2009 por New York University Press. 

Este ultimo no es una istoria “linear” de datos kronolojikos, si no ke una istoria de las difikultades i los desafios ke enkontraron estos imigrantes, de un lado para adaptarsen al ambiente muevo i de otro lado para mantener sus identidades i sus lingua sefaradi. 

Mientres ke la lingua, el judeoespanyol (en inglez se yama Ladino) les impedia de ser akseptados komo djudios de parte de los ashkenazim (ke avlavan yiddish), les ayudava topar  aki una simpatia de parte de los espanyoles kristianos.  Un kapitolo del livro,  titulado “The Hispanic Embrace” (el abraso ispano), trata de las relasiones amigables kon los espanyol-avlantes en New York, lo mas de Puerto Rico, del entereso de akademikos i linguistos espanyoles en la lengua, i el aserkamiento entre sefaradim i espanyoles.  Aki tambien topamos una seksion sovre los “cripto-judios” del sudueste ke kreyian ser de las mismas raises iberikas de estos djudios ladino-avlantes, i un analisis imparsial de los faktos istorikos en el fenomeno de kripto-judaismo.  

El anyo 1492 es konosido anchamente komo el del deskuvrimiento del kontinento amerikano por  Kristof Kolomb (Cristobal Colon) I en su kinsentenaryo uvo aki grandes selebrasiones. Aunke entonses uvo tambien un poko de prensa sovre “el otro 1492”, ke es la ekspulsion de los djudios de Espanya, muy poko se mensionaron los sefaradim en la Amerika, i sus estorya keda dainda jeneralmente deskonosida en este pais, mezmo entre los djudios.  Por esto es un plazer grande de ver en luz  “Sephardic Jews in America: a Diasporic History”, un livro fasil a meldar de una punta a la otra, komo una estoria fasinante, porke esta eskrito kon grande simpatia a los sefaradim, i kon muncho apresio de sus kultura.  Espero ke este livro sera traduizido en otras linguas serkamente tambien. 

Vos rekomendo de ver una entrevista (en inglez) kon la autora sovre su livro en: J Report #24 – Sephardic Jews and Ladino

Rachel Amado Bortnick