En vista de Rachel: Para munchos anyos!

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.  
 
 

Para munchos anyos!

En mi ultimo artikolo de 2010 eskrivi por dos aniversaryos istorikos en 2010, los 500 anyos del nasimiento de Dona Grasia Nassi, la ekstraordinaria mujer djudia, i los 150 anyos de la fondasion de la Aliance Israelite Universelle, ke fue responsible de la edukasion de munchos de muestros padres i madres en el mundo sefaradi oriental. 

Aunke no de tantos anyos, en 2010 uvo tambien otros aniversaryos emportantes en el mundo sefardi ke meresen ser mensionados, i felisitados.

100 anyos de Ezra Bessarot, Seattle

La kehila sefaradi Ezra Bessaroth, fondada por imigrantes de Rodes,  fiesto sus 100 anyos en agosto de 2010.  A esta okazion eSefarad publiko unos kuantos artikolos, i tambien podesh ver munchos detalios mas en el sitio: http://www.ezrabessaroth.net/index.html   Aki vos transmeto en muestra lingua unos kuantas enformasiones enteresantes de su istoria:

Los primeros Sefaradim en Seattle eran Solomon Calvo and Jacob Policar,  ke yegaron de Marmara, Turkia, en 1902, I despues vinieron otros de Tekirdag (Rodosto) i Estambol.  En 1904 vino la primera persona de Rodes, Nessim Alhadeff, i en los tres anyos sigyentes yegaron todos sus ermanos I ermanas, I despues otros tambien.  En Sukot de 1909 se organizo el primer grupo de Rodeslis, Kupa Ozer Dalim Anshe Rhodes, para ayudar los proves en Rodes.  El grupo se formo komo kehila en 1912 kon el nombre Ezra Bessaroth (ayudo en tiempo de menester), fraza topada en Salmos, 46:12.  Marco Franco fue su primer prezidente, I asta ke en 1917 fraguaron sus primer edifisio, se reunian en kamaretas alkiladas.  La sinagoga aktual se dediko en Septembre de 1970.

30 anyos del Sephardic Educational Center

Otra institusion dedikada al mantenimiento del djudaismo sefaradi es el Sephardic Educational Center (SEC), bazado en Los Angeles, kon su “campus” en la Vieja Sivdad de Yerushalayim, serka del Kotel Maaravi. Desde 1980 mas de 25 mil mansevos I mansevas del mundo entero partisiparon en los kursos djudaikos en el sentro de SEC en Yerushalayim.   Se formo ramas del SEC en lugares komo Buenos Aires, Bombay, Sivdad de Meksiko, Miami, Montreal, New York, I Toronto.  Los kursos transmeten edukasion djudia en su modo sefaradi, kon sus preseptos de toleransa, moderasion, i partisipasion en la sosiedad moderna.   Aun ke su nombre es Sefaradi, el sentro I los kursos son aviertos a todos los djudios, sean sefaradi o ashkenazi.  Uno de sus programas, Makor, es djuntos kon la Universidad Ebrea i los elevos estudian en los dos lugares. En campus de Yerushalayim es kompuesto de tres edifisios istorikos sefaradis ke fueron restorados.  Ay klasas, dormitorios, oditorio, salas de komer, ets.  Aparte de los kursos de SEC, se utiliza para konferensias, fiestas, bodas, i mas.

El SEC tiene publikado tambien livros en ebreo I espanyol, entre eyos livros de orasion i el Pirke Avot.  Tiene tambien el projekto “Hesed”  ke ayuda a los menesterozos djudios en diversos paises i en Israel.  El “Los Angeles Sephardic Jewish Film Festival” (LASJFF), una seria de filmos relasionados kon el mundo sefaradi ke tiene lugar kada anyo, fue tambien establesido por el SEC en 2000.  El Dr. Jose Nessim fue onorado, djuntos kon su mujer I kolaboradora Freda Nessim, en la fiesta del 10en aniversaryo del (LASJFF).  Podesh ver el video de esta fiesta I onor en: http://www.sephardicfilmfestival.com/video/sec.html

eSefarad

I finalmente, muestro sovresaliente boletin elektroniko eSefarad marko su aniversario de dos anyos en 12-12-2010.   Ke maravioza idea ke tuvieron muestros keridos Liliana I Marcelo Benveniste!  I ke lavor de amor ke izieron! Semos todos agradesidos a eyos. Toda enformasion atada kon el mundo sefaradi se topa aki, sin limito.  Ke siempre siga a publikarse kon vidas largas i salud i fuersa de Lili i Marcelo.

Felisitamos a eyos, ansi ke a Ezra Bessaroth, Sephardic Educational Center, Los Angeles Sephardic Jewish Film Festival, i a Jose i Freda  Nessim. 

Ke tengan munchos anyos mas de vida, I reushita!

Rachel Amado Bortnick