En vista de Rachel: LOS KURTIJOS DE DJUDIOS: IZMIR I BUENOS AIRES

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

LOS KURTIJOS DE DJUDIOS: IZMIR I BUENOS AIRES

En los primeros anyos de los 1950s, kuaje kada Shabat yo me iva ande mi tia Ester, ermana de mi papa,  a komer por medio dia, porke me agradava muncho la maravioza savor de la “irviya kon geyna”*[i] ke gizava.  Siguro ke eya, komo kaje todos los djudios de Izmir en akeyos anyos, no gizava ni tokava lumbre en Shabat. Gizava de viernes I lo deshava en lumbre flosha asta la ora de komer en Shabat.  La geyna se azia blanda komo manteka, i la irviya tomava la savor de la geyna. (La savor de akeyas geynas no egzisten agora!) Tambien me agradava ke despues de komer, I del birkat amazon (orasion de dar lores al Dio por la komida) tio Jako me kontava kuentos de la Biblia o de Meam Loez.

Eyos no moravan en una kaza, si no ke en un kurtijo yamado “El Han de las Kavras” de parte de mar en Karatash (el kartier ande moravan munchos djudios), enfrente de la liseo turko de ijikas Kiz Lisesi.  De muestra kaza yo me iva a pie asta ayi en menos de 15 minutos, por la djadde (kaye prinsipal) enverso el Konak en el sentro de la sivdad. Un poko mas abasho del Han de las Kavras avia otro kurtijo (tenia nombre en turko) ande morava Donna, mi amigita de la eskola primaria Bene Berit, antes ke emigrara a Israel kon su famiya en 1949.

Kualo eran los kurtijos de Izmir? 

Komo biervo,  kurtijo es un patio, ke puede aver en kualkera kaza.  Munchas kazas de Izmir, entre eyas la muestra,  tenian kurtijos.

Ma un kurtijo ande moravan famiyas en una manera komunal es otra koza.  En Izmir lo mas de los djudios proves moraven en kurtijos, en turko yamados aile evi (kaza de famiyas) o Yahudihane (kaza de djudios.)  Se dize ke este stilo de edifisios para akomodar munchas famiyas empeso en el siglo 16 para akomodar los miles de djudios espanyoles ke estavan yegando a la sivdad.   Ma siguro ke munchos de estos se desparesieron en los fuegos I teretemblos ke uvo en Izmir en el siglo 17, 18 i despues. Lo mas de los kurtijos se topavan en el kartier ke yamavamos La Djudria, en la rejion komersial ande dainda egzisten munchas keilas (sinagogas) antiguas.  Ma tambien avia unos kuantos en el kartier de Karatash, serka de ande moravamos mozotros.

Yo vide tres djeneros de kurtijos. Algunos de afuera paresian komo una kaza grande de dos pisos, kon una puerta de fierro a la kaye, komo era el kurtijo ande morava mi amiga Donna. A la entrada de la puerta, avia un kurtijo (patio) kuadrado grande, i al deredor dos pisos de kamaretas, , en kada una una famiya. A vezes avia una chika kuzinika al lado de la kamareta, aunke no avia agua koriente.  La fuente de agua, o una tromba (pompa) para todos se topava abasho en el kurtijo (patio).

En algunos kurtijos a la entrada de la puerta, el espasio de enmedio era estrecho I largo, komo una kalejika, kon las kamaretas a kada lado, i una o dos al fondo del rektangulo.

El Han de Las Kavras era diferente, porke de la kaye no se via nada mas ke una entrada, al lado de un orno (panaderia.)  En entrando se via un grande espasio komo un kampo de tierra, kon en medio una estrecha kanal avierta ande korrian las aguas de luvia, o de la fuente komunal ke estava serka la entrada.   La mar al fondo se via al momento de entrar. A la derecha avia solo un piso de kamaretas, kada una kon una chika bariera delantre.  A la siedra del kampo las kamaretas (de tavla/madera) estavan en dos pisos, kon una veranda larga de akseso en el segundo.   I al fondo, serka de la mar, avia una kaza mas grande, me parese ke era de dos pisos, ande morava la bien konosida kurandera Madam Ester Kontente. (Eya no era de las “prekantadoras” si no ke era komo una doktora espesialista de guesos, ke savia kurar guesos rotos o torsidos, imobilizarlos, azer masajes, I topar remedios para todo jenero de dolores. Munchos tenian mas muncha konfiensa en Madam Ester ke en doktores de medisina.)

Mas abasho, al bodre de la mar, estavan los “kabines” (banyos) ke no eran nada mas ke 4 kabinikas de tavla (madera) kon un burako en basho en kada una.

Mi tia i tio moravan en la segunda kamareta a la derecha, i tenian una kuzinika estrecha I eskura al otro lado, kon tromba de agua, I una pila ande mi tia lavava los platos I las ropas (ke despues las espandia en la bariera para sekarlas.)  Gizava en un tandur (chiko ogar portativo ande se kema karvon)  i kuando tenia ke azer bizkochos, borekas, o otras kozas al orno, eya, komo todas las vizinas, lo yevava al orno komunal a la salida. Mis primos David I Sara de muy djoven avian emigrado a Israel en 1948-50, ma antes i eyos bivian en la mizma kamareta.  Aya era echar, komer, i asentar i alevantar.  Ma una ves no vide esta kamareta alborotada.  Siempre estava limpia i ordenada. En la barierika tenian un bankito, i tiestos de klavinas, ke kedaron siempre kon flores koloradas en mi memoria.

En los kurtijos no avia elektrisita, i la agua koriente se topava solo en la fuente de afuera.  Los “banyos” (no para banyar) eran komunales i estavan afuera (por esto los yamavan huz, del biervo huts en ebreo ke sinyifika afuera.)  Para el banyo de “tomar Shabat” todos se ivan al hamam turko.  (Mesmo los ke moravamos en kazas kon banyos de banyar preferavamos irmos al banyo turko los viernes.  Esto es otra estoria!)

Los Kurtijos despues de la emigrasion masiva a Israel 

Djudios de Izmir, sovre todo mansevikos, empesaron a irsen a “Palestina” mezmo antes de 1948.  Ma despues de la fondasion del estado de Israel, miles se fueron a “la medina” en vapores (barkos) yenos, i Izmir se empeso a “vaziarse” de djudios.  Lo mas de estos ke izieron aliya eran los proves ke bivian en kurtijos, i los kuartos ke vaziaron empesaron a vinir turkos (muslumanos) ke estavan yegando de los interiores de Anatolia.  Ansi es ke en los 1950, kuando mi tio i tia estavan dainda ayi, ya tenian munchos vezinos turkos musulmanos.

Oy en dia, lo mas de estos kurtijos ya no egzisten, o estan en un grado muy malo de desintegrasion.

Ekspozision de Fotos de los Kurtijos de Izmir 

En 2009, un fotografo de Izmir yamado Birol Uzmez se entereso en el tema de los kurtijos ande bivian djudios, sovre los kualos avia meldado en siertos romansos eskritos en turko.  Fue a bushkar ke se izieron estos lugares, I topo la provedad ekstrema de los ke biven oy en los pokos ke kedaron, kaje destruyidos.  El fue kon su makina I fotografio los edifisios I sus rezidentes, I desde entonses tuvo ekspozisiones en varias sivdades de Turkia.  Por sus ekspozisiones, I por los kurtijos se publikaron munchos artikolos en la prensa turka (i siguro en el semanal Shalom  de Estambol) en los kualos el Sr. Uzmez ajita por la restorasion de estos edifisios istorikos, los ultimos kurtijos (en turko se transformo en “kortejos.”)[ii]

Kurtijos en Buenos Aires, Arjentina 

Munchos anyos antes, kuando empesi a konoser la estorya de los sefaradim de Argentina, me enkanti de meldar ke i eyos, kuando yegaron ayi en las primas dekadas del siglo 20, bivieron en  kurtijos semejantes a los de Izmir,  i mezmo asta los 1950s.

Mi amiga Maria Cherro de Azar me deskrivio los kurtijos de Buenos Aires kon estos biervos, tan paresidos a los mios de ariva:

…eran grandes, con patio en el medio o en un costado,  habitaciones una al lado de la otra, algunos tenían cocinas muy pequeñas con «fogones» de material donde cocinaban con carbón. Y una pequeña pileta para lavar los platos.

También se usaban calentadores Primus que funcionaban con alcohol.

El horno de la panadería era una continuación de la casa, se usaba para cocinar las masas dulces: los baklawas, los mamules, las roscas o el pavo que se preparaba para los barmitzva o las bodas.

El baño era sólo  uno,  se turnaban para usarlo, igual que la pileta para lavar la ropa,  la terraza o el patio para extenderla.

Casi siempre era tema de discusión entre los vecinos, a veces por el agua, otras veces por los hilos para colgar.

En Buenos Aires los conventillos se compartían entre familias de distinto origen, armenios, italianos, españoles  o griegos.

Usaban una sola habitación por familia, pocas veces alquilaban dos y los que tenían más dinero, alquilaban la sala que tenía ventana a la calle.

Dia de Oy 

Maria mos adjusta ke en Buenos Aires, en los barrios de Flores i Once, ande bivian los emigrantes, las kazas i los kurtijos fueron destruidos para fraguar edifisios muevos de negosios.  I ayi ay tambien sinagogas, komo kedaron algunas en la vieja Djudria de Izmir, i por Karatash se konstruyo edifisios i apartamentos muevos. La diferensia es ke en Izmir, ande la povlasion djudia es solo de unas 1200 almas, mas no se topan djudios ke biven ni en la vieja Djudria ni por Karatash, i los kurtijos ke kedaron estan en muy negro estado, yeno de la mas prove provada (pobresa) de Izmir.  Por kontra, en Buenos Aires, ande la povlasion djudia es muy grande (200.000),  munchos djudios tienen negosios en los edifisios muevos de las viejas zonas djudias, i tambien biven a sus deredores.

I tambien, desde 5 anyos, los sefaradim de Buenos Aires, mezo el CIDICSEF (Centro de Investigación y Difusión de la Cultura Sefardí), evokan la memoria de los kurtijos kada semana kon el nombre ke metieron a sus emision en Radio Sefarad: Javeres del Kurtijo.

Rachel Amado-Bortnick