En vista de Rachel: Los Judios de Rembrandt

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

Los Judios de Rembrandt

La asosiasion del gran pintor Rembrandt van Rijn (1606-1669) kon judios ave sido el tema de munchos livros i artikolos.  Ultimamente,  el sujeto se tomo demuevo en mano a la okazion de una ekspozision aktual en el museo de arte de Philadelphia, Rembrandt and the Face of Jesus, de ovras del gran pintor kon la facha de Jesukristo i personas judias.

El buto prinsipal de esta emportante ekspozision es amostrar ke Rembrandt, kon tiempo,  troko el stilo de reprezentar la fachada de Jesukristo en arte, de una idealizada, divina i luminosa, a una ke es umana i real, un poko flaka, kon kaveyos eskuros i karakteristikas semitikas.  Entre otros, siete retratos de “Kavesa de Kristo”, prestados de varios muzeos I koleksiones, estan ekspozados en djuntos por primera ves.  En estos, mos dize Lloyd DeWitt,  direktor de la ekspozision, el modelo es la mizma persona ke vemos en “Retrato de un Mansevo Judio en Profil” i es la primera ves en la istoria de arte ke una persona biva fue el modelo para representar la kara de Jesukristo.

Malorozamente no egziste dingun dokumento istoriko ke apunta ke ombres djudios pozavan para los retratos de Rembrandt.   Tambien, munchas de las ovras no son ni sinyadas kon su nombre, ni datadas. Ma ay un dokumento datado de 1656 de la kontabilita de la kaza de Rembrandt, ke  nombra tres pinturas de “kavesas de Kristo” (ke probablemente estan en esta ekspozision) una de eyas notada komo “de bivo”, lo ke probablemente keria dezir ke es pintada kon modelo.  DeWitt pensa ke, siendo ke Rembrandt en akeos anyos estava pintando temas relijiozas kon fachas mas realistikas, bushko modelos kon karas semitikas, ke es, judios.

Komo ya savemos, Rembrandt bivio munchos anyos en en el kartier judio de Amsterdam, ke era tambien el sentro de komerso i de arte, ande bivian  prinsipalmente refujiados de Espanya I Portugal, konversos ke tornaron a ser judios aviertos ayi.  Por esto es ke la ekspozision trata tambien de este kapitolo emportante de la istoria sefaradi.  Entre los programes publikos de la ekspozision, uvo dos konferensias organizadas djuntos kon el muzeo nasional de istoria judia (National Museum of American Jewish History), una  en 25 Septembre  sovre “El Dialogo Entrerelijiozo en Amsterdam”, i otro, en 9 Oktubre, sovre “La Komunidad Sefaradi en el tiempo de Rembrandt.”

No ay duda ke Rembrandt konosia munchos djudios, entre eyos el rabino Menasseh Ben Israel, ke Rembrandt probablemente pinto su retrato i izo las ilustrasiones de su livro.  Muy posible ke era este rabino tambien ke le ayudo eskrivir la inskripsion en arameo en la pintura de “El banketo de Belshazzar” (Belshazzar’s Feast.)  Los modelos en los retratos de mansevo kon kipa,  son jeneralmente prezumidos de ser de judios, aunke este kasketo se vistian tambien los ombres olandezos non-judios. Ma el uniko retrato ke se save por seguro ke el sujeto es un judio, es el del doktor sefaradi Ephraim Bueno.   Los ekspertos estan de akordo ke el tablo renomado kon el titolo the Jewish Bride (la novya judia) no es deltodo ni de sujeto judio, ni de novia.

Algunos ekspertos dizen ke la influensa judia se ve tambien en el pan en forma de una halá judia ke figura en el tabló “Sena en Emmaus” (Supper at Emmaus.) Ma yo no esto konvensida, porke esta forma de pan de Shabat o fiesta es un uzo ashkenazi, I lo mas de los judios ke konosio Rembrandt eran sefaradim.

Todo tiempo ke no tenemos dinguna nota del gran pintor el mezmo, los ekspertos kreygo ke van a segir diskutiendo el tema.

La  expozision Rembrandt and the Face of Jesus empeso el anyo pasado (2010) en el Louvre de Paris, va kedar en Philadelphia asta el 30 Octubre, i despues va estar en le muzeo de arte de Detroit, del 30 Nov. 2011 asta el 27 Febrero 2012.

Rachel Amado-Bortnick