En vista de Rachel: KANSAS, IRENA SENDLER, I TIKKUN OLAM

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

KANSAS,  IRENA SENDLER, I TIKKUN OLAM

Edmond Cohen, en su emision del 15 Septembre sovre “Los Salvadores de Djudyos” (texto en: https://esefarad.com/?p=26613 ) avlo, entre otros, de Irena Sendler, la “djusta” de Polonya rekonosida por Yad Vashem:

“…en 1999, un profesor en el Kansas va meldar un artikolo sovre una mujer ke salvo a 2.500 kriaturas i fue torturada por esto. Demanda a sus elevos de bushkar si es vedra. Bushkan, i se apersiven ke no solo es vedra, ama ke esta mujer dainda bive. Le eskriven, i de uno al otro, esta vez se aze famoza, al punto ke resivyo en 2007 un omenaje del parlamento polako, dekorada, i propozada para el premyo Nobel de la paz. Se muryo un anyo despues, en 2008, a la edad de 98 anyos, antes de pueder ser elejida a este premyo ke por siguro meresiya.”
I yo agora vos kontare komo yo i mi marido deskuvrimos, en Kansas, la estorya del profesor I los elevos ke mensiono Edmond sovre Irena Sendler, de bendicha memoria.

La famiya de mi marido Bernard bive en Kansas City, una sivdad situada en dos estados –   Missouri i Kansas – separadas solo por una kaleja ke se yama «State Line» (linya de estado)!   Ir a Kansas City de Dallas, ande moramos mozotros, toma ora i medya de avion, o 10 oras  kon oto.  Jeneralmente mos vamos kon avion.  Ma esta ves, el Julio pasado, desidimos de irmos kon muestro oto.

En kamino no ay nada de enteresante ni ermozo, i kon las kalorsinas desgrasiadas, el viaje de 10 oras mos paresia ser de 20 oras.  Por esto, despues de kedarmos unos kuantos dias kon famiya en K.C., a la buelta para Dallas desidimos de irmos por otro kamino una sierta distensia. En kamino en la karretera (highway) vimos una salida, ande la tabela dizia «Fort Scott, Kansas.”  Desidimos de salir para ver si  verdadmente avia un “fort” (fortifikasion), de la gerra sivil amerikana (1861-1865.)

Entrimos a una plasa ancha, bien limpia,  kon flores ensembradas i enkolgando de tiestos, I entornada de fraguas istorikas komo vemos en los filmos “western” (de “cowboys”), kon trotuares (“trottoirs”, fr.)  kolonados de tavla I  kuviertos.[i] Vimos ke esta area de la sivdad es un sitio istoriko nasional, “National Historic Site.”  Ma no avia dingunos por enmedyo, solo 2 o 3 otos parkeados. Los magazenes estavan todos serrados.  Solo uno estava avierto, ma no paresia magazen de vendidas.  Se yamava  “Lowell Milken Center.”[ii]

Por kuriozita entrimos.  Avia una manseva simpatika en el computer[iii].  Mos saludo, se alevanto, i se aserko para darmos enformasiones. Este sentro de una fondasion edukativa tiene el buto de dar a konoser “eroes deskonosidos ke trokaron el mundo”, I promover entendimiento I paz entre los puevlos.  Eya mos konto ke Norman Conard, un profesor de istoria del “high school” (lise) de Uniontown empeso el projekto kon sus elevos de bushkar “eroes deskonosidos”, ke los elevos avian topado un artikolo sovre Irena Sendler, i fueron en 1999 a Polonya a konoserla en persona, i eskrivieron una piesa sovre eya, “Life in a Jar”, ke se tiene prezentado sienes de vezes en los Estados Unidos I Evropa,  I del filmo ke se izo despues para la television,  I mas.   Fue kon el esforso de estos elevos ke Irena Sendler fue nominada en 2007 para el premio Nobel.

Lowell Milken, el ke finansio el sentro, es un negosiante i filantropo ke fonda projektos edukativos, i kada anyo da premios a los mas ekselentes edukadores del pais. Norman Conard avia resivio el premio Miliken en 1992. El i sus elevos no solo ke izieron el projekto de eroes deskonosidos, ma tambien establesieron una organizasion enternasional kon el mezmo buto. Milken siempre los apoyo, I djuntos desidaron a anchear el projekto de dar a konoser los eroes ke sus aktos ambezan el respekto I entendimiento entre las personas, I reprezentan la fraza ebrea tikun olam (reparar el mundo.)  Enfin desidaron de estableser este sentro aki, en Kansas,  ande se avia  kriado el projekto.  El Lowell Milken Center se avrio en Fort Scott, 17 milas (27 km.) al este del high school de Uniontown.

Bernard i yo pasimos serka una ora en este sentro. Siguro merkimos el livro de “Life in a Jar” eskrito por los elevos sovre Irena  Sendler.[iv] Vimos ayi tambien las estoryas kon fotos ekspozadas de otros “eroes deskonosidos” ke deskuvrieron elevos en diferentes lugares.

Oy en dia en Fort Scott es una sivdad de unos 7000 abitantes, sin komunidad djudia.  Ma en el sentro Milken avia tambien una ekspozision de fotos sovre los djudios ke bivieron ayi de antes, entre eyos Morris Cohen, ke fue mayor (alcalde) de la sivdad en 1877-1879.

Esto fue muestro enkontro en Fort Scott, Kansas, ande ijikos amerikanos protestantes deskuvrieron una mujer katolika en Polonya ke salvo de la muerte 2500 kriyaturas djudias.  Son verdaderos pasos para tikun olam, ke todos dezeamos, puedeser mas ke siempre, en estos yamim noraim del anyo 5722.

Tizku leshanim rabot.

Rachel Amado Bortnick

Eksklusivo para eSefarad 

[i] http://www.fortscott.com/

[ii] http://www.lowellmilkencenter.org/index.taf

[iii] Podesh konoser a eya, Ashley Cook, en: http://www.lowellmilkencenter.org/about.taf?section=lowell-milken-center-staff&pid=109

[iv] http://www.irenasendler.com/