En vista de Rachel: Imigrasion de Anusim o Conversos al Imperio Otomano. Parte III: El converso en el livro “La Megila de Saray”

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

Imigrasion de Anusim o Conversos al  Imperio Otomano.  Parte III
El converso en el livro “La Megila de Saray”  

Kontinuando de los artikolos presedentes en:
Imigrasion de Anusim o Conversos al Imperio Otomano. Primera partida: Los Amados, de Bayonne a Izmir y
Imigrasion de Anusim o Conversos al Imperio Otomano. Parte II: El converso en el livro “En Torno de la Torre Blanka”

En una parte kurta del livro En Torno de la Torre Blanca meldimos de las  eksperiensas fizikas de un konverso: el fuyirse de la Inkizision en Sevilla, viajar a las eskondidas i yegar a Bayonne, despues a Venezia, i finalmente a Salonik, ande no fue fasil el adaptarse a la komunidad djudia establesida.

La novela La Megila de Saray[i], eskrita de Eliezer Papo, mos da un perspektivo totalmente diferente.   Aki no mos konta detalios istorikos del konverso rezin yegado a Saray[ii],  si no ke sus tormentas psikolojikas i dudas en relasion de relijion en jeneral, i de djudaizmo en partikolar.

La Megila de Saray 

En La Megilla de Saray tenemos una novela ekstraordinaria, muy diferente en su stilo literario, su pekuliaridad linguistika, i su kontenido.  Trata de la istoria de la komunidad djudia de Sarajevo (Saray), desdel arivo de los egzilados de Sefarad en el siglo 16 asta antes de la gerra en Bosnia de los 1990s.   No ay una estoria kontinuala, ni personajes prinsipales, siendo ke kada uno de los 13 kapitolos del livro es un episiodio en la istoria, kon personajes i temas diferentes.  Ma en su totalidad solo se topa su mesaje: la konstitusion mental, emosional, intelektual, I linguistika – en kurto,  la alma –  de los komunita djudia de Saray, es rezultado de  de los evenimientos  istorikos I las eksperiensas del puevlo antes i durante sus estar en este lokal jeografiko.

Eliezer Papo, el autor, nasio i s’engrandesio en Saray, i en 1990, a la edad de 25 anyos, izo aliya a Israel, ande oy en dia es profesor de literatura ebrea en la Universidad de Ben Gurion en el Negev, i visedirektor de su  Sentro Gaon de Ladino.  La Megilla de Saray es una mostra de su saviduria de la literatura ebrea, de la tradision rabinika de pilpul  (kazuistika) de analizar tekstos,  de ladino, ansi ke de su konosimiento intimo de la istoria i kultura de su  komunidad natal.    El livro es en el dialekto Bosnaiko de ladino, adaptado asegun la epoka istorika en kestion, i el jenero (ombre o mujer), la edad, profesion, i la saviduria de los personajes ke la avlan.   La estoria  avansa a traves de konversasiones, lo mas dialogos, entre los personajes, I kuando el autor es el narador, mos avla komo uno de los personajes en la estoria.

En el livro ay siertas biervos de prezentasion, en primero de Matilda Koen Sarano sovre  el stilo I el kontenido del teksto,  I despues de Yehiel Bar-Chaim, un tiempo direktor del “Joint” en Yugoslavia, ke mos da a konoser el ekstraordinaryo mansevo Eliezer Papo, ke lo avia konosido en Sarajevo.

El autor dedika su livro a su nona, de la kuala se ambezo la lingua, kon un emosionante poema adresada a eya en ladino I en serbo-kroato.

I despues el mos prezenta su ovra kon el sigyente djugo de biervos:

Los personajes de esta ovra non tienen ninguna relasion kon la realidad – mizmo komo no la tuvieron kvando las kozas akontesieron. 

Los akontesimientos istorikos mensionados en este roman no stan manipulados menos ke en kvalkier livro de istoria.

Konosemos a Yosef, el konverso, en Kapitolo Sesh, entitulado “Verso kontra verso kon el konverso kontraverso” – lo ke, kon un otro djugo de biervos,  mos indika el tono de la konversasion ke va sigir.

Aki, Yosef es un  anus venido de Lucena (Espanya) ke “demuevo abraso el djudaismo” en Kushta (Costantinople). I ademas:   “Yosef era una persona de munchos pensamientos, de ideas grandes i de mas grandes vasilasiones.  Una meskla buena i inpredikable de informasion, onor, dolor, sinismo, rebelio, pasion, sensia, inpasensia, amor i autosentrismo.  Dicho kon una palavra era un olam umloo.²⁶¹”  ( “261” indika el numero en las notas de pie ke eksplikan biervos o frazas  non-espanyolas en la oja. “Olam umloo” esta komo  “…el mundo I lo ke lo incha, un mundo intero, mikrokozmos.” )

Despues empesa la konversasion larga (22 pajinas), yena de sinisizmo, umor, i hohma (intelijensia, lojika, i saviduria) entre  Yosef, el anus, i su amigo Avraam, un djudio muy savido en la Tora, muy relijiozo, i muy pronto kon sus repuestas a las demandas sin fin de Yosef.

Sus larga diskusion en torno de temas komo kreyensa en la egzistensia (o no) del Dio, tener dudas, kualo es “la verdad”,  los mandamientos, I, en las eskojidas linyas ke kopyo aki, el bien-konosido tema de “ken es djudio?” (p. 96):

Y. –   I un Djudio ke no sta pronto de detenerse de hilul Shabat290  publiko – i ke non kreye en trezi ikarim291 ez Djudio?
A. – El nasyo Judio.
– Ke sinyifika el nasyo Djudio – i Jeronimo de Santa Fe i Avner de Burgos tambien nasieron Djudios – no me dizes ke ivas a kontarloz en minyan292.
– Bueno ay una diferensia entre un Djudio ke voluntarmente pase a otra Ley – i uno ke…
– Ke ez la diferensia?  Este salyo de la suya i entro a la otra – i este salyo de la suya – i no entro a ninguna – ama, praktikamente los dos salieron.

…

Y. – Keres dizir ke yo no estoy Judio?
A. – Lo digo sin kerer.
Y.  – Porke intonses la Eglesia todavia nos ve komo Judios? Kemandonos komo Judios.  Porke pozisiones onradas estan serradas a los kristiyanos nuevos si, segun loke tu stas diziendo, no son Judios?
A. – In primero: la Iglesia no va a desidir kenes son Djudios i kenes no.  Segundo: la Iglesia no los persige por ser Djudios  sino por ser djudaizantes, kere dezir por ser koferim en los ikarim de la kristiyanidad.
– Porke intonses kvando uno de nosotros sale de Espanya i viene a Turkia kijendo abrasar de nuevo a Judaismo – porke los rabinos no nos disen: vozotros estash kristiyanos – o vozotros estash goyim i tenesh ke konvertir?
– Porke todavia stash hayavim bamisvot.
– I ke sinyifika esto? – ke somos Djudios… – I de aki ke el Djudaismo ez pregunta de la sangre i no del komportamiento i de la mente komo ke tu lo keres tener.
– Antes de sinko minutos me dishites ke tu problema kon la Tora ez ke la Tora no ez bastante universal – i agora tu stas favlando de la sangre.

La diskusion kontinua, tokando en todo modo de kreyensa i kontradiksion en djudaismo. En un lugar, Avram (ke su mujer lo aspera en kaza) kere trayer fin a la diskusion en diziendo: Kerido miyo, de kontradiksiones no se muere.  La vida mizma es una kontradiksion grande.  Ma seguramente, Yosef  desfia esta eksplikasion, i el sujeto se torna a la kestion de kualo es predeterminado i kualo es el “eskojimiento libre.”  Finalmente Avraam s’alevanto para lavarse las manos “por maldar Shem’a”,  Yosef entiendo el siman (sinyal), i “salyo ensupito mizmo komo entro.”

I mas no vemos al konverso en la estoria.

Konkluzion

Las diferentes reprezentasiones del konverso en las dos novelas kompletan su imajen. En Torno de La Torre Blanca mos konta el viaje largo de Espanya I la integrasion sosiala del anus en la komunidad djudia, i La Megilla de Saray mos amostra sus luchas en si mezmo, para entender el djudaismo i figurar su lugar en su muevo entorno.

Komo aviamos dicho en la primera partida de esta seria de tres artikolos, todos los anusim o konversos ke desharon Sefarad no se fueron al “mundo muevo” de las Amerikas.  Algunos vinieron al Imperio Otomano i kon tiempo se integraron a la komunidad djudia sin deshar una trasa partikolar.  Por esto es seguro ke algunos de muestros propios antepasados fueron anusim ke bivieron komo kristianos un sierto tiempo antes  de azer el largo viaje a las tierras del “Grande Turko” ande podieron “demuevo abrasar el djudaizmo,” komo mos dize Papo en La Megila de Saray. 

Mis antepasados paternal, los Amados,  vinieron a Turkia de Bayonne, ande avia una komunidad grande de konversos. Es ke eyos tambien tuvieron ke traversar los mizmos kaminos peligrozos ke izo Mauricio Toledano, el konverso imajinario ke mos da a konoser Enrique Saporta y Beja en el romanso En Torno de la Torre Blanca?  I es ke eyos tuvieron las mizmas dudas I kestiones de Yaakov en La Megila de Saray? 

Lo ke es  seguro es ke las dos ovras me dieron grande plazer de meldarlas en sus ladino autentiko i literario, me prezentaron de una manera biva las estoryas djudias de Salonika i Saray, respektivamente,  i me ayudaron a imajinarme las luchas eksternas i internas de mis antepasados.   Aun kon todo, kreygo ke el tema de la imigrasion de konversos al Imperio Otomano merese ser ivestigado dainda muncho mas.

Rachel Amado-Bortnick
Dallas – Texas
Ladinokomunita