En vista de Rachel: Imigrasion de Anusim o Conversos al Imperio Otomano. Parte II: El converso en el livro “En Torno de la Torre Blanka”

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

Imigrasion de Anusim o Conversos al  Imperio Otomano.  Parte II:  El converso en el livro “En Torno de la Torre Blanka” 

(Esto es la kontinuasion del artikolo publikado en: https://esefarad.com/?p=34579)

Komo ya dishimos mas ariva, los konversos (o anusim) ke yegaron de Espanya i Portugal (lo mas a traves otros paises) al Imperio Otomano, kon tiempo se integraron kompletamente a las komunidades djudias, i las responsas de los rabinos de akel tiempo tratan anchamente de las difikultades i las kestiones halahikas ke uvo durante esta integrasion.   Ma, el rezultado de la absorpsion kompleta fue ke pedrimos la trasa istorika ke mos puede indikar kualas famiyas sefaradis oy en dia son desendientes de anusim, djudios ke avian bivido un sierto tiempo komo katolikos en akeyos paises ande praktikar la fe djudia podia kostarles sus vidas.   Solo savemos ke sin duda munchos de mozotros tenemos antepasados entre eyos, i mos podemos solo imajinar komo de personas eran, i ke eksperiensas tuvieron.

Novelas son rezultado de este proseso de imajinasion, i mos ayudan a konoser intimamente personas istorikas emportantes ansi ke ordinarias.  Egzisten novelas sovre Dona Grasia i Don Yosef Nasi,[i] los mas famozos eks-konversos del Imperio Otomano.  Ma komo konoser konversos no tan famozos del siglo 15 ke se asemejarian mas a muestros propios ansestros?

Orozamente tenemos dos novelas en ladino (en letras latinas)  ke inkluyen este jenero de personajes.  La una es En Torno de la Torre Blanca[ii] de Enrique Saporta y Beja (Paris, 1982) I la otra es La Megila de Saray[iii]  de Eliezer Papo (Yerushalayim, 1999. ) Aunke kada uno de estos livros trata de un tema diferente (Salonik  i Sarayevo respektivamente) I es eskrito en un stilo kompletamente diferente del otro,  todos los dos son lavores de kerensia de sus autores por sus komunidades.

Aki no vamos a dar un resumen de kada livro, si no ke dar a konoserlo al grado ke es menester para entender el konteksto en el kual se trata del konverso.   Komo veremos, el personaje del konverso no es sentral en dinguno, ma una parte chika, aun ke  emportante, de la estorya.

En Torno de la Torre Blanca

El titolo del livro se refera a La Torre Blanka (Beyaz Kule en turko[iv]) en el kartier ande moravan la majoridad de djudios en Salonik.   En las primeras linyas de su prefasio, el autor mos dize:

“Este livro no es un romanso.  Es un kuento romanseado ke syerve de kuadro I de preteksto a una deskripsyon de los uzos, de las kostumbres I de las tradisyones de los Sefardis de Selanik […] tal komo eran al empesijo de este sekolo. Tambyen estan notados varyos datos estorikos ke se pasaron […] Es un testimonyo sovre una djenerasyon I tambyen una evokasyon de un modo de bivir, ay!, agora desparesido.”

Estas linyas representan, kreygo yo, un resume de los aspektos mas emportantes del livro, ke son:

• Los personajes son inventados, solo por tener un medio de kontar la estorya verdadera de la komunidad.
• El livro transmete munchos detalyos sovre los uzos, tradisiones, i todo el folklor de los djudios de Salonik.  (I en realidad el ivro es un manadero emportante de refranes, deskripsiones, kantikas, I uzos de los djudios de Salonik.)
• Aki se inkluye toda la istoria de los sefaradim venidos al Imperio Otomano, I a Salonik en partikolar.
•  La estoria tiene lugar antes de la eksterminasion de la komunidad en Auschwitz, ma inkluye el gran fuego de 1917.

La estoria empesa kon la grande alegria del nasimiento de Moshe Toledo (en grande lo van a yamar Maurice) en Salonik verso la fin del sieklo 19, el primer ijo de Luna I Avram Toledo.   I todo lo ke va pasar en el livro pasa en la vida de este Maurice.  En deredor del nasimiento meldamos  todas sus seremonias I uzos,  I konosemos a la famiya del bebe, entre eyos a los nonos, el uno siendo Moshon Toledo, ke el inyeto yeva su nombre.  Avram Toledo eskrive la data del nasimiento de su ijo en la vieja Tora de famiya.

Poko despues el autor mos yeva a la istoria de la famiya Toledo, empesando  en Sevilya,  Espanya, en 1391, tiempo de los pogromes kontra los djudios. Avram ben Ascher, ijo del trezorero del duke de Toledo, es vaftizado I toma la alkunya de su protektor el Duke, Toledo.  En 1492 Mauricio Toledo, desendiente de Avram ke kontinua dainda a mantener su djudaismo en sekreto, ve la Ekspulsion de los djudios (tenemos deskripsion de la trajedia.)  Despues Mauricio es denunsiado a la Enkizision komo “judaisante”, ma se fuye, emprimero se va a Navarre, ande los marranos (este es el termino uzado en el livro) le ayudan a kruzar la frontiera I yegar a Bayonne. Ma el no kere kedar en un pais kristiano, se kere ir a la tierra de El Grande Turco, ande puedra bivir libremente komo djudio.  De Bayonne viaja a Venezia, I de ayi finalmente yega a Salonik.

Ma aki tiene difukultades para  adaptarse a la komunidad.  Kuando va a enrejistrarse al kal de Kastilya, la sinagoga de los venidos de su sivdad, no es deltodo bien resivido.

“Los emigrados “voluntaryos” no pedronavan a los “marranos” por averse kedado en Espanya por konvenyensa personal, myentras ke eyos, pyedrendo todo, avian fetcho el sakrifisyo de irse.  Los “marranos” veniyan agora, porke eyos tambyen estavan perseguidos por la Inkizisyon.  El galut – malgrado de averse konvertido – era una mezura de salvasyon para eyos.” (p. 25-26.)

Mauricio dainda tenia los djestos I vestidos de kristiano.   Era tan akostumbrado a azer el sinyo de la krotche (kruz) ke a vezes mezmo lo azia en entrando al kal, o se kitava el chapeo en el kal!  Se le mesklava el “Shema Israel” kon el “Ave” o el “Pater.”   Era fasilmente remarkado en publiko vestido de espanyol kon la espada a su lado, I los djudios Selaniklis pasavan al otro lado kuando lo veian venir.  Un dia, sin kererlo, avia entrompesado uno en la kaye, I akel djudio kon gran ravia lo grito “Goy, fijo de Goy!”

No teniendo otro remedio, Maurisio se fue a eskrivirse al kal de los marranos yamodo  “Baale Teshuva,” (“atornados al kamino derecho.”)  Komo dodos los marranos de “Gerush Sefarad” I el se izo berit (sirkonsision, birin en el dialekto salonikli.)   Ma kon tiempo  todos vieron ke Mauricio dio buenas provas de su djudaizmo, I el entro  a la komunidad, fue admitido al kal de Kastilya, “i dezde entonses todos sus desendiyentes fueron eskritos en este kal” (p. 27.)

Esto es en kruto (no mas de 20 pajinas en el livro de 337 pajinas) toda la informasion ke tenemos sovre el marrano rezin yegado a Salonik en la estorya de En Torno de la Torre Blanca.

Es muy diferente de lo ke konoseremos del konverso en La Megilla de Saray, ke vos kontare a la proksima ves.

Rachel Amado-Bortnick
Dallas – Texas
Ladinokomunita