En vista de Rachel: ESTORIAS I ISTORIAS DE LOS KRIPTO-DJUDIOS

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

ESTORIAS I ISTORIAS DE LOS KRIPTO-DJUDIOS

El mez pasado en e-Sefarad meldimos la remarkavle i esmoviente  estoria de Genie Milgrom, nasida en Kuba, ke deskuvrio – despues de una investigasion jenealojika formidavle –  ke de su parte maternal, eya es desendiente de djudios “conversos” del kazal de Fermoselle en Espanya, en la frontiera kon Portugal.   De muncho antes eya tenia sentimientos –  o, mijor dicho, presentimientos ineksplikables – en favor de djudios i djudaismo, asta ke finalmente se konvertio i bive agora una vida enteramente djudia. (Su estoria en espanyol: https://esefarad.com/?p=25003 , i en inglez: https://esefarad.com/?p=25086 .)

El tema de “kripto-djudios” (djudios eskondidos) o “bene-anusim” (“ijos de los forsados” en ebreo)  me entereso a mi desde munchos anyos, porke para mi eyos son de muestros ermanos sefaradis ke se despartieron de muestra famiya durante las desgrasias  kontra djudios en Espanya i Portugal.   Despues de las Ekspulsiones del siglo XV, eyos kedaron, I mozotros mos fuimos. En el Imperio Otomano, mozotros kedimos djudios foros asta oy, kon muestra lengua i kultura djudia-espanyola.  Eyos por sienes de anyos bivieron kon el espanto de la  maldicha Inkizision i el “miedo de ser deskuvridos” asta ke sus kultura, mezmo en tierras leshanas komo las Amerikas, se izo una de sekretos i de klandestinidad, i de enyegar el pasado djudio de sus famiyas.

Por esto es ke para los “kripto-djudios” – sean de los Estados Unidos, de las islas del Karib, de la Amerika Latina, o de Evropa – el deskuvrir raises djudias implika un proseso largo i difisil komo el ke vimos en la estorya de Genie Milgrom.  Komo miembra desde munchos anyos del “Society for Crypto-Judaic Studies,”  yo konosko munchas estoryas personales de desendientes de konversos, i sinti mas en el en el kolokio ke asisisti ultimamentete en 7-9 Augusto en San Diego, California.  En eyas kaje siempre vemos este proseso, ke inkluye los sigyentes aspektos o pasos:

1. Tener sentimiento de inkomodita frente a las kreyensas o los rituales del kristianismo, o simpatia por el djudaismo.
2. Darse kuenta ke algunas tradisiones de famiya (no komer puerko, ensender kandelas viernes la noche, kuvrir los espejos durante el dolio, ets.) son djudias. (Aki devo mensionar ke algunas de estas tradisiones sitadas por los kripti-djudios, a lo ke se yo, no son sefaradis.  Entre eyas son el ensender kandelas para Shabat,  el barrir de la puerta para alientro, I el djugo en Hanuka de sevivon, o dreydl en Yidish.    Los Sefaradis ensendian fitilikos, o mechas en la alzeyte, I no kandelas.)
3. Demandar informasiones sovre sus antepasados a los grandes de la famiya.
4. Investigar en los archivos de la Inkizision o de lugares spesifikos ande bivieron los antepasados.
5. Eredar (o enkontrar en la famiya) algun artefakto kon simbolo djudaiko.

Un parentesis sovre los terminos para los konversos i sus desedientes: 

Un artikolo enteresante en el Journal of Spanish, Portuguese, and Italian Crypto Jews, (Volume 3, Spring 2011, p. 149) mos dize ke en los livros en inglez de los anyos 1925-2010 se uzaron siete terminos referente a djudios konvertidos al katolisizmo en Espanya i Portugal en los siglos XIV-XVI.  Estos son: Marranos, Conversos, Crypto-Jews, Secret Jews, Hidden Jews (djudios eskondidos), New Christians, i Anusim. Analizaron titolos de 134 livros, I toparon ke ke entre 1925-1979 mas muncho se uzo “Marranos” (40%) i “Conversos” (33%); en 1980-1999 “Conversos” pujo a 49.1%, i “Marranos” kayo a 30.9%.  En 2000-2010 el termino “Crypto-Jews” se uzo muncho mas de antes (a 24%) mientres ke “Conversos” kayo a 23%.  (Siendo ke ni uno de estos livros no tratavan de los konversos de Italia, el termino “Neofiti” uzado ayi, no esta en la lista, ni el termino “Chueta” ke refere a los konversos de Majorca.)

Siguro ke savemos ke no todos los konversos eran anusim (forsados) ni djudios sekretos.  Algunos se avian konvertido voluntariamente i fueron kristianos senseros.  Ni la akuzasion de ser “judaizante” era prova de aver pratikado la relijion djudia en sekreto.  Ma oy en dia, ay dos terminos uzados muncho para referir los ke bushkan i topan raises djudias en sus famiyas: “Crypto-Jews” i “Bene-Anusim.”

Konkluir kon un pensamiento sovre el puevlo sefaradi:

Malorozamente los desendientes de konversos ke estan retornando al djudaismo oy en dia, komo munchos sefaradis en el mundo entero, se estan integrando a la komunidad I la kultura ashkenazi.

Ke seria la situasion aktual del puevlo sefaradi si  muestra istoria fuera sin  persekusiones, konversiones forsadas, i ekspulsiones de la Iberia medieval?  Kreygo ke no ivamos ser la minoriya chika, siempre amenguandose, ke semos oy, ma ivamos a konstituir la mayoria del puevlo djudio del mundo, komo eramos en  el siglo XII.

Rachel Amado Bortnick

Eksklusivo para eSefarad