En vista de Rachel: Entendimientos i Mal Entendimientos: Diferensias konfundidas entre espanyol i ladino

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

Entendimientos i Mal Entendimientos: Diferensias konfundidas entre espanyol i ladino

Mas abasho vos do un resumen de mi konferensia kon este titolo (en inglez “Understandings and Misunderstandings: Confounding Differences Between Spanish and Ladino”) ke di en Los Angeles, en el kolokio del grupo UCLadino ke tuvo lugar el dia de martes, el 21 Novembre, 2012, en una sala de la libreria yamada “Young Research Library” en el campus de UCLA (University of California, Los Angeles.)

Lo adjunto el program aki para el ke lo kere ver.

Kualo es UCLadino?

Devo eksplikar un poko por este maraviozo grupo ke es UCLadino, i por el kolokio ke izieron ke fue absolutamente remarkavle! Remarkavle porke no fue «entre eyos», komo son todas las konferensias kon ponensias akademikas. Una, porke envitaron dos personas non-akademikas a dar las konferensias prinsipales: a Alicia Risso Raz sovre la haketia (djudeoespanyol de Maroko),i a mi sovre el ladino, kijiendo no solo oyermos, ma tambien para ke les demos muestras opiniones i kritikas sovre las ponensias prezentadas. I tambien avrieron el program a la komunidad jeneral, i la verdad es ke uvo mas munchos oyentes de afuera ke de elevos.

Los elevos son todos “graduate students” (estudiantes ke son kandidatos para Masters o Doktorato) en los departamentos de istoria i de espanyol i portugez. Vos direkto a meldar un poko mos sovre este grupo de mansevikos ekstraordinaryos en: https://esefarad.com/?p=27186

Notas sovre las diferensias prinsipales entre Espanyol i Ladino

Lo ke vos do es solo un resumen de mis notas para la konferensia. Kero prefasar todo en diziendo ke esto uzando el nombre “ladino” por la lengua djudia-espanyola ke fue avlada en las komunidades del Imperio Otomano (no por la traduksion calque de tekstos ebreos.)

Tambien kero rengrasiar a todos de la komunidad sefaradi de Los Angeles vinieron a sintirme, lo ke me dio grande plazer. (I komo ya vitesh en la foto, estava Rubi Hanan i Art Benveniste, amigos mios desde munchos anyos, ke sus djenitores eran de Rodes.

Komo ya eskrivio Stella Levi en Ladinokomunita, Rubi es ija de su prima – Rejina Hanan, de bendicha memoria – i parientes de muestro amigo Renaud de Fransia. Es siempre alegria para mi de ver estos enkontros maraviyozos achakes i mezo de LK.)

El titolo de mi avla era «Understandings and Misunderstandings: Confounding differences between Spanish and Ladino.» (Entenderes i Malentenderes: Diferensias konfundidas entre espanyol i ladino.) Pensi ke esto era un sujeto ke podiya ser muy util para los estudiantes de muestra lengua ke konosen el espanyol. Siguro me bazi en las notas ke tomi, desde munchos anyos, en los mesajes ke resivimos de los espanyol-avlantes aki en LK (antes de ser moderados.)

Vos adjunto aki el PPS ke mostri, ke fueron mis notas para mi avla. (A mi no me agrada meldar papel, prefero avlar en mirando a mis notas.)

Mi primera nota dize «Este arroz areyeva muncho kaldo» (o muncha agua) porke, dishe yo, estas dos lenguas son tan diferentes ke ay muncho de dizir, i esto no se puede azer en el kurto tiempo ke tenemos. Dishe ke aunke yo nunka no estudyi el espanyol, mi eksperiensa de 12 anyos en LK fue el mas grande medio para ambezarme sovre las diferensias entre las dos linguas, i las razones deke a los espanyol-avlantes se les meskla las linguas a tan grado.

Aun ke mozotros mos podemos dar a entender kon los espanyol avlantes, algunas vezes no entendemos a eyos, o eyos mos malentienden a mozotros. Konti mi primera eksperiensa de ser malentendida, en los primos anyos de 1970s en St. Louis, kuando Joseph Schraibman, profesor de espanyol en Washington University, kijo ke venga a su klasa i les avle en ladino a sus elevos. Kuando les dishe ke vine a l’Amerika despues ke eskapi el lise amerikano en Izmir, todos se empesaron a reyir. Me averguensi muncho, sin saver deke se estavan riyendo, asta ke Joe me ekspliko ke en espanyol «eskapar» es fuyirse! Ke eyos entendieron ke yo vine a l’Amerika despues ke me fuyi de la eskola en Izmir! Tambien adjusti ke todos tenemos estoryas de malentendimientos, i ke vo kontar otras de LK mas despues.

Ekspliki tambien ke no vo avlar de los varios dialektos ke tenemos en muestra lingua, ma de karakteristikas ke son mas o menos komun a todos los dialektos del ladino, mesmo sin referarme muncho a los biervos ajenos (de otras lenguas) ke tenemos.

Deke son diferentes las dos linguas? (nota 2 de mi Powerpoint)
Ladino tuvo istoria diferente: 1. en el Imperio Otomano, izolasion de Espanya i de todo el mundo ispano. 2. ambiente non-ispaniko i 3. multilingual i 4. el ser lengua djudia i eskrita kon letras ebreas. (Diapozitiva 3 amostra el Imperio Otomano en su mas grande teritorio en el sieglo 16.)

Muestra lingua tuvo una evolusion partikolar: 1. mantuvo formas iberikas medievales; 2. algunas formas trokaron kon tiempo; 3. tuvo muncha influensa de otras lenguas, i 4. Se desvelopo dialektos de diferentes lugares en el imperio.

Mostri las maneras ke se eskrivio en letras ebreas i se eskrive agora. En la mostra 7, la oja de «El Akuzado Sin Kulpa», tengo la transliterasion de las letras ebreas kuadradas en letras latinas majiskulas, i la de letras en rashi en letras latinas chikas.

En el kuadro no. 8, mostro la nota en soletreo de Izak Sevi, de bendicha memoria, ke avia eskrito en mi livro de Los Amigos Sefaradis de California (Area de San Francisco) era Salonikli ke sovrebivio la Shoa, tenia una boz maravioza, kantava i hazanut a la turka, i kantigas en ladino.

Kreygo ke el resto ya lo vash a entender de mis notas en el powerpoint.

PowerPoint >>

Rachel Amado-Bortnick