eSefarad Noticias del Mundo Sefaradi
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.
Sefaradia ekstraordinaria: Rebecca Camhi Fromer, z.l.
Para mi, el anyo 2012 empeso kon el triste haber (notisia) de la muerte de mi amiga Rebecca Camhi Fromer en Berkeley, California, el 1 enero. No es ke tuvo vida kurta, ya tenia 84 anyos, ma esto no aze menguar la profunda emosion de piedrita ke sentimos los ke la konosiamos, la keriamos i la admiravamos. Aki mando demuevo mis kondoleansas a su ija Mira Z. Amiras, i inyetos Michael Zussman i Reyna Savrosa.
- Rachel y Rebecca (z’l)
Rebecca era eskritora, istoriadora, poeta, i dramaturga, konosida tambien por aver fondado el muzeo djudio Judah Magnes en Berkeley djuntos kon su marido Seymour Fromer (ke murio en 2009.) Su kaza era djusto al lado del muzeo.
Eramos amigas kolaboradoras en la asosiasion Los Amigos Sefaradis (ke yo avia fondado en 1985 en Oakland , serka de Berkeley) i kedimos amigas asta kaje la fin de su vida.
Rebecca nasio en el “Lower East Side” de Manhattan (New York) ande entonses bivian kaje todos los muevos imigrantes sefaradis, al lado ma aparte de los muncho mas numerozos ashkenazim. Su padre era de Monastir, i su madre de Salonik. En 1940 la famiya paso a Los Angeles, demuevo a bivir entre sefaradim. A kavza dela mala situasion ekonomika de su papa, Rebeka empeso a lavorar de la edad de 15 anyos. Kon su fuersa, eya yego asta diplomarse de la universidad. Su eksperiensa de chikez le dio un fuerte karakter independiente, kon simpatia para el prove, el deskaido, el desolado – lo ke eya ekspreso klaramente en todos sus eskritos I su lavoro. Eya ensenyo en una eskola de pretos, todos proves, ande su ayudo, empatia, ensenyansa I idealizmo troko la vida de munchos para bueno. (Una letra de un alumno viejo syo se topa en el penultimo livro de Rebecca, “One Voice, Many Echoes,” pp. 221-2.)
- Amigas sefaradíes
En Los Amigos Sefaradis teniamos algunos miembros Saloniklis ke eran reskapados de la Shoa. Rebecca eskrivyo sus estoryas, un lavoro ke le tomo anyos i rezulto en los livros: The Holocaust Odyssey of Daniel Bennahmias, Sonderkommando (1993); They say Diamonds Don’t Burn (eskrito endjuntos kon René Molho, 1994), i The House by the Sea: A Portrait of the Holocaust in Greece (sovre Elia Aelion, 1998.) Las estoryas de otros sovrebivientes sefaradis ke konosio, eya las eskrivio en diferentes formas, komo en piesa de teatro, eya eskrivyo o poezia, i las inkluyo en sus otros livros. Tambien eskrivyo otras estorias I poemas de tema sefaradi, munchas vezes uzando biervos o frazas en ladino. Era su manera de eksprimir el sefaradismo ke korriya en su sangre.
En los ultimos dos anyos, kon mi i sus otras amigas sefaradis, Rebecca keria konversar solo en ladino, ke lo avlava kon su dialekto Monastirli, i siempre le agradava oyir i kantar kantikas sefaradis. En su muerte, yo no puedo onorar su memoria mas ke en eskriviendo sovre eya dandola a konoser en su amada lingua. Su alma ke repoze en ganeden, i su memoria ke sea siempre bendicha.
Rachel Amado-Bortnick
