En vista de Rachel: Deskorso de Prince Charles, Istoria Sefaradi, i los Djudios de Ingletierra

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

Deskorso de Prince Charles, Istoria Sefaradi, i los Djudios de Ingletierra

En la noche del 4 julio, 2011, en el famozo edifisio istoriko “Guildhall” de Londra se fiesto los 250 anyos de la fondasion del “Board of Deputies”,  la organizasion komunal djudia de Ingletierra, ke su prezidente aktual es Vivian Wineman.  Avia 500 asistientes, inkluyendo el granrabino Sir Jonathan Sacks, otros rabinos i reprezentantes de las organizasiones djudias, ambasadores, politikos, i mas.   Ma el mas eminente invitado era, sin duda, Prince Charles, “Prince of Wales” (Principe de Gales) ke vino a este banketo kon su espoza Camilla, la Dukeza de Cornwall.

Kualo podemos topar de entereso sefaradi en este evenimiento? Deke es ke el Prince,  el futuro Rey del Imperio Britaniko, topo esta reunion djudia meresiente de su prezensia?

Tengo delantre de mi el teksto del deskorso* ke izo Prince Charles en esta okazion.  Kreygo ke aki, en las linyas del deskorso ke vos transmeto yo abasho (en mi traduksion livre kon letras italikas) podemos ver algunas repuestas a estas kestiones.  Yo adjusti kurtos komentarios o aklarasiones en parentesis.

…

La istoria del edifisio de Guildhall es atada inseparavlemente a la istoria djudia, aunke no siempre kon buenos rezultados.  Este mezmo salon fue la shena, mas de 430 anyos atras, del djuzgo de Rodrigo Lopez, el mediko nasido djudio de la Reyna Elizabeth I.  El fue akuzado por personas ke se enselavan de su influensa en el korte real.  Fue djuzgo en este lugar I kondanado a la muerte.  La reyna en vano perkuro de evitar su egzekusion,  ma reusho a azer una koza ke nunka se tenia visto en kavzos de traision.  Eya dio a la famiya de Lopez el derecho de eredir su propriedad.

(Del anyo 1290, kuando el rey Edward I ekspulso los djudios, asta 1656, tiempo de Cromwell, djudios no eran permetidos de bivir en Ingletierra.   Lopez, mediko de la Reyna Elizabeth I, era un converso nasido en Portugal en 1525, ke fuyendose de la Inkizision, se refujio en Ingletierra, ke dainda no permetia la prezensia de djudios.  Lopez bivio, a lo menos por afuera, komo kristiano protestante.  Mezmo al punto de muerte kuando fue enforkado, el 7 djunio 1594, el deklaro ke el se kreye en Jezukristo.  Algunos kreyen ke Shakespeare bazo su Shylock en Lopez.)

Mas tadre, djudios vinieron a Britania de munchas tierras: de Espanya I Olanda, Almanya, los Balkanes I Romania, de Polonya I los Estados Baltikos, de Ejipto, Yemen I Maroko, de Iran, Irak I Bahrain, del Sud Afrika I Zimbabwe. … 

(La permision inofisial de Oliver Cromwell en 1656 era para  traer djudios rikos de Amsterdam kon el buto de tomar el komersio internasional de la mano de Espanya. En 1657 Antonio Fernandez Carvajal i Simon de Caceres merkaron un tereno para el primer semeterio djudio.   En 1692 vienieron algunos ashkenazim de Almanya, ma eyos no tuvieron dinguna relasion kon el governo, i los Sefaradim kedaron en la mayoria kuaje asta el siglo XX. )

Djudios Britanikos kontribueron kon vitalidad en todos los aspektos de la vida: en los artes, las sensias, medisina, negosio I komersio.  Eyos djugan un rolo emportante en el governo lokal I nasional, en el “House of Commons” (Kamara de los Komunes) I en el “House of Lords”, ande el granrabino siempre traye la boz de saviduria I djuisio.  La sosiedad jeneral siempre profita de la filantropia djudia…

Lo ke ay de regretar es ke el publiko no konose bastante los talentos I las kontribusiones de la komunidad djudia.  Por esto es ke mi espoza I yo kijimos venir aki esta tadre para rekonoser esta ekselensia I selebrar kon vozotros. 

Siguro ke la kontribusion djudia al paiz no es koza mueva.  

El primer “knight” (chevalier, kavayero) djudio, por la Reyna Anne, era Sir Solomon de Medina.  … El gran Primo Ministro Benjamin Disraeli, vaftizado en chiko, siempre se konsidero komo djudio… Sir Moses Montefiore  fue ennaltesido al nivel de Baron por mi biz-biz-biz-nona la Reyna Victoria.  … Komo ya lo savesh mijor de mi, Sinyores i Sinyoras, Sir Moses Montefiore es uno de los muy distingidos antepasados de Vivian Wineman komo Prezidente del “Board of Deputees.”  Solo puedo dezir ke Vivian va tener de menester muncha enerjia para venser el rekor inkreyible de 39 anyos en este posto de Moses Montefiore!  Siguro la istoria rekonose Sir Moses espesialmente komo intermediario korajozo kon el Tzar de Rusia i el Sultan de Turkia para protejar los djudios de sus dominios, i tambien por sus esforsos semejantes en Roma, Maroko I Romania, I sus siete viajes a Yerushalaim.  … El yevo un poko de Britania a Yerushalayim, porke konstruyo el molino “Kentish” (al stilo de molinos de Kent) ke dainda esta ayi, konosido komo el molino de Montefiore, i trusho un poko de Yerushalayim a Britania: el esta enterrado kon tierra de Yerushalayim en Ramsgate, en una tomba replikada de la tomba de Rahel serka de Yerushalayim i Betlehem. … 

(Sir Solomon de Medina [ca.1650, Bordeaux –1730, Amsterdam]; Benjamin Disraeli [1804 –1881]; Sir Moses Montefiore [Livorno,1784- Londra,1885.]  El molino de Montefiore, fraguado en 1857 [durante la epoka Otomana] para moler trigo en arina, es agora un chiko muzeo sovre Montefiore.  Su deredor es el kartier de Yemin Moshe, en onor de Moses (Moshe) Montefiore,  ke lo establesio. )

Prince Charles avlo de muncho mas en su deskorso, ma yo eskoji las linyas de ariva ke tratan de un kapitolo emportante i glorioza de la istoria sefaradi, i de una komunidad djudia ke es dainda muy respektada, i ke poko se konose oy en dia.

—

* El teksto del deskorso se topa en:

http://www.princeofwales.gov.uk/speechesandarticles/a_speech_by_hrh_the_prince_of_wales_at_the_board_of_deputies_538202846.html

Rachel Amado-Bortnick