Emisyon Muestra Lingua djueves 11 de marso: EL KAVZO MORTARA por Edmond Cohen

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves ke vyene 18 de marso, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière. Vamos a empesar por una konferensya del Senyor Frederic Viey sovre los djudyos de Uzbekistan, kyere dizir sovre todo de Boukhara, ama tambyen de Samarkand i Tashkent. Puede ser algunos de mis keridos oyentes se akodran de una emisyon ke ize yo mismo sovre estos djudyos el 18 de desyembre 2008.

¿De kualo avlarvos oy? La semana pasada, kuando vos avli de Sir Moses Montefiore, vos dishe unos kuantos byervos sovre el viyaje ke Montefiore izo en vano en 1858 para aprovar de ablandar el papa Pio IX para ke de atras el ijiko travado de fuersa a sus paryentes i ke se yamava Edgardo Mortara. Solo vos dishe ke malorozamente no reusho esta vez, ama oy vos kyero kontar en entero este muy triste akontesimyento ke izo muncho ruido en la Evropa entera, el kavzo Mortara. 
 
En primero de todo, kale ke sepaj ke este echo topa su orijen en una ley ediktada en el Corpus juris canonici, el derecho de la Iglesya, por el Consilyo de Toledo de 633, kijo dizir mil i dozyentos anyos antes de este echo. Asigun esta ley, si una persona dize ke bautizo a una kriatura non kristyana invitis parentibus, kijo dizir afillu si sus paryentes no lo supyeron o no lo kijeron, la Iglesya teniya el derecho, sino mismo la ovligasyon, de travar de fuersa esta kriatura de sus paryentes para guadrarla en la relijyon katolika. Esta ley troko kon el tyempo : en 1764 el papa Clemente XIII menaso de kastigo los ke bautizavan a eskondidas a una kriatura djudiya, i deklaro nulo tal bavtizmo. La kriatura deviya ser deshada a sus paryentes. Ama en 1823, el papa Leone XII izo renaser a esta ley maldicha. I pishin empesaron los travamyentos de kriyaturas djudiyas : Davide di Anselmo Tedeschi en 1824 en Genova, el ijo de David Diena en 1826 en Modena ; Esther Montel, ija nasida en Fiumicino en 1840 de dos fransezes en viaje en Italia. Esta vez, el Governo fransez va kesharse i azer una aksyon diplomatika. El Papa Gregoryo XVI va al kavo achetar de dar atras a la kriatura, ama solo a un diplomato franses kon la kondisyon ke la kriatura sea mantenida en la relijyon katolika. Los Fransezes achetan, ama kuando obtyenen la kriatura  la aboltan a sus paryentes. Por una vez, la istorya se eskapo byen, syendo ke la kriatura era ajena i fue defendida por su pais, la Fransya. Despues la lista kontinua kon Pamela Maroni, ija de un Abraham en 1844 en Reggio Emilia. Otros kavzos asemejantes tuvyeron lugar en Lugo i Ancona. 

Kale dizir ke en estos tyempos, la situasyon de los djudyos en los Estados pontifikales no era livyana. En Bologna, sivdad ande biviyan los djudyos yamados Mortara i ke aziya parte de los Estados pontifikales, los djudyos no tyenen kal (vos akodro lo ke vos konti en una emisyon de septyembre 2007, ke kuando los de Torino, ke eyos no son en los Estados Pontifikales ama en el Piemonte, tendran el derecho de fraguar un kal, de la alegriya van a fraguar un kal tan alto ke lo van a dar atras a la sivdad de Torino : la Mole Antonelliana va ser el han de pyedra el mas alto de Evropa, muncho mas alto ke el Duomo de Torino, ande esta la Mortaja ). Para aboltar a los Djudyos de Bologna, biven en chikos ghettos i no tyenen derecho de tener mosas kristyanas. 

Ama yene i por sus maldisyon, los Mortara, Shelomo dicho Momolo Levi Mortara, merkader djudyo byen konosido en la sivdad, i su mujer Marina, ke tyenen ocho kriaturas, tyenen una mosa kristyana, i esto lo van a pagar muy karo.  

El 23 de junyo 1858 a la noche, las ocho kriaturas ya estan echadas a la kama kuando, en supito, tres carabinieri, De Dominicis, Lucidi i Agostini, entran en la kaza i demandan a ver a las kriaturas.

-¿Deke ? demanda la madre, merekiyoza.

-Por favor, keremos djusto verlos. Les amostra las kriaturas una despues de otra, i kuando ayegan a la kama del mas chiko, Edgardo, ke tyene sej anyos i diez mezes (la edad tyene su importansya) el zabit les dize: Este chiko a sido bavtizado i tenemos ke yevarlo.

-Es un yerro, dize Momolo, el padre. Este chiko es djudyo komo sus ermanos i ermanas, i nunka fue bavtizado.

– Yo no se. Yo obedesko a los ordenes del Inkizidor. I trava de la kama el chiko yorando para tomarlo kon el. Los paryentes, medyos lokos de dolor, se arrodiyan para demandar piyadad al zabit, ke disho despues ke uvyera preferido vente vezes aferrar a syen ladrones i no a esta kriatura, ama los ordenes son los ordenes, i vyenen del Inkizidor Feletti.

Entremyentres el chiko esta echado en una araba, i en la misma noche yevado a Roma, en la kaza dicha de los katekumenos, lo ke kyere dizir los ke son ambezados en la fey kristyana, para ser dispuestos a resivir el bavtismo. Ama en vedra, el chiko es bavtizado esta misma noche, i le dan el nombre de Pio, komo el Papa.

¿Deke bavtizarlo kuando fue tomado sözde porke ya lo era ? La vedra es ke kuando el chiko era de 17 mezes, kayo muy hazino, i la mosa kristyana de los Mortara, Anna Morisi, ke teniya 14 anyos en este tyempo, de espanto ke el chiko se muere djudyo, aprovecho ke su madre salyo de su kamareta para meterle un poko de agua de pozo sovre la frente, para salvar su alma. Este aguamyento no era haliz bavtismo, i kaliya eskaparlo, lo ke izyeron los papazes esta misma noche ke vos esto kontando.

La mosa no aviya dicho nada durante sinko anyos, i al kavo de sinko anyos,  konto a una vizina lo ke aviya echo, la vizina lo konto al Inkizidor Feletti, el inkizidor eskrivyo pishin a Roma, i es el papa el mismo ke dyo este orden kriminal de aferrar al chiko.

El orden era kriminal, mismo asigun la ley katolika, ke de toda manera era kriminala eya misma, porke kual ke sea la razon, travar a una kriatura inosente de sus paryentes tambyen inosentes es un krimen. Ama indimas es un krimen kuando la ley, por kriminala ke es, no lo permite. De uno , la kriatura teniya solo sej anyos i diez mezes, kuando kalia tener a lo manko syete anyos para pueder ser aferrado, i de dos, komo vos dishe, el chiko no era haliz bavtizado, sino no uvyera sido menester de bavtizarlo otra vez.

Los Mortara, naturalmente, protestan i eskriven al Papa para amostrarle la injustizya ke los aharva. Ama sus protestasyones no sirven de nada. Vyendo esto, yaman por ayudo a las komunidades djudiyas, komo izyeron, antes de eyos,  los otros paryentes djudyos arrovados de sus kriaturas. Asta los Mortara, los djudyos gritavan, los kristyanos deshavan gritar, i nada se pasava. Ama esta vez, las kozas van a trokar.

Los djudyos van a ser ayudados por las opinyones puvlikas, i en primero los demokratos de Italya, partezanos de Garibaldi, eyos mismos ayudados por los demokratos de los otros paizes, i por empesar de la Fransya. Un movimyento se forma en el mundo entero, inkluyendo Amerika, en favor de los Mortara.

Los Mortara se van de Bologna, i van a morar en Torino, ke komo ya lo dishe, se topa en Piemonte i no en los Estados del Papa, i de aya Mortara se va en todos los paizes d’Evropa para demandar ayudo, i lo obtyene. Los prinsipes i reyes katolikos de Evropa, eyos mismos, komo Napoleon III o Franz Joseph de Austria, eskriven personalmente al Papa en favor de los Mortara. Los protestantes de varyos paizes azen lo mismo, i por siguro los djudyos.

Los djudyos de Almanya, kon Ludwig Philippson komo kapo, embiyan al papa una petisyon. Los djudyos de Ingletyerra azen lo mismo, i, komo ya lo konti la semana pasada, Sir Moses Montefiore vyene en persona, kon su mujer, su shohet i su djente, a Roma para demandar de ser resivido por el papa. Montefiore empesa por irse ande Odo Russel, embashador de Ingletyerra en Roma. El embashador aze su posivle, ama Su Santedad le aze saver a kada vez ke el tyempo konsagrado a las orasyones i a los echos de la Iglesya no le permiten de resivir al djudyo venido desde Ingletyerra djusto para verlo. Kon munchas difikultades, el embashador eskapa por obtener ke Montefiore i el sean resividos por el Sekretaryo de Estado, el Kardinal Antonelli. El kardinal los resive kon frio i les dize d’en primero ke no tyene muncho tyempo.

– Sir Montefiore, ya savemos ke vos andaj en todas las sivdades (Damas, Saint Petersbourg, Yerushalaïm, oy Roma) syempre para kesharse.

– Es el puevlo djudyo ke se kesha.

– Vos keshaj muncho, mesklandovos de un echo interyor de la Santa Iglesya. El chiko Mortara no tyene de ver kon vos. La kuestyon es eskapada.

-El bavtismo, si uvo, fue dado por sorpreza i a eskondidas, sin el akodro de dinguno.

– ¿Ke konosej de la teolojiya kristyana ? El chiko a sido bavtizado. Arriva de mozotros, i fuertes, ay las leyes de la Iglesya. Tenemos todos ke obedeser.

-¿ Deke una kriatura djudiya de un anyo i sus desmazalados paryentes deven obedeser a estas leyes ?

-Kuando Edgardo tendra 18 anyos, o mismo 17, puedra ver si kyere a los suyos. Ama esta vez no vaj a reushir.

-¿Ke kyere dizir ?

– Kyero avlar de vuestra viktorya de Damas. Vos akodro la muerte del fratello Thomaso

– Los djudyos akuzados an sido torturados i dos son muertos de la tortura.

-Esto es lo ke se pretendyo.

-La inosensya de los djudyos a sido rekonosida.

-En la kapella de Damas, esta eskrito ke Tomaso fue matado por los djudyos.

-Esto es mintira, komo ya lo rekonosyo el firman de Mehmet Ali.

– Digame, Sir Montefiore, ¿soj byen atado kon los de Rothschild ?

-El baron Nathan Meyer Rothschild es mi kunyado i mi amigo.

– Entonses, digame, ¿kuanto pagaron los Rothschild para merkar este papel ?

-No pagaron nada, komo yo no pagi a vuestro moso para ke me enkolge mi palto.

Montefiore no pudo nada obtener. Kale dizir ke el papa Pio IX, el ke Jean-Paul II beatifiko en 2000 en mismo tyempo ke Jean XXIII, ke , el, lo meresiya muncho mas, este papa Pio IX era un antisemit ke yamava los kales djudyos kales de Satan , los djudyos syendo bueyes , perros de un puevlo duro i infiel ke un diya devra dar kuenta de la indjustisya kometida. No kaliya nada asperar de un tal ombre.

Kale saver ke unos kuantos anyos mas despues, en 1864, el mismo Pio IX, el papa ke tuvo el pontifikato el mas largo de la istorya (32 anyos, de 1846 a su muerte en 1878) izo de muevo la misma koza kon Giuseppe Coen, ijiko de un prove kunduryadji de Roma, aferrado por la polisiya i ke nunka su padre pudo mas ver. Sej otros anyos mas despues, este mismo papa va azer dechidar el dogmo de la infaiyibilita pontifikale. Kuando avla en publiko, el papa no se puede yerrar, syendo ke es inspirado por el espiritu santo.

Ama dainda estamos en el kavzo Mortara. Montefiore torno a Londres muy abatido, ama la lucha se enfortesyo. Por una vanda, aviya los ke akuzavan la Iglesya i el papa  de mantener a una Inkizisyon de la Edad Medya. Entre eyos munchos katolikos liberales. Ama a la kontra, aviya los katolikos konservadores i antisemitos, ke no entendiyan ande estava el problema, syendo ke syempre fue ansina.

Kale dizir ke el mijor argumento en favor del papa le fue dado por Edgardo Mortara el mismo, dizyendo ke se keriya azer papas, lo ke izo, ke Pio IX era komo su padre, i ke kaliya azerlo santo. Por siguro no disho syempre esto. La primera vez ke el chiko Mortara pudo ver a sus paryenyes, se metyo a yorar i a demandar de aboltar a kaza, asigurando sus paryentes ke no se olvidava de dizir el shema kadal diya. Ansina lo konto su madre en una letra a su ermana. Ama es vedra ke deshado entre las manos de los papazim, despues troko, se izo papas, i aprovo mismo de konvertir a su madre.

Ama los partizanes del papa , komo Louis Veuillot en Fransya, teniyan argumentos antisemitos, al punto ke los istoryanos azen empesar el antisemitismo moderno de la propaganda del tyempo del kavzo Mortara.

Para un Louis Veuillot, los djudyos an echo una konspirasyon internasyonala grasyas a la banka, la kuala paga a las gazetas, i esto todo para destruir el katolisismo i tomar el poder. Pio IX pensa mas o menos la misma koza i se va amostrar muy amargo kontra los djudyos, porke despues de este kavzo Mortara, es vedra ke va pedrer a poko a poko sus poderes sekulares i la mas grande parte de sus estados.

Este kavzo Mortara tuvo una otra konsekuensa. Los djudyos, i entre eyos los djudyos de Fransya, se toparon tan abatidos por lo ke afito a esta kriatura, i por la situasyon de proves i flakos ke teniyan en vedra los djudyos en tantos paizes, djusto al kontraryo de lo ke pretendiyan los antisemitos, ke pensaron ke kalya luchar.

Los djudyos fransezes liberales, kondusidos por Adolphe Cremieux, se auneron para fundar en 1860, ay djusto 150 anyos, la Alliance Israelite Universelle, ke va fraguar i dirijir eskolas fransezas en el mundo entero,  sovre todo en el Maroko i en los paizes del serkano i medyo oryente. Yo puedo dizir ke toda mi famiya de la vanda de mi padre, empesando por mi padre el mismo, se fueron en las eskolas  de la Alliance ande se ambezaron un fransez muy puro, ama tambyen el ebreo i linguas ajenas. Esto les ayudo muncho para vinir a bivir i lavorar en Fransya despues.

Agora ya vino el kavo de mi emisyon. Para konkluir, diremos ke la unyon de los djudyos no abasto para travar atras el chiko Mortara, ama un siglo mas despues, kuando uvo el famozo kavzo de los ijikos Finaly, despues de una lucha de munchos anyos por el tio de los ijikos, syendo ke los paryentes aviyan sido deportados, los chikos Finaly pudyeron ser travados atras ; agora biven en Israel.

Astal djueves ke vyene, si kyere el Dyo !