eSefarad Noticias del Mundo Sefaradi
Despues de la grande reushidad ke tuvo la selebrasion del Primer Dia Internasional del Ladino, en Disiembre del anyo pasado, kedimos kon el dezeo i la esperansa ke este sea un dia ke podremos selebrar regolarmente, kada anyo, manifestando ansi la importansia ke tiene esta lengua i su kultura para los sefaradis del mundo entero.
Orozamente, podemos dizir ke esta esperansa ya empeso a kumplirse siendo ke oganyo tambien el Dia Internasional del Ladimno fue selebrado en universidades, asosiasiones i sentros kulturales no solo de Israel, sino ke tambien de Turkia, Espanya, Argentina i Estados Unidos.
En Israel este dia fue selebrado en la Universidad Ebrea de Yerushalayim i tambien en la grande sala del Teatro de Givatayim, kon un akto ke tuvo lugar el 24 de Disiembre, en prezensia del V Prezidente del Estado i Prezidente de la Autoridad Nasionala del Ladino, el Sr Yitshak Navon, el Sr Yitshak Segol, ke su jenerozidad mos ayudo a organizar este dia de la mijor manera posible, i una numeroza asistensia ke inkluyo los shefes de los sentros akademikos i de las universidades onde se ensenya i se aze investigasiones sovre el ladino i su kultura, profesores, estudiantes i afisionados del ladino en el paiz.
El programa de este dia ke fue avierto kon las palavras de bienvenida del Sr Navon, inkluyo tambien:
- una meza redonda, dirijida por el Dr Selim Salti, kon la partisipasion de la Prof. Tamar Aleksander, el Prof. Shmuel Refael i el Sr Moshe Shaul, sovre el tema “La Djuventud i el Ladino”;
- una seleksion de kantes de Maftirim por los hazanim David Azuz, Rafael Baruh, Baruh Hason, Avraam Koen, Yaakov Koen i Avraam Sidi;
- la komedia “Kon ketuba, sinko – sin ketuba, diez”, eskrita i dirijida por Albert Anah i prezentada por el grupo “El Pasatiempo”,
- i por terminar, un konserto de kantes en ladino por la djoven i talentuoza kantadera Rinat Imanuel.
La moderadora del dia fue Fina Aharonovich ke kumplio su tarea kon muncho hen.
Kon todo el plazer ke konsintieron los ke asistieron a este dia i ke se gozaron de oyir las avlas, los kantes i la komedia en ladino, a muestra opinion, su prinsipal importansia se topa en el echo mizmo ke sienes de amantes del ladino, ke vinieron de todas las partes del paiz, manifestaron de esta manera sus interes en muestra kultura i salieron de este dia kon ka impresion ke estamos en el buen kamino para asigurar su kontinuidad.
De este punto de vista no se puede exajerar la importansia del debate ke tuvo lugar en el kuadro de la meza redonda sovre el tema de “La Djuventud i el Ladino”; debate ke permetio no solo de examinar lo ke ya es echo aktualmente afin de aserkar muestros djovenes al ladino i a su kultura, sino ke, aun mas de esto, demandarmos kualo mas devemos azer afin ke muestros djovenes, i posiblemente muestros ninyos tambien, puedan konoser i mijor apresiar la erensia kulturala de sus antepasados,
Esperemos ke las konkluziones de este debate, tal ke fueron rezumidas por el prezidente de la meza el Dr Selim Salti, seran estudiadas seriozamente por los faktores kompetentes i ke reushiremos, en el futuro, a ke un numero siempre mas grande de entre muestros ninyos i djovenes se djunten a los esforsos para ke el ladino i su kultura kontinuen ainda, sigun uzamos dizir en muestra tradisional bindision, a “bivir, kreser i enfloreser”.
De «Aki Yerushalayim» numero 96 – Disiembre 2014 (ver completo aqui)
