eSefarad Noticias del Mundo Sefaradi
Sigun el Prof. Haim Vidal Sephiha i otros investigadores tambien de la kultura djudeo-espanyola, “ladino” es el nombre de la lengua-kalko uzada para trezladar la Biblia del ebreo al espanyol, ainda antes de la ekspulsion de los djudios de Espanya. Segun eyos, esta es una lengua uzada unikamente para butos relijiozos i didaktikos, mientres ke la lengua vernakular, de kada dia, devria ser yamada djudezmo, djudio, djudeo-espanyol, spanyol, spanyolit etc.; ma en muestros dias, la mayoria de la djente prefera uzar el termino “ladino” para la lengua avlada i eskrita de los sefaradis, desendientes de los djudios ekspulsados de Espanya en 1492.
En los paizes onde se aresentaron estos ekspulsados, eyos kontinuaron a avlar las lenguas ke avlavan antes de la ekspulsion: prinsipalmente el kastilyano i tambien katalan, aragonez etc., sigun puede ser visto del sigiente testimonio de Gonzalo de Illescas, un viajador espanyol del siglo 16 ke eskrivio, en su livro “Historia Pontifical”:
Pasaron muchos a Constantinopla, Salonica, el Cairo y Berberia. Llevaron de aca nuestra lengua y todavia la guardan y usan de ella de buena gana…”
El ladino reflekta la gramatika, el vokabulario i la fonetika del kastiliano del siglo 15, ma kuanto mas los sefaradis se alesharon jeografikamente de Espanya, eyos fueron kortados mas i mas del dezvelopamiento del kastilyano i el ladino tuvo una evolusion diferente. En Amsterdam, Ingletierra i Italia onde venian munchos “kristianos muevos” ke fuiyan de la Inkizision, los djudios tenian un kontakto permanente kon Espanya i eyos kontinuaron a avlar el kastiliano de sus epoka; ma en las komunidades sefaradis del Inperio Otomano, la lengua ke avlavan no solo ke konservo palavras arkaikas ansi ke la vieja fonetika del kastiliano, sino ke adopto tambien numerozas palavras del ebreo, portugez, grego, turko, fransez etc.
En Maroko el ladino tuvo una evolusion diferente. Adoptando palavras del espanyol, ebreo i arabo se kreo una lengua yamada haketia ke oy ya desparesio kaje kompletamente komo lengua avlada. Ma en los paizes del Imperio Otomano, el ladino se mantuvo asta muestros dias, kon su vokabulario i su fonetika espesiales, aun ke ay siertas diferensias en la manera de la kuala lo avlan los djudios de Turkia i Rodes, ke sus lengua es bazada sovre el kastiliano, i de la otra parte, los djudios de Gresia, Makedonia, Bosnia, Serbia, Bulgaria i Rumania, ke prezervaron algunas karakteristikas de la avla del norte de Espanya i de Portugal.
Durante la mayor parte de su istoria el ladino fue eskrito kon letras rashi, ma desdel prinsipio del siglo 20 el empeso a ser eskrito kon letras latinas.
A lo largo del tiempo el ladino fue avlado en el Norte de Afrika, Ejipto, Turkia, Gresia, Yugoslavia, Bulgaria, Rumania, Fransia, Israel, i en uma mizura mas chika, en Estados Unidos i Amerika latina. Los sefaradis ke emigraron a paizes latinoamerikanos se embezaron muy presto a avlar el espanyol moderno, i los ke emigraron a otros lugares tambien adoptaron la lengua del paiz onde se aresentaron. Al prinsipio del siglo 20, kon la aplikasion de las leyes de estudio en las eskolas en la lengua nasionala de kada paiz, el ladino empeso a pedrer terreno, a ser avlado kada vez menos, i la emigrasion de Turkia i de los Balkanes a Israel enfuertesio este proseso ainda mas.
En la II Gerra Mundiala los nazis destruyeron la mayoria de las komunidades djudias de Evropa onde el ladino era la lengua materna, i este fue un golpe ainda mas duro a esta lengua i su kultura. Djuntos kon esto i kontrariamente a la opinion pesimista del mundo akademiko sovre el futuro del ladino, en estos ultimos anyos estamos asistiendo a un renasimiento en el intereso enverso esta lengua i su kultura, aun mas i mas en Israel onde bive oy el mas grande numero de djudios en el mundo ke avlan en ladino, i onde es aktiva la Autoridad Nasionala del Ladino, fondada en 1997 para mantener i promover la kultura djudeo-espanyola.
Fuente: ANL
Ayude a la Autoridad Nacional del Ladino apoyando el petitorio para que continúe el mantenimiento de la misma en https://www.petitionbuzz.com/petitions/salvarladino
[print_link]
Somos muntchos ke no keremos precisamente ke se meklen las dos palavras. EL LADINO NO SE AVLA.
En Marruecos, el Ladino se quedo la lengua escrita, y para hablar era la Haketia: igualmente como el Djudezmo o Spaniolit de los Judios Otomanes. El base de la Haketia es Castellano del siglo XV con palabras del Hebreo, Arabe-Marroqui, Portuguese, Frances, Ingles y afilu Italiano. En el siglo XX palabras del Espanol contemporaneo fueron a reemplazndo palabras Castellanas Antiguas en La Haketia.
Nuestor Ladino y vuestro Ladino (el verdadero) es igual!
Saludos Judeo-Espanoles a todos,
Alicia
LA LINGUA DE LOS SEFARADIS ES EL ESPANYOL
EN REPUESTA AL ARTIKOLO DEL PRIMO DE DESIEMBRE 2011 :
EL LADINO (DJUDEO-ESPANYOL)
YO DIGO KE LA LINGUA DE LOS SEFARADIS ES EL ESPANYOL, EL DJUDEO-ESPANYOL O EL DJUDYO EN KURTO.
Keridos Amigos, des de anyos, egzaktamente de kuando ke se fundyo la Autoritad del Ladino en Yerushalayim kon Itshak Navon(El exPresidente
del Estado de Israel)i unos kuantos de sus amigos,se esta esfuersando de azer todo para trokar el nombre de muestra lingua, ke komo todos lo
savesh, es el Espanyol (Judeo o Sefaradi ma Espanyol !)
Visto sus pozisyones de hombres importantes i sponsorizados por el Estado de Israel, ke por seguro ke kere guadrar la erensya de su
puevlo Sefaradi komo el de su puevlo Ashkenaz, este grupo se enkargo de reprezentar TODOS los judyos sefaradis del mundo entero,deklaro ke la lingua se yama el «Ladino», troko la vieja ortografia uzando esta vez el alfabet fonetiko (lo ke se aksepto porke todos aklamaron kon alegriya la publikasyon de esta autoritad, la unika revista en Djudeo
Espanyol, Aki Yerushalayim ke era en sus lingua, ke maraviya !) De la mizma manera el jurnal SHALOM – EL AMANESER adopto la ortografiya
fonetika ke de toda manera konveniya a un jurnal publikado en Turkiya ande se uza el alfabet fonetiko.
Komo lo savesh, el Djudeo Espanyol no se ambezo en las eskolas. Era una lingua ke se pasava de madre a kreaturas. Las famiyas edukadas por
seguro ke teniyan una lingua mas elaborada, mas limpya en su vokabularyo, en sus ekspresyones i su gramatika ke el resto del puevlo ke era a mitad inyorente o de poka edukasyon i kultura.
Ke se kera o no esto se refletava en la lingua i en la manera de avlar. Ademas, kada sivdad (para no dizir kartye !) desvelopo su jargon, sus biervos a mitad justos o enteramente charpeyados seya kon la enfluensya de la lingua lokal ( turko, grego, arabo, bulgaro ets. i
Fransez mas tadre para enalteser la lingua ! ) seya porke de madre a kreatura el biervo se trokava al oyido kon tiempo o puedeser mizmo
kon el kontakto de los romaniotes, los judyos lokales del Emperyo Bizantino konkistado i ke se topavan en estos territoryos kuando los
sefaradim yegaron a las diferentes sivdades del Emperyo Ottomano.
(komo kura >> medisina >> melizina ets)
Dunke, no todos avlaron egzaktamente de la mizma manera i por dizir la vedra, al empesijo, muncha jente ke emigraron a otros payizes de
la Turkiya i mizmo de Istanbul eran o
a. los mas rikos, edukados, kultivados dunke avlando el Espanyol Sefaradi a un alto nivel o
b. los mas proves, de poka edukasyon i kultura dunke un nivel muy pasable de la lingua maternal MISMO si estos se izyeron profesores mas tadre en los payizes ke emigraron ma en la lingua del payis ke emigraron i NO en Espanyol Sefaradi.
Muy munchas vezes me tiene afitado de oyir la gente avlar muestra lingua o avlar yo mismo kon eyos, gente valoroza, edukada i de alto nivel sosyal i profesyonal i kedi sorprendida de la simplisita de sus linguas o de lo yerrado ke avlavan. Dunke kuando se trata de la lingua Espanyol Sefaradi, i solo en este kavzo, a la eksepsyon de los ke se estan ambezando agora la lingua en las universitas i kon profesores lisensyados, no me abasta del todo el statu de la persona i de kuantos universitas es diplomada !
De la mizma manera, personas ke no izyeron estudyos altos ma ke se engrandesyeron en buenas famiyas, kultivadas i entornadas de personas
savidas i edukadas avlan la lingua pura, kon biervos i frazas justas, eskspresyones elaboradas.
Ay dayinda muncho de lavorar para standardizar muestra lingua. Los pokos livros ke egzisten tienen dayinda sonoritas gregas, fransezas, turkas, italianas, serbias o lo mas kastilyanas.
El espanyol sefaradi puro de Istanbul lo oygo poko. Por seguro ke uno ke avla muestra lingua entyende todo, mizmo el ke avla solo Kastilyano entyende muestra lingua i mozotros las suyas, ma penso ke kuando se avla de una Autoritad (biervo ke me da frios en la espalda porke suona komo «forsar» «kontrolar» «kastigar» «ke no se
puede alkansar») se espera de tomar en konsiderasyon otros kriteryos a parte de los de unas kuantas personas en el deredor de una meza…
Tener mas «antenas» de kualo se esta pasando en el mundo sefaradi i la vedra konsiderar las verdaderas Autoritades sertifiadas, profesores komo Hayim Vidal Sephiha ke konsakro su vida a muestra kultura i muestra lingua, un judyo sefaradi ke malgrado su edad avansada no kedo de ser aktivo i dayinda se esta batyendo kon toda su fuersa por el futuro del Judeo-Espanyol. … Kon todos sus livros, konferansas, atelyes de avla en Djudeo-Espanyol, sus elevos a ken ambezo su immenso saver, su intelijensya i su imbatable dezeo de adelantar el sefaradizmo, tan linguistikamente ke sosyalmente i kulturalmente.
Arresivi del Maestro Hayim Vidal SEPHIHA un eskrito ke me plazyo muncho, no solo porke era humoristiko fina un sierto grado ma porke
metiya klaramente en medyo lo absurdo ke era de nombrar muestra lingua «Ladino» (Judeo Espanyol kalko, komo eskrito en los livros
liturjikos i didaktikos en letras kuadradas (RASHI)) alora ke el Djudezmo (avlado por los Sefaradis orijinaryos de Gresya) Judeo-Espanyol vernakulo (la avla de kada diya) es diferente. Las diferensyas se notan no solo en los biervos ma en la manera de konjugar los verbos
Esto de avizo ke no puede aver mijor autoritad del puevlo ke uza su lingua komo se lo ambezo de siempre kon los suyos !
Ademas en un eskrito de un amigo de ESPANA resivi una aklarasyon ke me da a pensar….. Me dize : » Un Ladino es un desconfiado que
busca y rebusca por que no se fia de lo que los demas les exponeno le ofrecen. Pero el intenta enganar a los demas de una forma sibilina o ladina, (disimulada). »
Judyos = Enganyar ! Disimulasyon !…. NO !
Sharope blanco
en SEFARADIMUESTRO
Alguien sabe qué esfuerzos puedo hacer para aprender y preservar la lengua judeoespañola estando en América Latina? He estado aprendiendo hebreo hace un rato y el judeoespañol no me deja de fascinar, además de un importante legado cultural que no quiero que desaparezca.
Hola, en dondevives? En Buenos Aires tenes un curso de ladino, puedes encontrar información en esefarad.com