Sefer Tora en Djudeo Espanyol – Transkrivida kon letras latinas del livro por Ye’huda Sidi / SHEMOT: 15 BO (10 a 13)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

15 – BO

10

¹I disho A’ a Moshe: entra a Paro; porke yo apezgi su korason, i el korason de sus syervos, para poner estas mis senyales entre eyos; ²i para ke kontes en las orejas de tu ijo, i el ijo de tu ijo, lo ke ovri en Ayifto, i mis senyales ke puzi entre eyos; i para ke sepash ke yo soy A’. ³I vino Moshe i A’haron a Paro, i le disheron: ansi dize A’, el Dyo de los Ebreos, ¿asta kuando no keras umilyarte delante de mi? solta a mi puevlo para ke me servan. ⁴Porke si no kyeres soltar a mi puevlo, ek, yo traere manyana langosta en tu termino. ⁵I kuvrira las [1]fases de la tyerra, ke no se podra ver la tyerra; i komera el resto ke se eskapo, lo ke vos a kedado del pedrisko, i komera todo arvol ke ermoyese para vozotros del kampo. ⁶I inchiran tus kazas, i las kazas de todos tus syervos, i las kazas de todos los Aisyanos kual nunka vyeron tus padres, ni los padres de tus padres dezde el dia de su ser sovre la tyerra asta este dia. I se bolto, i salyo de kon Paro.

⁷I los syervos de Paro le disheron: ¿asta kuando nos sera este por enkampamyento? solta a los varones, para ke servan a A’ su Dyo. ¿Dainda no saves ke Ayifto esta deperdido? ⁸I Moshe i A’haron fueron echos tornar a Paro; i el les disho: andad, servid a vuestros Dyo. ¿Kyen i kyen son los ke an de andar? ⁹I disho Moshe: kon nuestros ninyos i kon nuestros vyejos andaremos; kon nuestros ijos i kon nuestras ijas, kon nuestras ovejas i kon nuestras vakas andaremos; porke tenemos fyesta de A’. ¹⁰I el les disho: ansi sea A’ kon vozotros, komo soltare a vozotros i a vuestras famiyas; mirad ke mal esta delante de vuestras fases. ¹¹No sera ansi. Andad agora los varones, i servid a A’; porke esto bushkastesh. I los echaron de la prezensya de Paro.

¹²I disho A’ a Moshe: estyende tu mano sovre la tyerra de Ayifto para la langosta, para ke suva sovre la tyerra de Ayifto, i koma toda yerva de la tyerra, todo lo ke el pedrisko desho. ¹³I estendyo Moshe su vara sovre la tyerra de Ayifto, i A’ gio un vyento solano sovre todo akel dia, i toda la noche; i kuando fue la manyana, el vyento solano trusho la langosta. ¹⁴I suvyo la langosta sovre toda la tyerra de Ayifto, i pozo en todo el termino de Ayifto, muy pezgada; antes de eya no uvo tal langosta, ni despues de eya avra tal. ¹⁵I kuvryo las fases de toda la tyerra i se eskuresyo la tyerra; i komyo toda yerva de la tyerra, i todo el fruto de los arvoles ke avia deshado el pedrisko; i no kedo ninguna verdura en los arvoles, i en la yerva del kampo, en toda la tyerra de Ayifto.

¹⁶I se apresuro Paro a yamar a Moshe i a A’haron; i disho: peki kontra A’ vuestro Dyo, i kontra vozotros. ¹⁷I agora, te rogo, perdona mi pekado solamente esta vez, i azed orasyon a A’ vuestro Dyo, ke kite de sovre mi solamente esta muerte. ¹⁸I salyo de kon Paro, i izo orasyon a A’. ¹⁹I A’ bolvyo un vyento oksidental muy fuerte, i yevo la langosta, i la echo en el mar ruvyo; ni una langosta kedo en todo el termino de Ayifto. ²⁰I A’ enduresyo el korason de Paro, i no solto a los ijos de Yisrael.

²¹I disho A’ a Moshe: estyende tu mano a los syelos, i avra eskuridad sovre la tyerra de Ayifto, eskuridad ke se puede palpar. ²²I estendyo Moshe su mano a los syelos; i uvo eskuridad de tinyevla en toda la tyerra de Ayifto tres dias. ²³Ninguno vido a su ermano, i ninguno se levanto de su lugar por tres dias; ma todos los ijos de Yisrael tenian luz en sus moradas.

²⁴I yamo Paro a Moshe, i disho: andad, servid a A’; solamente sean deshadas vuestras ovejas i vuestras vakas; vayan tambyen vuestras famiyas kon vozotros. ²⁵I Moshe disho: tambyen tu nos daras sakrifisyos i alsasyones, para ke agamos sakrifisyos a A’ nuestro Dyo. ²⁶I nuestro ganado tambyen andara kon nozotros; no sera deshada ni una unya; porke de esto tomaremos para servir a A’ nuestro Dyo; i no savemos kon ke tenemos ke servir a A’ asta ke vengamos aya. ²⁷I A’ enduresyo el korason de Paro, i no kijo soltarlos. ²⁸I le disho Paro: vate de mi; guardate ke no veas mas mis fases; porke en el dia ke vyeres mis fases, muriras. ²⁹I disho Moshe: byen avlaste, no vere mas tus fases.

[1] Ebreo: ojo

11

¹I disho A’ a Moshe: una yaga mas traere sovre Paro, i sovre Ayifto, despues de kual vos soltara de aki. En soltando, desterrar vos desterrara de aki del todo. ²Avla agora en las orejas de puevlo ke demanden kada uno de su kompanyero, i kada una de su kompanyera, djoyas de plata i djoyas de oro. ³I A’ dyo grasya al puevlo en los ojos de los Aisyanos. Tambyen el varon Moshe era muy grande en la tyerra de Ayifto, en los ojos de los syervos de Paro, i en los ojos del puevlo.

⁴I disho Moshe: ansi dize A’: a medya noche yo saldre en medyo de Ayifto: ⁵i murira todo primodjenito en la tyerra de Ayifto, dezde el primodjenito de Paro asentado sovre su siya, asta el primodjenito de la syerva ke esta detras del molino; i todo primodjenito de las kuatropeas. ⁶I avra esklamasyon grande en toda la tyerra de Ayifto, ke komo eya nunka uvo, i komo eya nunka avra. ⁷Ma en todos los ijos de Yisrael no avra perro ke movera su lingua; dezde el varon asta la kuatropea; para ke sepash ke aparta A’ entre los Aisyanos i Yisrael. ⁸I desenderan a mi todos estos tus syervos, i se enkorvaran a mi dizyendo: sal tu, i todo el puevlo ke esta sometido a ti. I despues de esto saldre. I salyo de kon Paro kon eresimyento de fulor.

⁹I disho A’ a Moshe: Paro no vos eskuchara, para ke se muchiguen mis maraviyas en la tyerra de Ayifto. ¹⁰I Moshe i A’haron izyeron todas estas maraviyas delante de Paro; i A’ enduresyo el korason de Paro, i no solto a los ijos de Yisrael de su tyerra.

12

¹I avlo A’ a Moshe i a A’haron en la tyerra de Ayifto, dizyendo: este mez vos sera prinsipyo de los mezes; ²el vos sera primero en los mezes del anyo. ³Avlad a toda la kompanya de Yisrael, dizyendo: a los dyez de este mez, tomen para eyos kada uno un karnero, por la kaza de los padres, un karnero por kada kaza. ⁴I si la kaza fuere poka por el karnero, entonses lo tomara el i su vezino serkano a su kaza, segun el numero de las personas; kada uno segun su komer kontaresh sovre el karnero. ⁵El karnero sera a vozotros sano macho, de edad de un anyo; de las ovejas o de las kavras lo tomaresh. ⁶I lo guardaresh asta los katorze dias de este mez; i lo degoyaran todo el apanyamyento de la kompanya de Yisrael entre las tardes. ⁷I tomaran de la sangre, i pondran sovre los dos postes de la puerta, i sovre el dintel de las kazas en ke lo komeran. ⁸I komeran la karne en akeya noche, asada al fuego, i sensenyas; kon yervas amargas lo komeran. ⁹No komash de el krudo ni kocho kozinado kon agua, sino asado al fuego, su kavesa kon sus pyernas, i kon sus entranyas. ¹⁰I no deshesh kedar de el asta la manyana; i lo ke kedare de el asta la manyana, lo kemaresh en el fuego. ¹¹I ansi lo komeresh: vuestros lumbos senyidos, vuestros sapatos en vuestros pyes, i vuestro palo en vuestra mano; i lo komeresh kon apresuransa. Paskua es a A’. ¹²I pasare por la tyerra de Ayifto esta noche, i erire a todo primodjenito en la tyerra de Ayifto, dezde el ombre asta la kuatropea; i en todos los dyozes de Ayifto are djuisyos. Yo A’. ¹³I la sangre vos sera por senyal sovre las kazas onde estuvyeresh; i vere la sangre, i pasare sovre vozotros, i no avra en vozotros mortaldad para danyar, kuando yo erire la tyerra de Ayifto. ¹⁴I este dia vos sera por membrasyon; i lo aresh fyesta a A’ por vuestros djerenansyos; por fuero de syempre lo aresh fyesta. ¹⁵Syete dias komeresh sensenyas; en el primer dia mizmo baldaresh levadura de vuestras kazas: porke todo el ke komyere levdo dezde el primer dia asta el seten dia, akeya alma sera tajada de Yisrael. ¹⁶I en el primer dia avra yamadura santa i en el seten dia yamadura santa avra a vozotros; ninguna ovra se ara en eyos, sino lo ke toda persona uvyere de komer, esto solamente se ara por vozotros. ¹⁷I guardaresh la fyesta de las sensenyas; porke en este mizmo dia saki vuestros fonsados de la tyerra de Ayifto; por tanto guardaresh este dia por vuestoros djerenansyos por fuero de syempre. ¹⁸En el mez primero, a los katorze dias del mez en la tarde, komeresh sensenyas, asta el dia vente i uno del mez en la tarde. ¹⁹Syete dias no sea ayada levadura en vuestras kazas; porke todo el ke komyere levdo, akeya alma sera tajada de la kompanya de Yisrael, o sea pelegrino o nativo de la tyerra. ²⁰No komash ningun levdo; en todas vuestras moradas komeresh sensenyas.

²¹I yamo Moshe a todos los vyejos de Yisrael, i les disho: sontraed, i tomadvos ovejas segun vuestras famiyas, i degoyad la paskua. ²²I tomad un manojo de oregano, i mojaldo en la sangre ke esta en la basina, i untad el dintel i los dos postes kon la sangre ke esta en la basina; i no salga ninguno de vozotros de la puerta de su kaza asta la manyana. ²³Porke A’ pasara para erir a los Aisyanos; i komo vera la sangre sovre el dintel, i sovre los dos postes, A’ pasara sovre la puerta, i no deshara entrar al danyador en vuestras kazas para erir. ²⁴I guardaresh esta koza por fuero a ti i a tus ijos para syempre. ²⁵I sera, ke kuando entraresh en la tyerra ke A’ vos dara, komo avlo, guardaresh este servisyo. ²⁶I sera, ke kuando vos disheren vuestros ijos: ¿ke kyere dizir este servisyo vuestro? ²⁷Diresh: es el sakrifisyo de la paskua a A’, ke paso sovre las kazas de los ijos de Yisrael en Ayifto, kuando eryo a los Aisyanos, i eskapo a nuestras kazas. I el puevlo se umilyaron, i se enkorvaron. ²⁸I los ijos de Yisrael fueron, i izyeron komo A’ avia enkomendado a Moshe i a A’haron, ansi izyeron.

²⁹I akontesyo ke a la medya noche A’ eryo a todo primodjenito en la tyerra de Ayifto, dezde el primodjenito de Paro asentado sovre su siya, asta el primodjenito del kativo ke estava en la prizyon; i todo primodjenito de kuatropea. ³⁰I se levanto Paro de noche, el i todos sus syervos, i todos los Aisyanos; i avia esklamasyon grande en Ayifto; porke no avia kaza onde no uvyese muerto. ³¹I yamo a Moshe i a A’haron de noche, i disho: levantadvos, salid de en medyo de mi puevlo, tanto vozotros komo los ijos de Yisrael; i andad servid a A’, komo avlastesh. ³²Tomad tambyen vuestras ovejas i vuestras vakas, komo avlastesh, i andadvos, i bendizidme tambyen. ³³I los Aisyanos esforsavan al puevlo, apresurandose para enbiarlos de la tyerra, porke dizian: todos somos muertos. ³⁴I yevo el puevlo su masa antes ke se levdara, sus amasaderas atadas en sus savanas sovre sus ombros. ³⁵I los ijos de Yisrael izyeron segun la palavra de Moshe, i demandaron de los Aisyanos djoyas de plata, i djoyas de oro, i vestidos. ³⁶I A’ dyo grasya al puevlo en los ojos de los Aisyanos; i los izyeron demandar. I espojaron a los Aisyanos.

³⁷I apartyeron los ijos de Yisrael de Ramses a Sukot, komo seshsyentos mil varones a pye, afuera de las famiyas. ³⁸I tambyen una grande meskla de djente suvyo kon eyos; i ovejas i vakas, ganado muy mucho. ³⁹I kozyeron tortas sensenyas de la masa ke sakaron de Ayifto, porke no se levdo; porke fueron desterrados de Ayifto, i no pudyeron detenerse, ni aun se avian aparejado vianda.

⁴⁰I la estada de los ijos de Yisrael, ke moraron en Ayifto, fue kuatrosyentos i trenta anyos. ⁴¹I fue al fin de kuatrosyentos i trenta anyos, fue en este mizmo dia, ke salyeron todos los fonsados de A’ de la tyerra de Ayifto. ⁴²Esta es noche de ser guardada a A’ por averlos sakado de la tyerra de Ayifto; esta es la noche de ser guardada a A’ por todos los ijos de Yisrael en sus djerenansyos.

⁴³I disho A; a Moshe i a A’haron: este es el fuero de la paskua: ningun estranyo koma de eya. ⁴⁴Ma todo syervo de varon komprado kon moneda, kuando lo uvyeres sirkunsido, entonses komera de eya. ⁴⁵El moradizo, i el alkiladizo no koma de eya. ⁴⁶En una kaza sera komida; no sakes nada de la karne afuera de la kaza; ni kevresh gueso en el. ⁴⁷Toda la kompanya de Yisrael la aran. ⁴⁸I kuando algun pelegrino pelegrinare kontigo, i kijyere azer la paskua a A’, sea a el sirkunsido todo macho, i entonses se ayegara para azerla, i sera komo el nativo de la tyerra; ma ningun serrado koma de eya. ⁴⁹La mizma ley sera al nativo de la tyerra, i al pelegrino ke pelegrinare entre vozotros. ⁵⁰I todos los ijos de Yisrael izyeron komo A’ enkomendo a Moshe i a A’haron, ansi izyeron. ⁵¹I fue en akel mizmo dia ke A’ sako a los ijos de Yisrael de la tyerra de Ayifto por sus fonsados.

13

¹I avlo A’ a Moshe, dizyendo: ²santifikame todo primodjenito, la avertura de toda bulba en los ijos de Yisrael, tanto del ombre komo de la kuatropea; mio es. ³I disho Moshe al puevlo: membrad este dia, en el kual salistesh de Ayifto, de la kaza de syervos; porke kon fortaleza de mano vos sako A’ de aki; i no sea komido levdo. ⁴Oy vozotros salesh en el mez de Aviv. ⁵I sera, ke kuando A’ te trushere a la tyerra del Kenaanio, i del Hitio, i del Emorio, i del Hivio, i del Yevusio, ke djuro a tus padres ke te daria, tyerra ke mana leche i myel, serviras este servisyo en este mez. ⁶Syete dias komeras sensenyas, i en el seten dia, avra fyesta a A’. ⁷Sensenyas komeran por los syete dias; i no sera visto levdo kontigo, i no sera vista levadura kontigo en todo tu termino. ⁸I kontaras a tu ijo en akel dia, dizyendo: esto se aze por lo ke A’ izo a mi en mi salir de Ayifto. ⁹I te sera por senyal sovre tu mano, i por membrasyon entre tus ojos, para ke la ley de A’ este en tu boka; porke kon mano fuerte te sako A’ de Ayifto. ¹⁰Por tanto guardaras este fuero en su plazo de anyo en anyo.

¹¹I sera, ke kuando A’ te trushere a la tyerra de Kenaanio, komo djuro a ti i a tus padres, i te la dyere, ¹²aras pasar a A’ toda avertura de bulba, i todo primerezo, paridura de las kuatropeas ke tuvyeres; los machos seran para A’. ¹³I todo primerozo de azno regmiras kon karnero; i si no lo regmyeres, entonses lo desservigaras. I todo primodjenito de ombre entre tus ijos regmiras. ¹⁴I sera, ke kuando preguntare tu ijo manyana, dizyendo: ¿ke es esto? le diras: kon fortaleza de mano nos sako A’ de Ayifto, de la kaza de syervos. ¹⁵I fue, ke kuando se enduresyo Paro para no soltarnos, mato A’ a todo primodjenito en la tyerra de Ayifto, dezde el primodjenito del ombre asta el primodjenito de la kuatropea; por tanto yo sakrifiko a A’ toda avertura de bulba, los machos; i todo primodjenito de mis ijos regmo. ¹⁶I sera por senyal sovre tu mano, i por frentales entre tus ojos; porke kon fortaleza de mano nos sako A’ de Ayifto.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.