“Antolojía de Kuentos Sefaradíes” Kapítolo I: Kuentos de Kulli: 4. UNA DEMANDA DEL REY ALEKSANDRO* por Liliana Benveniste

Ver todos los artículos de esta sección

“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979

4. UNA DEMANDA DEL REY ALEKSANDRO*

Un rey grande i temerozo puvlikado por el mundo, yamado por nombre Aleksandro Mokdón, ke fue rey de Yawan 12 anyos i arodeo el mundo entero, kuando fue por la parte de Darom les demandó a los viejos de la sivdad:

– Kero irme a la sivdad de Áfrika.

Le dijeron:

– No es posivle ke puedas ir, siendo ke ay en el kamino unas montanyas eskuras.

Disho a elyos:

– Sin ir yo ahí no puede ser. I no demando de vozotros otro ke me digash ke modo será mi rejo a ke pueda ir.

Disheron a él:

– Toma unos kuantos aznos grandes de los de Mizrayim, ke saven kaminar bien al eskuro, i unos kuantos manojos de kuedras, i kuando estes serka de las montanyas eskuras atarás un kavo an el lugar ke empesa a eskureser, i resto de la kuedra en tu mano i no la soltes, para ke kuando avoltes te vayas travando de las kuedras i no piedras el kamino.

I ansí se fue ke por akeos lugares i entró en una sivdad de mujeres, ke no avia ombre ahí. Kijo odrenar batalya kon eyas. Le disheron:

– No azesh bien de gerear kon mozotras, ke si mos matas ninguna fama tenesh, lo ke se dize es ke matatesh mujeres; pero si mozotros matamos a ti, serás menospresyado en bola del mundo, diziendo: “ – Un rey komo Aleksandro su fin fue matado por mano de mujeres”.

Disho a eyas:

– Traeme pan.

Trusheron un pan de oro en meza de oro. Disho él:

– Pos ke, ¿esto es komida de djente en este lugar?

Eyas le disheron:

– No uzamos aki a komer pan de oro; ma siendo te vimos venir a tal lugar leshos, mos maraviyamos muncho, diziendo: “Pos ké, ¿no tenías ke komer en tu sivdad, ke te aleshates de tu reinado a venir aki?”. I siendo ansí, entendimos ke tu venida fue para komer dinero, i por esto te trushimos pan de oro.

Kuando salyo de akea sivdad, eskrivió en la puerta: “ – Yo, Aleksandro, fui loko asta ke vine en esta sivdad de mujeres i akí deprendí sensya”.

En medio del kamino se asentó serka de la fuente a komer pan i peshkado salado. Estando lavando el peshkado dientro del agua a kitarle la salmora, asopló un viento de akea fuente kon un guesmo muy bueno ke retornava la alma. Disho entre si: “ –Parese ke este manadero es venido de las aguas de Ganeden”. Tomó akea agua i se lavó la kara i se voltó a su kamino. I ay ken dize ke se entro dientro del manadero i fue kaminando asta ke ayegó a la puerta de Ganeden, i alsó su voz disiendo:

– ¡Avreme a mí la puerta!

Le respondieron diziendo:

– Esta puerta es apropyada para los temerozos de el Dyo i los djustos vendrán en él.

Disho:

– Yo so rey estimado, i siendo ya vine asta akí, dame alguna koza.

Le dieron una koza redonda. Kuando vino a kaza la kijo pezar, i metyó todo su oro i su plata enfrente del pezo, i no se alevantó el pezo de la tierra. Se fue a los jajamim i les disho:

– Kero ke me desh a entender ké modo de koza puede ser esta ke kontrapeza tanto.

Le disheron:

– Savrás ke esto ke te dieron es oro de presona, ke no ay artamiento para el, ke kuanti mas tiene, mas kere.

Disho el rey:

– ¿Ken me dirá ke ansí es?

Le disheron:

-La preva de esto ke, metiendo un poko de tierra sovre el, veresh ke kon kualkier koza poka se alevanta el pezo.

I ansí lo izo, i resivyó de avizo ke el ojo de la presona no se arta en este mundo de dingún modo asta ke muere i le echan tierra dientro de los ojos.

– – – – – – – – – – –

* El komentario del Kulli al Djenesis empesa kon las diez demandas ke izo Aleksandro Mokdón (Magno) a los savios de las komunitades djudias ke enkontró en sus konkistas por el Oriente serkano. Estos episodios lejendarios tratan de azer notar el injenio i el saber djudayko frente a la kultura grega, simbolizada por el rey de la Makedonya. Kulli las arekojio de manaderos diversos, prinsipalmente del tratado Tamid i del Livro de los Linajes. El otor, despues del dialogo de sujeto dékuplo (diez vezes diez), en el ke los savios djudyos vensieron en toda la linea, ajunta una muestra del debil simbolo ke es la kodisia del ombre, ke enkontramos en los folios 1 d-2ª, de la edision orijinala (Izmir, 1864), i pp. 56-57 de muestra trasliterasion (tomo I de la Biblioteka Universal Sefardí, Gredos, Madrid, 1969).

——————————————–

Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo I: Kuentos de Kulli