“Antolojía de Kuentos Sefaradíes” Kapítolo I: Kuentos de Kulli: 3. DEKLARASION DE BIENES* por Liliana Benveniste

Ver todos los artículos de esta sección

“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979

3. DEKLARASION DE BIENES*

A un gebir, ke era muy rikísimo i afamado por el mundo, le preguntó el rey ke le dishese kuanto era su kavdal. Le respondyó, diziendo:

• Por la kaveza del Rey, ke no tengo mas ke tanta suma.

Muncho se aravyó el rey kon el, diziendole:

• ¿Komo tienes animo de djurar mi vida en falso, siendo las dichas ke sé yo, ke tienes dos tantos más de lo ke me dijites?

Le disho el gebir:

– Sabrás, senyor, ke yo te arespondia según tus propias avlas, ke para lo ke me demandates kualo es mi kavdal, te respondí ke es tanto, ke dicha suma es la moneda ke ya la tengo espartida en azer tzedaká i mitzvot, i maasim tovim i hekdeshot, i gemilut hasadim, ke akelyo se lyama ke es mi kavdal, ke ninguno puede tomarlos de mi mano; lo kual ke akelyas bolsas de moneda ke saves ke tengo, i tambien las demás, no las tengo por kavdal, siendo puede ser ke vengan ladrones i se las tomen, i ke se kemen en el fuego o kon otro modo de dezastre.

Muncho le plazió a el rey esta respuesta, siendo ke fue djusta i razonavle, ke siertamente ningun kavdal tiene la persona sino la moneda ke gasta en azer mitzvot i tzadakot, ke akelya ke lyama ke es sulya.

– – – – – – – – – – –

* Enlasa en el orijinal kon el relato “Los Ijos de un Rey” i viene del mizmo manadero, para ilustrar al meldador sovre kual es la verdadera rikesa kon ke el ombre puede kontar.

——————————————–

Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo I: Kuentos de Kulli