eSefarad Noticias del Mundo Sefaradi
Ver todos los artículos de esta sección
“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979
———————————————————–
13. EL PESKADO PODRIDO
Un rey le disho a su esklavo:
– Va, merkame peshkado de la plasa
Fue i le trusho un peshkado fediondo. Se aravio el rey kon el i le disho:
– Un de tres kozas asentensyo sovre ti ke agas: O ke lo komas tu este peshlado; o ke lyeves sien palos; o ke des sien groshes de kastigo por el yerro ke izites de menospresiar en mi kavod.
Disho el esklavo ente sí: «-Más liviano me sera komerlo el peshkado, aunke es fediondo, i no yevar palos o pagar sien groshes».
I ansi le respondio al rey, diziendo ke se kontentava de komerlo.
Kuando komio un vokado, no tuvo remedio de komer mas, siendo la fedor era muncha; i se echo a los pies del rey, diziendo ke mas se kontentava le yevar los palos i no komer tal koza negra. Lo echaron en basho i lo fueron aharvando sinkuenta sesenta palos. I viendo ke ya no le kedo fuersa, se kontento a dar los sien groshes.
Viene a ser ke se apenó kon todas las tres penas.
——————————————–
La tradisión de este kuento ygó al otor, entre otros manaderos sigientes, desde la lejana Mekilta, en torno al livro de Eksodo. Kulli la metio en el sentro de su grande eksplanasion sovre la Hagada de Pesah (Ex 12), kon todos los kavzos djudios para la selevranza de Pesah, konkluyendo en este kavzo ke mas uviera valido al Faraon dejar salir a los djudyos kuando el anunsio de la prima plaga, ke no sufrir todas eyas, komo el esklavo del kuento, porke un danyo grande salva de otros mas chikos, i no a la kontraria, Le trasliteramos el folio 99 d de la edision sitada.
—————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo I: Kuentos de Kulli
