“Antolojía de Kuentos Sefaradíes” de Pascual Pascual Recuero – Kapítolo II – Kuentos de Magriso: 39. KONSEJO DE FILOSOFO por Liliana Benveniste

Ver todos los artículos de esta sección

“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979

———————————————————–

39. KONSEJO DE FILOSOFO

Un pilosof savio le disho a su ijo en ora de su muerte:

– Ijo mio, ¿Kuantos amigos kovrates en tu vida?

Dishole el ijo:

– Senyor padre, kovré sien amigos.

– Dishole su padre: Savrás, ijo mio, ke los pilosofim disheron: » -No ames i no alaves a el amigo antes de prevarlo i konoserlo por sierto si es amigo». Ke savrás ke yo nasí antes de ti i no pude kovrar en toda mi vida otro ke medyo amigo, i tu, ¿komo ya kovrates sien amigos?
I agora, anda i prevalos i veras si toparas ni uno.

El todos es ke prevó i no topó ni uno ke estuvo en su preva. I tormó onde su padre i le disho:

– Alkansé a saver lo ke disho el pilosof: » – Munchos son los amigos sin kuenta, i en ora de el menester no toparesh otro ke pokos».

—————————————–

Las notas de Maimonides, Abdias, Bertinoro i Ayin tosafot iesanim, a la maksima de Pirke Avot «toma un amigo bueno» (1-6), sirven komo manadero de referensia a Magriso (folio 115 a). El pasaje se enkontra en el grande komentario en ladino al Tratado de Abot, inkluso en el M. L. Vaykra (folios 107 c-166 a), sujerido por Lv 23-15)

—————————————–

Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo II: Kuentos de Magriso.