“Antolojía de Kuentos Sefaradíes” de Pascual Pascual Recuero – Kapítolo II – Kuentos de Magriso: 45. LAS ERMANAS SEMEJANTES trasliteración de Liliana Benveniste

Ver todos los artículos de esta sección

“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979

———————————————————–

45. LAS ERMANAS SEMEJANTES

Dos ermanas ke asemejavan una a la otra, estavan kazadas kada una en una sivdad, i la seló a la una su marido kon una persona i la kijo abevrar (1) la agua del sotáh (2) para ver si es ke estava limpya. En lo ke la yevava para Yerushalayim para abevrarla, paso por la sivdad ke morava la otra ermana. Disho ke kería ver a su ermana, i entró onde su ermana. Le disho a eya su ermana:

– Ke bushkates a venir por akí?

Le disho a eya:

– Savras, mi ermana, ke mi marido me yeva a dar a bever la agua de l sotáh, i yo no se ke azer, porke no estó limpia, ke ize enganyo.

Le disho a eya su ermana:

– No te espantes. Tu kedate aki en mi lugar, i yo ire en tu lugaar a Yerushalayim kon tu marido, i no se ve siendo asemejamos la una a la otra, i yo no tengo ningun danyo de bever el agua, siendo estó limpya.

Se meti´los vestidos de la ermana i se fue a Yerushalayim, i bevio la agua, i no uvo ningun danyo. I voltó a su sivdad, i salyó su ermana a resivirla kon alegria grande; i la abrasó i la bezó a su ermana por la amistad grande ke le izo de ir en su lugar i eskaparla de la muerte. I siendo se bezaron i se abrasaron una kon otra, le entró el guezmo del agua ke bevio su ermana dientro de su puerpo, i en akea ora murio la enganyadora.

___________

(1) ingerir

(2) la sospecha de adulterio

—————————————–

Para la mujer sospechada de infiel komanda la Ley un kudiado i ekstranyo rito (Num 5-11/01),a bazada en ke la kulpada deve bever un agua espesiala por esto. Este komando dio orijen a una konseja del Midrash Tanhumá i del Yalkut, de ande lo tomó muestro otor (folio 22 d, ovra i edision dichas), para amostrar ke no ay poder kontra la muerte (Ekls 8-8), si el Dió ansí lo kere.

—————————————–

Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo II: Kuentos de Magriso.