eSefarad Noticias del Mundo Sefaradi
Ver todos los artículos de esta sección
“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979
———————————————————–
73. EL PRINCHIPE DESOBEDIENTE
El ijo de un p rey kontradisho a su padre, i el rey se ensanyó kon su ijo i lo mandó de su tiera por tantos anyos, ke no vea la kara del rey asta ke se asezará i entenderá su mankeza. I kaminando dicho ijo por el kamino, le akosaron ladrones por matarlo i rovarle lo ke topavan, i kería el ijo fuir. Por otro kamino avía animales salvajes ke lo akosavan. I estava el ijo en medio del kamino yorando kon grande pena i pensando komo eskapará. I el rey, su padre, estando en su palasio, se paró por la ventana kon el durbín en la mano i vido a su ijo kerido ke estava yevando muncha pena, ke lo akosaron animales salvajes por una parte i ladrones por otra. Kuando vido esto el rey, pensó en su intelijensia, diziendo:
-Si iré yo mezmo a eskaparlo, o enviaré djente del palasio konosidos ke eskapen a mi ijo, le iva pareser a mi ijo komo ke ya estó afalagado kon él i ya me paso la ravia, i no bushka de asezarse; i si no iré, me espanto no lo mates los ladrones o los animales, ke no tiene por donde fuyir, i al kavo mi ijo es.
¿Ke izo el rey? Mandó el rey djente ajenos ke prendieran a los animales i ke izieran fuir a los ladrones, i ke eskapen al ijo del rey i ke se vayan a sus kaminos, i ke no entienda el ijo del rey ke dicha djente son enviados del rey majsos por modre de él, sino le pareserá ke pasaron por ayí dicha djente por sus echos, i de suyo eskapó él.
—————————————–
Sin pasar todavia de Est 1-2, entendiendo los komentaristos ke tardó el milagro para los djudios de Persia porke meresian kastigo, aunke, komo en la istoria, la proteksion del Dió es permanente. Pontrémoli la arekojió del Yosef leqah, i se enkontra en la oja de la Prima edisión, pp. 24-25 de la trezer i p.44 de la muestra.
—————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo VI: Kuentos de Pontrémoli.
