“Antolojía de Kuentos Sefaradíes” de Pascual Pascual Recuero – Kapítolo II – Kuentos de Magriso: 32. LOS KRIADOS DEL REY por Liliana Benveniste

Ver todos los artículos de esta sección

“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979

———————————————————–

32. LOS KRIADOS DEL REY

Dos kriados servian a el rey. El uno era kriado dientro del palasio del rey, i el otro era en un kazalino de afuera de la sivdad. I pekaron todos los dos kon el rey un modo de pekado. Vino el rey i lo echo a akel servisial kazalino, ke era de afuera, i no kijo ke los sirviera; i a el otro, ke era el kriado dientro de su palasio, se empezó a tomarse kon él i a darle penas por lo ke izo. Le disheron su djente:

– Senyor rey, siendo ke todos los doe yerraron un modo de yerro, ¿ke es el kavzo ke al uno soltates i no le avlas nada, i a el otro te tomas kon él?

Les respondió el rey a dezir:

– Savresh ke no es igualmente el uno kon el otro, siendo ke akel ke es kazalino de afuera no tiene tanta kula, siendo ke no esta ambezado en mi palasio i no konosio aynda mi grandesa. Pero el otro, ke esta desde chiko kriado en mi palasio i konosio mi grandesa, merese muncha pena por lo ke akometyo a revelar de ver mi grandesa

—————————————–

Kon orijen ebraiko en Tanhuma i Yalkut, eskrito en el folio 16 a.b de la ovra en ladino sitada, en el pasaje de la biblia sovre la diskulpa de ken peka por inyoransia. (Lv. 4-2)

—————————————–

Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo II: Kuentos de Magriso.