eSefarad Noticias del Mundo Sefaradi
Ver todos los artículos de esta sección
“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979
———————————————————–
27. LOS MERKADERES ROVADOS
Un talmid haham –disiplo de un savio- se fue a una sivdad kon munchos merkaderes dientro de una nave, i el era muy prove ke no tenia kon el ninguna koza valutoza; i de vez en vez le demandavan los merkaderes ke les dishese donde tenia la merkansia i en ke era lo ke se iva para tratar. El les respondi, diziendo:
– Le merkansia ke yevo yo kon mi es mas valutoza ke todas las de vozotros.
I kansaron de ir bushkando por toda la nave, i no toparon nada. Siendo ansi, fueron aziendo burla teniendolo en malos tratos por dichas avlas ke les disho.
Despues de esto, pasó por ayi una nave korsarya i aferro la nave, i entraron los maltezes i les tomaron las aziendas i la vazyaron toda la nave, de modo ke no les desharon ningun bien, afilu las ropas ke tenian ensima. Kuando salieron en tierra, fueron kaminando i entraron en la sivdad, i no tenian ni pan para komer ni panyo para vestir, i ninguno les avoltava la kara ni avia ken les preguntara ke es su venida. Ma dicho talmid haham se fue al midrash i avrio su boka i dio a konoser lo ke es; i ansi toda la djente de la sivdad le izieron muncho kavod i lo visiteron de los pies a la kaveza, i ken i ken fuera pertenesiente a resivirlo en su kaza; i kuando iva de un lugar a otro, ivan detras de el todos los ombre importantes i distingidos de la sivdad por su kavod para akompanyarlo.
Dichos merkaderes, siendo vieron en tanta reutasion ke lo tenian, se fueron onde el i lo afalagaron kon palavras i le rogaron, diziendo:
– Aze mersed kon mozotros de avlar por muestra desgrasia kon los importantes de la sivdad, ke agan sedaka kon mozotros, ke mos estamos mueriendo de ambre, siendo ya lo vido su mersed kon su ojo ke todo muestro bien mo lo rovaron en la nave.
I les aprometio el haham de perkurar de azerles provecho kuanto le verná de su mano mas de lo ke se pensan eyos. I entonses los dotrino kon palavras, diziendo:
– Vitesh agora komo mi merkansia es mas grande ke la vuestra? I devesh de saver ke munchas diferensias ay de una a otra. Onde es ke todas las merkansias del mundo son kozas ke pueden pedrerse por kemarse en el fuego, o por rovarsela los ladrones, o undirse en la mar, o por kevrar en su trato, de la mizma manera a modos de dezastres ke akontesen en el mundo, siendo kuanta djente se echan a dormir rikos i amanesen proves; lo kual la Ley, ke es una merkansia luzya, ke siempre esta firme i nunka se piedre.
—————————————–
La dovle kuvierta de oro markada por la Ley para kontener el arka de la Aliansa, ke solo era de madera de akasia (Ex 25-10/11), sujere este simil, ke akonseja onorar a los savios proves, porke la verdadera rikeza esta en la siensia. en su orijen ebreo, viene del Midrash Tanhumá i otros manaderos sigientes. La version sefaradi se enkontra en el folio 104 a-b de la ovra mensionada en el numero 25.
—————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo I: Kuentos de Kulli
