eSefarad Noticias del Mundo Sefaradi
Estimados amigas i amigos,
Tengo el onor i el plazer de komunikarvos ke en estos dias viene de apareser el No. 90 de la revista kulturala AKI YERUSHALAYIM.
Sin duda ke esta es una fiesta i una grande alegria para todos los ladino avlantes i los abonados de esta revista, uniko en su djenero en el mundo.
Aki kero felisitar a su shefe redaktor Moshe Shaul por la idea ke tuvo 31 anyo atras traendo, a traves de AY, a la konosensia del mundo sefaradi i no sefaradi la rikeza del patrimonio djudeo-espanyol i de esta manera tambien despertando la lengua i enkorajando a tanta djente de eskrivir en ladino, i a otros, de tornar a meldar la lengua de muestros antepasados. Este es un dia de fiesta i de satisfaksion para Moshe,
ma i para mi tambien.
Yo digo ke kada numero ke aparese es komo prenyado i paridura. Asta ke aresivimos al rezin nasido, pasan largos mezes de lavor i «dolores», asta ke puedemos dizir Mazal tov.
Moshe kerido, sano i rezio, el Dio ke te de la fuersa para kontinuar en esta tarea tan bendicha, amen.
El numero 90 de la revista aparesio esta vez en un formato muy diferente de lo ke todos konosen.
Los ke ya la resivieron i los ke ya la resiviran en serka podran gozar de la rikeza de sus artikolos i de su alto nivel en todos los kampos.
Keridos amigos, en estos dias, komo ya lo savesh, estamos pasando una dura kriza, en todo lo ke konserna la Autoridad Nasionala del Ladino.
Segun desiziones del governo (esperemos ke no se realizaran) el budjeto annual ke resive la ANL sera menguado konsiderablamente, i uno de entre los munchos proyektos apoyados por la Autoridad, es la revista Aki Yerushalayim. Siendo ke el numero de sus abonados esta menguando kada vez mas, por siertas razones, estamos dudando si podremos kontinuar a publikarla.
Aki kero azer apelo a muestros abonados fideles, de empesar en una kampanya, para ayudarmos a anchear el numero de los abonados, en Israel i afuera de Israel.
Kada uno ke sera interesado a resivir informasion puede eskrivir a los korreos elektronikos de Moshe i mio judeospa@bezeqint.net zeldao@netvision.net.il o puede ir a www.aki–yerushalayim.co.il
Amanyana asenderemos la primera kandela de Hanuka, fiesta de las luzes i de nisim i niflaot.
Esperemos ke kon vuestro ayudo i muestra perseverensia podremos, todos gozar, ainda munchas anyos
mas de esta maraviyoza revista ke es AKI YERUSHALAYIM.
HANUKA ALEGRE A TODOS
Zelda Ovadia
Yerushalayim
Para Ladinokomunita
