Poema: YO TE AMO EN TODAS LAS KOLORES de Sharope Blanco

Poema de Sharope Blanco puvlikado en SefaradiMuestro el 31 de Enero 2009

Ayer mirando a las olas i a las flores
Pensi ke te amo en todas las kolores !

Te amo komo todas las namoradas en ROZ
Para ke mizmo de leshos oygas mi boz.

Ay una kolor ke su briyo nunka lo piedre,
Avlo de la kolor de la amistad ; el VEDRE

Te amo en vedre para ke me keras siempre !
El vedre de las ojas ke chuflan kon el ayre.

Lo mijor me siento kuando te amo en «BLUE» !
Alora me viene d’aryento dizir «I love you !»

Kreyeme, nunka me lo imajinariya «It’s true !»
L’amor es loko i te amo «You haven’t a clue !»

Kijyera diya i noche sintirte a mi lado
Mis dezeyos me yevan i te amo en KOROLADO

Mis ojos te bushkan en el sielo nuvlado
Aboko mi kavesa, se ke bives en un otro mundo !

Empeso a amarte en GRIZO i veygo todo aleskuro
Una tristesa pasa, las lagrimas no son un yoro

No..No ! Te amo solo en AMARIYO de vedra !
La kolor del eskarinyo pezgada kom’una piedra

Es un marbro ensima de mi korason el eskarinyo
Solo en PRETO o en BLANKO bivo mi immenso karinyo !