Universidad de Verano sovre la kultura djudeo-espanyola en Paris – Julio 2012

Diez anyos despues del kolokio ke fue organizado en el UNESCO, en 2002, por Jean Carasso fundador de  a bien konosida revista «La Lettre Sepharade», Aki Estamos, (l’Association des Amis de la Lettre Sepharade) esta preparando una «universita de enverano» en Paris. El objektivo es de ofreser una ancha prezentasion de los diferentes aspektos de la kultura djudeo-espanyola, lo ke koresponde a la mision de muestra asosiasion de arekojer, de perpetuar i de transmeter muestra kultura i de azerla bivir de diya en diya.

Esta Universita de Djudyo la estamos organizando en partisipasyon kon la « Alliance israélite universelle » i tendra lugar en el muevo edifisio ke se fraguo ande estava antes la eskola «ENIO» ande fueron formados los mestros de la Alliance. Se yama agora el sentro Alliance Edmond J. Safra ».

Va empesar el Alhad 8 julio, asta el viernes 13, al medyo diya. Por las demanyanadas tendremos talieres de lingua, de literatura, de kantos i de kozina. Despues de komer endjuntos en el lugar (kasher) estaran organizadas konferensias, mezas redondas animadas pos los mijores espesialistos. Kada noche, vamos a prezentar konsertos, filmos…

Los prinsipales sujetos de las konferensias i mezas redondas seran :

1/ La literatura djudeo-espanyola : una o munchas, mito o realita?
2/ los kantos djudeo-espanyoles
3/ El Maroco djudéo-espanyol,
4/ Los Djudios en la Espanya medieval,
5 /Los refranes djudeo-espanyoles
6/ El mundo djudeo-espanyol, una kultura de sivdades Salonika, Istanbul, Izmir.
7/ La Aliance i los Djudeo-espanyoles,
8/ La jenealojia
9/ Kual futuro para los Djudeo-espanyoles?

El programa no esta kompletamente terminado todavia.

Esperamos ke vendran munchos partisipantes (posiblemente unos sientos de Fransia i de otros payzes). Todos estaran bienvenidos.

Kon muncha amistad.
Jenny Laneurie Fresco
Aki Estamos – AALS Paris

Fuente: Ladinokomunita