eSefarad Noticias del Mundo Sefaradi
Antes 14 anyos estava tomando un kurso de Espanyol para Sefaradim en el Instituto Cervantes de Estanbol. Uno de los amigos me dio el adreso de LK. En vista me ize miembra – lo ke me troko la vida.
Desde akel diya, me ize parte de esta grande famiya en el mundo entero, sintiendo lo ke es de ser sefaradi.
Es ayi ke meldi por el livro kompilado por muestro kerido Gad Nassi «En Tierras Ajenas Yo Me Vo Murir», me fui a la resepsion de prezentasion del livro. Kije merkarlo i me disheron ke se vendiya en la gazeta Shalom.
Kuando me fui al Shalom para merkar el livro, Gila Erbes ke es la persona ke se okupa de vender los livros de Shalom (Gozlem Kitapcilik) me propozo de eskrivir en sus pajina en Judeo-Espanyol. Es ayi ke enkontri a Karen Sharhon i endjuntos empesimos a publikar El Amaneser.
En Febrero vamos a eskapar 12 anyos de publikasion. Malgrado ke resivimos munchas eskritas del mundo entero, no ivamos a tener el koraje de empesar esto, si no era por RachelAmado Bortnick (la kriadora de LK) ke mos dio la permision de tomar mesajes de LK para publikarlos en El Amaneser, kuando vemos kozas muy interesantes. Los ke meldan El Amaneser, ya pueden ver komo publikamos tantas kozas tomadas de LK.
A parte ke LK me troko la vida i la izo muncho mas interesante, yo tuve la oportunidad de azer lo mismo por dos personas muy serkanas de mi: La primera fue mi primika ermana, Sharope Blanko, ke introdusi a muestro mundo sefaradi i aze un lavoro ekstraordinaryo kon su sitio Sefaradimuestro, i el sigundo fue mi amigo de munchos anyos, Bension Varon, ke se izo parte tambien de muestro mundo sefaradi, i eskrivio munchos livros valutozos komo Cultures in Counterpoint, Gifts of Language i mas.
Estash viendo komo una koza yeva a la otra?
Para munchos munchos anyos mas, kerido LK !!!
