eSefarad Noticias del Mundo Sefaradi
Keridos amigos i amigas, el kuento siguiente aparesio en el Sefaradi Bulletin de la Sinagoga.
Saludes a todos.
UN KUENTO SEFARADI
Jacobi era un sapatero. Un dia de Shabat el Rabbino en su sermon disho «12 panes eran ofresidos al Dio kuando existia el Templo en Jerusalem».
Jacobi se topo muy ekzitado al oir esto i korrio a su kaza i disho a su mujer» El Dio kome pan. Azeremos a esta semana una semana de PAN DE DIOS i yo los yevare al Dio».
La semana sigiente Jacobi tomo los panes i los yevo a la sinagoga. Apenas los avia metido en el Arko ke vino ayi el ombre ke se okupava de la sinagoga. El disho «Dio, lavori por 7 semanas sin ser pagado. Ayudame Dio» Despues se disho «avrire kisas el arko i topare ayi un milagro». Avrio el arko i topo ayi su milagro. Avian 12 panes.
La proxima semana se paso lo mismo i despues tambien. Ansina pasaron 30 anyos. Djusto en este anyo Jacobi metio sus panes ayi i al prepararse a partir se topo kara kon kara kon el Rabbino. El Rabbino le demando «Ke estas aziendo? Su respuesta era» Trushe pan para el Dio». El Rabbino esta vez le disho «El Dio no kome pan».
El i el Rabbino se eskondieron para ver lo ke se estava pasando. Vieron al moso avriendo el arko i tomando los panes. El Rabbino lo aferro por el piskueso i se metio a gritar diziendo «Lo ke azes tu es un pekado grande.» El moso tenia lagrimas en sus ojos i se lamento.
En supito se oyo ayi una sonriza. Kuando se tornaron atras, vieron ke el ke se reia era «El Mystiko Grande de Safed Isaac Luria.»
El disho «Rabbino, este ombre no es un pekador. Ay uno ke traye el pan i el otro ke lo toma. Es el Dio ke resive todo el kredito» Jacobi tu deves trayer el pan direktamente al moso i kreer ke el Dio sera kontente»
Fue ansi i ani es.
Tradusido por Shimon Geron, Sydney
Fuente: Ladinokomunita
