eSefarad Noticias del Mundo Sefaradi
En el Jewish News de esta semana avia un artikolo titulado «Un Eroe Modesto De Otras Nasiones». Normalmente esto se trata de personas ke no son Judias ke salvaron a los Judios en tiempo de la Segunda Guerra. Es bueno de saver ke no todos son malos mismo en el peor de los paises. Alexando Roach mos avla de Adrianus Van As ke salvo a 1000 Judios.
Saludes a todos.
UN JUSTO DE OTRAS NASIONES
Un Tsadik de otras nasiones Adrianus Van As ke salvo a 1000 Judios en tiempo del Olokosto viene de murir el Juevez pasado en «Montefiore Randwick Campus» a la edad de 94 anyos. Nasido en la Hollanda, imigro a la Australia en 1960.
Lavorava en el Kampo Westerbork i se topava en la kavesa de la distribusion de los alimentos. Adrian kon su mujer Bertha eran Miembros de un Grupo Subterreno i djente muy brava. Eran amigos por anyos de Andrew Havas. Adrian tenia ayi 2 puertas en su ofisina del kampo i azia huir a un Judio kada dia de una puerta i los eskondia al interiror. Bertha de su parte preparava dokumentos falsos i los metia en su korset. En la noche se los yevava en bisiklet.
Van As, Bertha i sus kriaturas bivieron en el kampo entre 1942 i 1945 basho la inspeksion de los Nazistos. Kitavan sin ser vistos nombres de la lista de deportasion. Prokuravan dokumentos falsos i bushkavban kazas para los ke eran salvados.
Van As i Bertha fueron deklarados «Justos entre las nasiones» por Yad VaShem en 1991.
Van As era un ombre muy modesto i nunka penso ke lo ke azia era una koza ke salia del ordinario. No puedia soportar ninguna injustisia. De relijion era un Presbiteranio bien devuado i protejia a todos.
Viajo kon koraje a traves el pais para kuidar desde 2000 indo a las sivdades rejionales, avlando kon dezenas de miles de adultos i estudiantes. Era el amigo del Direktor de Montefiore el Rabino David Rogut. Havas su amigo le va meldar un Kadish en su tomba sovre la demanda de Van As. Este ombre tenia muncho respekto por los Judios. Se metia siempre una Kipa en su kavesa.
Tradusido por Shimon Geron, Sydney
