eSefarad Noticias del Mundo Sefaradi
Munchas vezes mis eskriturias se konsentran sovre el Mundo ke deshi atras 52 anyos antes. Komparo el Mundo Viejo kon el Muevo para amostrar las diferensias i los kambios ke tomaron lugar. Esta vez en entrando al Anyo Muevo me topo eskribviendo sovre la sivdad de Sydney ande pasaron 2 tiersos de mi vida. Komo era esta sivdad kuando vine aki kon mi madre komo un mansevo en 1961? Komo es esta sivdad en 2014 rodeado de mujer i kriaturas? No ay duda ke kada sivdad se troka por el bien i por el mal. Esto lo vide kon mis ojos en kada epoka de mi vida. Vide tambien los roles de mi vida trokarsen en la transision de la mansevez a la viejez. En este lugar tuve momentos tristes i momentos alegres. No vide komo estos 52 anyos pasaron.
Saludes a todos.
TROKA KAZAL,TROKA EL MAZAL.
Nunka olvidare el dia ke mi madre i yo metimos los pies aki. No olvidare ni los 52 anyos ke aki pasi. Mismo en avlando el Inglez tenia el aire de uno perdido porke en este pais los imigrantes no eran amados tanto.
Sydney no kayia menos ke Istanbul en su belleza. Kon un klima subtropikal ande el invierno no se konosia, por seguro este pais era mas libre, demokratiko i prospero, ma lo admeto ke en tantos anyos no tuve un buen egzito
El Sydney ke vide en 1961 no es el Sydney de 2014. Todo se troko i se transformo indo adelantre, mismo entre la djente ay mas ajenos ke orijinarios de Ingletierra ke mantienen el karakter del pais kon su aksento i kultura.
En esta sivdad avian mas kazas kon guertas en lugar de razga sielos I vide kon mis ojos komo se troko Sydney kon los tiempos. De 2 Miliones de habitantes se izieron 4 Miliones kon oleadas i oleadas de miles i miles de imigranres.
Oy la djente korren komo lokos i son muy inyervozos I al mirarlos me da la impresion ke son neurastenikos, kaminan kon el telefono mobile sin ke kaiga de la mano, gastan un dinero ke no tienen en aziendo prestamiento.
El Sydney de 1961 tenia una mar limpia i el aire limpio. La djente siendo mas kalma todo kaminava despasio. De sierto tenian una nosion de lo ke entrava i salia kon valores relijiozas ke les trayia paz i kalmo.
DE SIERTO KADA KOZA SE TROKA KON EL TIEMPO.
UNA JENERASION SE VA I OTRA VIENE.
Simon Geron
Sydney 2014
