eSefarad Noticias del Mundo Sefaradi
Muchos anyos sufre Israel de atakes, matasinas, kayidas de askieres i siviles, anyos i anyos. de el establisimiento del paes, asta oy. No ay repozo ni kayades. La tierra esta empapada kon sangre i yena de monumentos de memoria.
Israel bushka la paz, ama los vizinos estan kon ideolojiya relijoza, barbarika i kruella, mos atakan i no se kansan nunka.
Vos kiero kontar sovre una trajedia de onze askieres djovenos ke muryeron al anyo 1967, i serka de 50 anyos no estava kontado este evenimiento, ni izieron monumento de memoria. Kon la inisiyativa de los paryentes i famiyas, esta kestion fue adovada. en Israel dizen: es bueno tadre ke nunka.
La frontiera entre israel i la Suriya es la Altura del Golan. es una muntania larga, de 80 kilometros, i anchura manko de 50 kilometros. Todo este derredor era un kampo militer gigantiko, en manos de los Suriyanos, yeno de tankes, kanones, minas, postos i kanales fortifikados kon pareyes de chemento i fierros. magazenes debasho de la tierra, yenos de materyales, i amunition para los alates de gerra. Todo esto kito la alma de los Kibutsim i kazales en el norte del paes. De la altura ke se topavan, tiravan, i fizieron la vida inseportavle, kon muertos i danyos a la kazas i a la agrikultura. Esta sufriensa turo anyos.
En la gerra de sesh diyas, Israel konkisto la altura del Golan, i mas tadre fue deklarada kon suverania israeliana.
Israel troko la altura, de un kampo eskacha de kozas de gerras, a una guerta de agrikultura moderna, limpia, vedre, kon kibutsim, kazales, i afilu sivda grande ke se yama Katserin. No era liviano alimpiar la altura, turo anyos i kavzo danyos i muertos. (inda oy, no esta limpia de miles de minas enterradas en la tierra, i muchos kampos estan markados, perikolo de entrar- Minas ).
En alimpiando la altura del Golan, akontesio esta trajedia. Para derokar los magazenes kavakados, de las bombas, entrava un espesialisto de amunision, egzaminava el magazen, i dava la permision de derokarlo. Malorozamente, uno de estos bunkeres se pardeleo (explozo) i onze askieres fueron matados en este aakidente preto.
Muchos anyos pasaron kon kayades, de este evenimiento. Esto paso serka de una kaza abandonada, ruvinada, sin ventanas i pareyes kayidas, ke se yama La kaza de la Duana alta.
Esta kaza existe del tiempo Otomano. Una famiya de investegadores la tomo la kaza i dechizio de azerla kon el derredor, un otel eksklusivo. Este lugar preto de la influensia vulkanika se troko, i se fizo komo un diyamante en el sentro del deserto.
El otel se yama (Sovaj )מלון פרא. yeno de arvoleriya i flores, sin permito de entrar kriyaturas, solo trankilidad, ayre limpio de muntanyas, pasharos bulando i chuchuleando, golor de flores, halis lugar de vakansa repozada. Las famiyas de la trajedia demandaron ayudo i saporto del otel, para fraguar un monumento de memoria al derredor de la entrada del otel, i achetaron, i se fizo.
Muchos no lo konosen, ama poko a poko, ay vijitas ke sienten lo ke paso, kon los nombres de los kayidos, halis monumento impresionante ke da respekto i memorya de este evenimiento.
Un poko kalmar las almas de las famiyas.
Kon amista a todos i todas.
Nissim Ashkenazi
Kiryat Motskin
Israel.
Fuente: Nissim Ashkenazi/Ladinokomunita
