eSefarad Noticias del Mundo Sefaradi
En el Jewish News de esta semana «Rabbi Daniel Rabin» presenta un artikolo liado a «TISHA B’AV» i a la PARASHAT DEVARIM ke trata de «EIHA», una palavra en la istoria judia eksprimiendo una tristesa ke se topa en el Tanah dicho por «Moshe, Yeshayahu i Yirmiyahu» mostrando epokas diferentes del moral i del deklino de la sosiedad.
En primero Eiha vino de Moshe exprimiendo su frustrasion i sentido de ser asolado komo el Lider de Israel. Moshe lo lamenta i se pregunta komo puede yevar en su espalda tanto pezgo siendo todo solo? Siglos despues esta yamada se aze por los profetos «Yeshayahu i Yirmiyahu».
Yeshayahu lamenta la dekadensia moral de Yerushalayim en demandando «Komo es ke una sivdad de fey se izo «zona»prostituta»? Yirmiyahu a ver la destruksion de la sivdad, lo lamento i disho «Helas esta sivdad kayendo de su altura se izo asolada komo una mujer bivda».
El pezgo del liderazgo, la sosiedad korrompida, su asolasion eran epokas diferentes en transizion, mostrando la krisa arientro de la komunidad i del liderazgo. Oy mos topamos diziendo un muevo «Eiha». i se demanda ¿como fue ke el mundo torno su espalda a Israel i al Puevlo Judio? ¿Komo es ke marchan en las kayes en somporte de las organizasiones de terror ke bushkan la destruksion de Israel? ¿Komo es ke el antisemitismo alevanta su kara de muevo? Moshe se vido solo en su lucha komo mos sentimos mozotros oy en siendo asolados. Es el triumfo de maldad komo se vido munchas vezes en la istoria.
«Josh Freidenberg» disho sovre el antisemitismo ke «Kozas malas se pasavan kuando el puevlo bueno estava en silensio». Ansi esto era una trajedia ke Moshe mos avia prevenido de antes. Lo ke disho Yeshayahu tratava de una sosiedad ke antes era yena de djustisia i ke termino siendo korrompida. Es el mesaje para oy, de mantener la djustisia, integridad i kompasion. Lo ke disho Yirmiyahu tratava de la solitud de Yerushalayim i el kolapso de la sosiedad. El dezespero no es solamente fiziko ma moral i espiritual. Ansi la yamada por la «Eiha Mueva» es ser vijilantes i no deshar ke la istoria se repeta de muevo i defender muestras valores i muestro puevlo. En este TESHA»BEAV ay ke despiertar el mundo a la realidad de la situasion sin tener duvdas kon la klaridad moral ke fue una gia a muestros ansestros.
Ser unidos siempre en frente de adversidad. Es el echo de muestra djenerasion. Dizir un «Eiha Muevo»
SALUDES A TODOS
Tradusido por Simon Geron de Sydney
Fuente: Ladinokomunita
