eSefarad Noticias del Mundo Sefaradi
Keridos amigos i amigas
Meldí en el Jewish News un artikolo prezentado por el Rabino Ritchie Moss, tratando de la kestion si vale mas avlar kon el rabino o bushkar la informasion en el internet. [Yo no savia ke los djudios tenian el sitio «Joogle»]
Saludes a todos
——————————————————————————-
TENGO MENESTER DE DEMANDAR AL RABINO?
Kada uno lo save ke ay problemas kon el Sistem Automat. Yaman al la banka por una kestion i son resividos kon la kansión «Bien Venido» i kon una lista de opsiones. En los últimos tiempos una banka en America kreo su Sistem de reklamas para los «Premium Members». Se puede yamar al reprezentativo verdadero si tu sos un «premium member». Inkreíble? En un mundo ande el «Automat» domina, los miembros de premium son regalados i pueden evitar la boz autómata. Lo ke no mos gusta en estos sistemes es ke mos rovan muestra individualidad. Kada uno kaye entre las 11 o 13 opsiones ke ofrese la boz monótona.
Del otro lado ser resivido por un individuo ke pronunsia a muestros nombres i ke entiende muestras frustrasiones diarias parese mas agradable. La Ley Judia es Uniforme i en mismo tiempo espesifika al individuo. Uniforme porke la Alahah mos dize komo se aze esto i esto. Del otro lado no ay kavzo ande la Ley no konsidera al individuo i sus sirkunstansias. Ay fleksivilidad en el kriterio del kavzo. Ay munchas situasiones ande la Ley Djudia permite azerlo en tiempo de menester. Komo unos menesteres en sirkunstensias imediatas. Se baza sovre la istoria del individuo i su temperamento. Si se desha ke el individuo tome la desizion munchos pensarían ke kualkiera situasion puede entrar ayí. A unos seriya un menester grande i a otros ande la vida del individuo no esta en peligro.
Los savios (Pirke Avot 1, 6): dizen: «Azete a ti un maestro (Rav), i akista (obtene) un amigo (haver)». El rabino no es solamente la baza de saviduría. El internet kontiene mucho de esto. Para dar una repuesta djusta i praktika, el rabino tiene ke ser tambien un buen amigo. El rolo del rabino no es solamente responder a las kestiones. Esta ayí para servir de kara de la entrada a la komunidad i a la relijión. Es importante de developar una relasión personal para poder kreser. El Dio kiere ke kada individuo sea su partenero. Si tu dezeas investir en una kompania ke tiene un potensial grande, no yamas al Sistem Autómata. Pensas tener una amistad direkta kon el direktor. De misma manera el internet no puede tomar el lugar del rabino. Sos un Miembro Premium en frente del Dio. Merese ke avles a la persona i no a la makina.
Trezladado por Shimon Geron.
Australia
Fuente: Ladinokomunita
